ئاماڎەکارییەکۍ پەی چوارەمین فیستیڤاڵی کولتووری گەشمەرڎە سینان دێرسیمی کە ڕۆو یەکشەممەی جە پانیشتوو فەرەنسای ملۆڕاوە نزیک مبۆوە. کۆمیتەی ئاماڎەکارو فێستیڤاڵەکەی بانگەوازش جە گەلوو کورڎی و دۆساش کەرڎ کە بە دروشمەو " ئازاڎیی پەی ڕابەر ئاپۆی، ستاتۆیۍ پەی کورڎەسانی" بەشدارۍ فێستیڤاڵەکەی با.

کۆمیتەو هامسۆزی و لایەنگرا گەلوو کورڎی، پارتو کۆمۆنیستی فەرەنسای، پارتو چەپی، جەمەو مافەکا مرۆڤی، جمیەری ئاشتی، جمیەرو دژە ڕەگەزپەرسی، یۆبیەی کرێکاراو CGT، پارتو دژە سەرمایەداری، جەمەو ئازاڎیی و یۆگێرتەی، جمیەرو ژەنا فەڕەنسای، سیاسەتمەدارا، دەنگدەرا شارەوانی مارسیلیای و فرێوە جە نوێنەرا تەری بەشدارۍ فیستیڤاڵەکەی مبا.

هەرپاسە هونەرمەنڎا هۆزان دیار، بەسەر شاهین، شەهریبانی کوردی، ئیبراهیم قامیشلۆ، شیار سیپان جە فێستیڤاڵەکەنە هونەرەکاشا نمایش مکەرا.

نامونیشانو فێستیڤاڵەکەو مارسیلیای Parc de la Ravelle (La Rose).

کاتو لوای ڕاوەی یەکشەممە ١٥/٩/٢٠٢٤ی

کاتو دەسپنەکەرڎەی: ١٢:٠٠

هەرپاسە فەتحی سەرحەد واتەواچو کۆمیتەی ئاماڎەکارو فیستیڤاڵەکەی و میرکان ئایسەل مەلازگرتە، هامسەرۆکەو ئەنجوومەنو ژەنا ئارینی ئەرەیاۋناش: "ڕۆو یەکشەممەی جە فیستیڤاڵەکەنە کوۍ بیمێوە و جە دەورو مڎرامانوو گەریلاکا ئازاڎیی کورڎەسانی یۆ گێرمۍ و پێوەرە پەی ئازاڎیی ڕابەر ئاپۆی و کورڎەسانی دەنگما بەرز مکەرمێوە."

هامکات هونەرمەنڎا ئاماڎۍ فیستیڤاڵەکەیچ داواشا ۋنەو کوردا مارسیلیای و پانیشتوو فەڕەنسای کەرڎ بەشدارۍ فیستیڤاڵەکەی با.

یاگۍ ئاماژەینە فیستیڤاڵەکە جە گرڎوو پانیشتوو فەرەنساینە، تولوز، بۆردو، مۆنتپلیەر، دراگویگنان، لیۆن، مارگنان و ئەڤیگنۆنەنە بە گرڎو قەوەتیشۆ بەردەوام مبۆ.