گەریلاو هەپەگەی، شێرزان هاوار، ئا دەمەی مدرامان پەنەوازش بە پەشگیری هەن پەنەوازەن هەر کەسۍ بە دەور و ئەرکوو ۋېش هۊربېزۊ و واتش: " با کەس نەواچۊ حیچم پنە مەکریۆ، متاوو چېش کەروو. پەنەوازەن گردما ۋەرپرسیاری ۋېما بەیاگۍ بیاۋنمۍ".

گەریلاو هەپەگەی شێرازان هاوار بۆنەو ٤٥ ەمین ساڵیاڎوو ئەرەمەرزناو پەکەکەیۆ قسېش پۍ ئاژانسوو هەواڵو فورات (ANF)ی کەرڎۍ و ئەرەیاۋناش، بە شەرەفێوە گۊرۆ ئاڵاو گەشمەرڎا بەرزکەرمېوە. شێرزان هاوار واتش، "ئامانجما بەدیئاردەی ئامانجوو گەشمەرڎان". ئەرەیاۋناش، پەکەکە جە وەختېنە کە هیواو گەلوو کوردی مەڕیابۍ بە ئەرکێوە تاریخی هۊرئێست،  ئاماژەش پانەی کەرڎ، سەرەڕاو ئەشکەنجەکاو دەوڵەتوو تورکی، کادیراو پەکەکەی جە زینڎانی ئامەڎینە مدرامانېوە گۊرەشا کەرڎ. گەریلاو هەپەگەی شێرزان هاوار واتش، "هەڤاڵ کەمال پیر دماو ڕۊچۍ مەرڎەی ئاما داڎگاو بە هەڤاڵاش وات، " ئێمە سەرېکۊتیمۍ، ئارۆ ٦ کەسېنمۍ. سەوای بیمۍ بە هەزاران کەسۍ و میاومۍ ملیۆنان ئینسانۍ. ئارۆ هەزاران جەنگەوانۍ کوردی ، عەرەب و سوریانی و ئەنتەرناسیۆنالیستی هامشانوو یۊترینی کۊشیانە، ئینەیچ مۆڕاڵێوە گۊرەما پنەبەخشۆ، ئاخېزوو ۋەرنیشتی نیشانۍ ئامانجوو گەشمەرڎەکامانە، بە دڵنیاییوە ئی ئاخېزە کاریگەریش سەروو گلېرگەی بیەن، گەلوو کوردی، ژەنا، گەنجا هوشیارۍ بیۍ، ۋېشا ڕێکوستەن و جە گرڎ مېڎانېوە ئی ئاخېزەینە بەشڎارېنۍ".

ۋەرپرسیاری تاریخیما هەن

هاوار ئەرەیاۋناش، چی ساتە تاریخیەنە، سەرکۊتەی مدرامانی پەنەوازش بە پەشگیریېوە بەقوەتی هەن و واتش، "جە ساتەوەختێوە چانەنە، پەنەوازەن گرڎکەسۍ سەرهۊردای کەرا، بە دەور و ئەرکوو ۋېشا هۊربېزا. با کەس نەواچۊ هیچم پنە مەکریۆ. ئەرکی گرنگ گنۆ ئەستۆو ژەنا و گەنجا. پەنەوازەن گرڎما ۋەرپرسیاری ۋېما جابەجێ کەرمۍ. پېسە نەوەو شێخ ڕەزای و شێخ سەعیدی، دەور و ئەرکوو ۋېما جابەجۍ کەرمۍ".