مەراسیمەکاو ٣١ەمین فێستیڤاڵی میاننەتەوەی کولتووری کوردی جە مەیدانوو ڕەبستۊکپارکینە شاروو فرانکفۊرتوو ئەڵمانیاینە دەسش پەنە کەرد.

وەڵێنیمەڕۊو ئارۊی ئەمڕو دەیان هەزار هاموەڵاتۍ کورڎۍ ئەرەنیشتۍ وەڵاتە جیاجیایا  پێسە ئەڵمانیا، سویسرا، بەلجیکا، ئیتاڵیا، نەمسا، هۊڵەندا، سویدی و فەڕەنسای ئامادۍ مەیدانوو فێستیڤاڵی میاننەتەوەیی کولتووری کوردی بێنۍ.

جە مەیدانوو فێستیڤاڵەکەینە کە جۊشوخرۊشێوە فرەش بۍ، لافیتەو 'قەوارە و ئازادی پەی کوردی' ورواسیا و سەدان ڕسمۍ ڕابەروو گەلوو کوردی، عەبدوڵڵا ئۊجالانی چا مەیدانەنە بەرزۍ کریێوە.

مەیدانەکەنە هەزاران کەسۍ ڕسموو ئا گەشمەرڎاشا بەرزۍ کەرڎێوە، کە دلۍ کارەوانوو کۊشیاینە پەی ئازادیی کوردستانی جە وەختە جیاجیاکانە گەشمەرڎۍ بیۍ و دروشمەکاو 'بژیوۊ مدرامانوو پەکەکە' و 'بۍ سەرۊکی ژیوا مەبۊ'یشا واتێوە.  

مەیدانوو فێستیڤاڵەکەی بە ڕەنگی نەتەوەیی ڕازییاوە، ناوەندوو  گلێرگەی دیموکراتوو کوردی، ئەرەمەرزیا و ڕێکوزیا جیاجیاکاو کوردی پەی وەڵێوەبەرڎەی کولتووری کوردی سەکوێوەشا وەش کەرد. هەرپاسە نویسەرۍ جە نیشانگایەکاو کتێبینە چەنی وانەرەکاشا، دیدارشا کەرد.

فێستیڤاڵەکە کە بە دروشموو "جە ١٠٠ەمین ساڵڕۊو لۊزانینە، چارەسەروو کێشەو کوردی و قەوارەو کوردستان"ی ملۊ ڕاوە، پێشکەشوو ئەڤین گۊیی، میر پەروەری و عەبدولڕەحمان کزلی کریان، کە پاریسنە تیرۊرۍ کریۍ.

فێستیڤاڵەکە دماو دەیەقێوە ڕێزگێرتەی جە یادوو گەشمەرڎا دەسش پەنە کەرد و دلێشنە ئەنگین سەڤەر و زوبەیدە زومرود، هامسەرۊکاو کەجەدەکە-ئەی، هامسەرۊکاو کۊن-مەدی و ئایتەن کاپلان، قسەکەرەو جمیەروو ژەناو کوردی ئەورووپانە قسێشا کەرڎۍ.

س.ز