گرد ساڵێ چی روەنە ژەنی دنیای و پیا یەکسان وازەکێچ یادو هەشتو مارسی کەراوە، پێسە پشتیوانی جە داوا و خەباتو ژەنا، یاگۆ وێشەنە پیرۆزبایشا پەنە واچمێنەو وێما بە داکوکیکارێ سەرسەخت جە داواکا ژەنا زانمێنە، چونکە کۆمەڵگەنە ئەگەر ژەنی ئازادە نەبۆ، نەوێوی بەدیل گۆشکریا و دور جەئازادی بارمێنە.
هۆرامان وەڵتەر چی وەختەیەو وەڵێ هەزاران ساڵینە یاگەوجاگەو ژەنێ بەرز و پایەدار بییەن، هەرئینەی پاسشە کەردەن کە کۆمەڵگێوی هێقم و نەلەرزیا هۆرامانەنە بۆنە.
دلێ هورامیەکانە ئاوەز، ویرگا، یۆبیەی، هەمیشە چراوەو رۆشنکەردەیۆ راویارو ژیوای بیەن، هەرپۆچی وینمێ کەمتەرین ناوەراوەری وەراوەرو ژەناوە کریان چەمو دۆروبەریەکامانە کە هام نەتەوێمانێ.
رۆتو ویەردەیەنە دلێ هۆرامیەکانە دوەژەنە، ژەن بەژەن، گۆرە بەگولانە، مارەیی ئەسای، نەبیەن، هەرپۆچی سەربارو تێکەڵی هۆرامیەکا چەنی ئەویشاتەری وینمێ هەڵای روحیەی بەرز و یۆبیەی و نەبیەی جیایی بەینو کوڕوکناچەیەنە، پاو یاگەکا تەری وەرەچەمتەر تەرا.
ئینە پامانا نمێ کە کۆمەڵگەو هۆرامی شامی شەریفا و هیچ خراپەکاری و ملەجێڕێوەش نیەنە چەنە، بەڵام فەرقەکە بەینو زەمینی و ئاسمانیا، ئیسەیچ لادەگێوو هۆرامانی ئازادی ژەنێنە وەڵتەرا جە شارێوی گۆرەی ناهۆرامی.
ئەڵبەتە یۆ چانیشا کەپاسەشە کەردەن کۆمەڵگەو هۆرامی دەسبەردارو بڕێ چێواش بۆنە، ئانەنە تێکەڵێ بێنێ چەنی خەڵکی تەری.
ئێمە پەی ئینەی سەلەمنمێش کۆمەڵگەو هۆرامانی وەڵتەرینا پێ پارێزنای ژەنا، ئامارێوا کە راوەبەری توندو تیژی دژو ژەنا جەحکومەتو هەرێمو کوردستانیەنە وەڵابیەنۆ کە ماوەو ١٢ ساڵان هیچ دەگێوەو پانیشتو هۆرامانیەنە، یانێ جەهەرێمو کوردستانیەنە، هیچ ژەنێوە سکاڵاش سەرو نەمێرد، نەبرا، نەتاتە ی نەکەردەن کە ناوەراوەریش چەنی کریابۆ، چا ماونە هیچ ژەنێوە هۆرامانەنە وێش نەسۆچنان، نەکوشیێنە.!!!
ئینە یاگۆ شانازییەنە، چون هەر پاینتەر جە هۆرامانی ساڵانە ئاماری سەیرو فێلعین وەڵا کریۆوە سەرو کوشتەی و وێسۆچناو ژەنا..
چی یادەنە، سڵام پەی فەرهەنگو بەرزو هۆرامانی... سڵام پەی ئاژەنا وەرگۆ سۆتەی زێڵیشا گێرا و کوڕەکاشا مدا راو ئازادییەنە. ئارۆنە ئەرکێتەر ئینا سەرو شانەو ژەنا هۆرامانیۆ ئادیچ پارێزنای زوانی هۆرامیا و بەکارئاردەیش چەنی زارۆڵەکاش، چون زوان زوانو ئەدێن...
سڵام پەی ژەنا هۆرامانی، پەی ئاژەنا کە قبوڵشا نیا زەعیفێ با...

نامق هۆرامی