گلېرگەی دیموکراتیکی کورڎی جە سویسرا ئەرەیاۋناش، ئامانج چا هجوما کە جە پانیشتوو کورڎسانی بە هامکاری پەدەکەی کریا سەرو گەریلاکا ئازاڎیی، دلېنەبەرڎەی دەسکۊتەکا گەلوو کورڎینۍ، کە جە ماوەو ٤٠ ساڵی ۋیەرڎەینە بە کۊشیای بەدەسش ئارڎېنۍ.
گلېرگەی دیموکراتیکی کورڎی جە سویسرا(جەدەکە-سە)، جە ئەرەیاۋنېوەنە جە بارەو خیانەتی و ئەوەمەنڎەکاش پۍ سەرو گەلوو کورڎی ۋەڵاکەرڎەنۊ،"مدرامانەکۍ سەڎ ساڵی ویەرڎەو گەلوو کورڎی، بە مەڵامەتو جاشایەتیۊ سەرکوت کریېنۍ". ۋاتیچش: بە هامکاری پەدەکەی هجوم کریۊنە سەرو گەریلاکا ئازاڎیی کورڎسانی، بە ئامانجو ئانەی دەسکۊتەکۍ کۊشیای ٤٠ ساڵی ویەرڎەی دلېنەبریا.
جەدەکە-سە تەئکیدش کەرڎۊ،"کورڎ ڕا مەڎۊ ئا دەسکۊتۍ کە ماوەو ٤٠ ساڵا ویەرڎەینە بە کۊشیای دەس وزیېنۍ، دلېنەبریا". داواش جە پەدەکەیچ کەرڎ دەموودەس دەس چا مامەڵەو هەڵۋېساشە هۊرگېرۊ.
جەدەکە-سە ئاماژەش پۍ ئانەیچ کەرڎەن،"جە تەماموو دنیېنە کورڎ بە جۊشو خرۊسۍ فرۊ ساڵیاڎو هەڵمەتەو ١٥ و ئابی مبارەک کەرۊ. بەڵام جە پانیشتوو کورڎسانی، ئاژاوەگېڵیەکۍ دەورو خەتەو خیانەتو پەدەکەینە ۋەردەوامېنۍ، ئانەیچ دژوو سەڎ ساڵی ویەرڎەو گەلوو کورڎین. جە ئاکامو هامکاری و خیانەتکەرڎەی چنی دوژمنی، فرەو مدرامانەکا پېسە کۊچگیری، شېخ سەعید، ئاگری و دەرسیمی وەڵۍ ئانەی بە سەرکۊتەی بیاۋا سەرکوت کریۍ.
جە درېژەو ئەرەیاوناکەینە ئامان، بەسیاسەتەکا ئارۊو پەدەکەی، حۊل مڎریۊ دەسکۊتەکا ٤٠ ساڵی ویەرڎەو کۊشیای دلېنە بریۊ، بەڵام ئیتر کورڎ مەتاۊ ۋەران ۋەر پانەی حەوسەڵەش درېژ بۊ. هجومەکۍ پۍ سەرو گەریلای جە پانیشتوو کورڎسانی بە ئاگاڎیی پەدەکەی مایۍ قەبوڵ کەرڎەی نیا.
جەدەکە-سە ئاماژەش پانەیچ کەرڎەن، دما قسۍ عەلی عەونی، ۋەرپەرسۍ پەدەکەی بانگەوازېن پۍ وەش کەرڎەو جەنگی بەینو کورڎانە.
جە دمادمایی ئەرەیاوناکەینە ئامان، چی وەختەنە کە جە سایەو جمیەری ئازاڎیی کورڎیۊ دەسکۊتۍ بەدەس ئامېنۍ و کورڎ یاگۍ ۋېش دلۍ تاریخینە کەرڎەنۊ، بە ڕای گرڎیش ئەرەیاۋنمۍ، کە حەجگیز ئی خیانەتەیەو هامکاری کەرڎەی هجومەکا قبوڵ مەکەرمۍ. داوا جە پەدەکەیچ کەرمۍ دمایی بە هەڵۋېسو هامکاری و خیانەتی بارۊ''.
هـ.ش
