سەرۆکو یەنەکەی بۆنەو ٤٩ەمین ساڵیاڎوو ئەرەمەرزناو یەنەکەیۆ ئەرەیاۋناش: گەرەکمانە جیاوازییەکا بوزمۍ خزمەتوو ئامانجەکاوە، ناکۆکییە دلێینەییەکا پێوەرە چارەسەر بکەرمۍ، یەکهەڵوێسیما زامنوو پارێزناو مافەکاما مکەرۆ.
بافڵ تاڵەبانی سەرۆکوو یەنەکەی بۆنەو ٤٩یەمین ساڵیاڎوو ئەرەمەرزناو یەنەکەیۆ کە جە ڕووۍ پێسە ئارۆینە و جە ١و حوزەیرانوو ساڵەو ١٩٧٥ ئەرەمەرزیا، پەیامێوەش وەڵاکەردۆ. جە پەیامەکەشەنە تاڵەبانی ئەرەیاۋناش: ئانەی جە ۋییەردەنە پەی چارەسەرکەردەی کێشەکا و جە یۆنزیککەردەیۆ لایەنەکا کەردەنما، بە هەمان ڕۆحییەتۆ بەردەوامیش پنە مڎەیمۍ و گەرەکمانە ئاشتیێوە هەمیشەیی و دوور جە ملەملانێ مەنتیقەکەی بگێرۆوە.
سەرۆکوو یەنەکەی ماچۆ: جەخت جە قووڵکەردەیۆ ئاشتی و پێوەرە ژیۋای مکەرمێوە، بەرەو کاری پێوەرەیما کراوە بیەن و حەرپاسەیچە مەنۆوە، ڕێزی تەمام جە گرڎوو هێز و لایەنە سیاسییەکا تەروو کوردسانی مگێرمۍ و گەرەکمانە جیاوازییەکا بوزمۍ خزمەتوو ئامانجەکاوە، ناکۆکییە دلێینەییەکا پێوەرە چارەسەر بکەرمۍ و بە ئیرادە و هێزێوە زیاتەرۆ جە بەرۆ بەرۍ گنمۍ.
حەرپاسە بافڵ تاڵەبانی جەختش کەردۆ، کوردسان پەنەوازیش گرڎیمانە و دەنگما پێوەرە زوڵاڵتەرا، یەکڕیزی و یەکهەڵوێسیما زامنوو پارێزنای مافەکاما مکەرۆ و ئەزموونەکۍ ۋییەردەی سەلەمنانشا دووبەرەکی خزمەتوو هیچ لایۍ مەکەرۆ، پێویسا بە خیاڵۍ گەورەتەر و نیشتمانیتەرۆ هەنگامە بنیەیمۍ و چەمما جە وەشگوزەرانی خەڵکی و ئاینڎەو گەشوو کوردسانی بۆ.
