زانشتگەو هەڵەبجەی پۍ بەرز ڕاگرتەو ٣٦ەمین ساڵیاڎوو کیمیاۋاران و یاڎوو گەشمەرڎەبیەو پەنج هەزار کوردا بۍ گوناحوو شارەکەی بە کیمیاۋیی، چن چالاكیێوە هۆشیار کەردەیۆ و زانستیی و هونەرییش ئەنجام دا.
پەی هوشیار کەردەیۆ هاموڵاتییا پەی بەدەسئاردەی مافەكاشا جە ڕوو یاساییوە، زانشتگەو هەڵەبجەی هۊرئێست بە ئەنجامدای چن چالاكیێوە.
جە چوارچێوەو چالاکییەکانە دیدارێوە زانستیی لوواڕاوە، چنی پانێڵێوە پەی ئشناساو جینۆسایدوو هەڵەبجەی و هوشیار کەردەیۆ هاموڵاتییا پۍ بەدەسئاردەی مافەكاشا جە ڕوو یاساییوە، حەرپاسە کوڵە فیلمێوە نمایش کریا سەروو کیمیاۋارانکەردەی شارەکەی.
لاو ۋێشۆ دكتۆرە مهاباد كامیل-ە سەرۆكەو زانشتگەو هەڵەبجەی چا بارۆ بە ڕۆژنیوزیش وات: جە ڕاو ئی جۆرە چالاكییاوە گەرەکمانە ئی یاڎەیە زینڎە ڕاگێرمۍ، گەرەکمانە زانشتگە و گلێرگەی تێكەڵ بە یۊترینی کەرمۍ جیۍ نەبیمێوە جە یۊترینی، پۍ ئانەیچ دەسکۊتۍ عالێما پۍ شارەكەیما ئاردێنۍ، ئارۊیچ قەراروو کەردەیۆ كۆلێجی پزیشكیی دریا پۍ شارەكەیما.
حەر جەمەراسیمەکەنە دكتۆر ئاوارە حسێن ڕاگروو كۆلێجوو یاسای جە زانشتگەو هەڵەبجەینە بە ڕۆژنیوزیش وات: تاوانەو كیمیاۋاران کەردەی هەڵەبجەی جینۆسایدا، بەپاو یاسا و دەستووروو عێراقی، ئەركوو حكومەتوو عێراقیا قەرەبوو مەردموو شارەكەی کەرۊوە، بەڵام پەرلەمانوو كوردسانی جە ساڵەو ٢٠١٣ ینە یاسێوەش بەرکەردێنە، پی یاسۍ ئەركەكەش ناڕاسەوخۆ فاڕانۆ پۍ سەروو حكومەتوو هەرێمی، جە وەختێنە نە ئشیۍ یاسێوە پا جۆرەیە بەر کەرۆ، چونكی ئەركەكە قورسا و قەرەبووكەردەیۆ كە ڕێژەكەش فرەن، مشۊم جە تەرەفوو حكومەتوو عێراقیوە کریۆوە.
وتیشی: دەمانەوێت خەڵكی هۆشیار بكەینەوە لە ڕوانگەی یاساییەوە تا مافەكانی خۆیان بەدەست بهێنن، چونكە شارەكە بەپێی یاسای نێودەوڵەتیی تاوانی جینۆسایدی بەرامبەر كراوە.
