ڕاپیمای ۋەرفراوانوو ئازاڎیی جە وان دەسشپنەکەرڎ، سەرەڕاو هجوموو پۆلیسی ڕاپیماکەی هەر بەردەواما. قۆڵوو وانی 'ڕاپیمای ۋەرفراوانوو ئازاڎیی' پۍ ئازاڎیی ڕابەروو گەلوو کوردی عەبدوڵا ئۆجالانی دەسشپنەکەرد و تا ١٥و شوباتی بەردەوام بۆ.
دماو ئەرەیاۋناکەو کۆنگرە ڕۆنامەوانیەکەو وانی، هامسەرۆکوو بەدەپەی کەسکین بایندر و هامسەرۆکەو گرڎیی دەم پارتی تونجەر باقرخانە، جە ئوتێلەو کۆنگرە ڕۆنامەوانیەکەینە بەرەو پارکوو موسا عەنتەری دەسشا بە ڕاپیمای کەرد.
'کوردسان بۆ بە قەبرسانوو فاشیزمی'
جە ڕاپیماکەینە دروشمەو "بژیۋۆ مدرامانوو زینڎانیا"، "بژیۋۆ مدرامانوو ئیمراڵی"، سڵام هەزار سڵام جە ئیمراڵی" و "کوردسان بۆ بە قەبرسانوو فاشیزم "ی بەرزۍ کریێوە.
جەماوەروو گەلی جە پارکوو موسا عەنتەرینە بە چەپڵە دایونەی پێشوازیشا جە شاندوو ڕاپیماکەی کەرد. دماتەر کەسکین بایندر سوپاسوو گەلوو وانیش کەرد و واتش: "وان بەشێوێوە گۊرە ۋێشا بەروست، ئی ۋۍ بەروستەیە یاگۍ مەدحینە. ڕاسا ژمارەما ئانڎە فرە نیا، بەڵام دڵوو ملۋێنان کەساما ئینا چنی. هەر بیدۍ، بژیۋۆ گەلوو وانی".
پۆلیس کە تەوقەو جەماوەریشا دۍ بۍ، واتشا ڕاپیمای قەڎەغەن و ڕاش پنە مەڎەیمۍ، گەرەکشا بۍ جەماوەروو گەلی پەرتوو وەڵا کەرا، بەڵام جەماوەرو گەلی گۊششا بە پۆلیسی نەڎا و بە دروشمەو "بژیۋۆ مدرامانوو زینڎانیا" ڕاپیماکەی بەردەوام بۍ. پی مەڵامەتۆ پۆلیس هجومش کەرد سەروو چالاکاو. چنڎین ۋێنیشاندەرۍ جە تەرەفوو پۆلیسوە گیریۍ.
سەرەڕاو هجوموو پۆلیسی، ڕاپیماکەی بەردەوام بۍ. جەماوەروو گەلی بە واتەیۆ دروشمەکاوە کوۍ بیێوە و پېوەرە 'گۆرانیۍ ئازاڎیشا' واتێوە.
