بارەگاو کەنەکەینە جە بڕۊکسل و پایتەختوو بەلجیکای، جەمۊبیەی پارتوو لایەنە کورڎیەکا دەسش پنەکەرڎ و ڕووەدایەکۍ کەرکوکی و دېرەزوری و ئاخېزوو ژەنی، ژیای، ئازاڎیی مژاری ئەساسی جەمۊبیەکەی بېنۍ.
ئارۊ یەکشەممە ٣/٩/٢٠٢٣ ، جە بارەگاو کۊنگرەی نەتەوەیی کورڎسانی(کەنەکە) جە بڕۊکسل و پایتەختوو بەلجیکای، نوېنەرۍ ٣٥ پارتوو لایەنۍ سیاسیۍ و مەڎەنیۍ حەرچوار پارچەو کورڎسانی جەمۍ بیېوە.
جەمۊبیەکەی کە چېرو هەیمەنەو کەنەکەینە ملۊڕاوە، بە دەیەقېوە مدرای پۍ گیانوو پاکوو گەشمەرڎا دەسش پنەکەرڎ.
دماتەر بەرنامەو جەمۊبیەکەی دیاری کریا کە پېکئامان جە:
-ڕووەدایە گېرەشېونیەکۍ کەرکوکی و دېرەزووری
-ئاژەو کورڎسانی بە گرڎیی و ئاڵنگاریەکۍ ۋەرودەموو پەرسوو کورڎی
-فاڕیایە تازەکۍ جە کورڎسان و مەنتیقەکەو جەهانینە
-نزیک بیەیۊ جە ١٦ و سېپتەمبەری یۋەمین ساڵیاڎوو ئاخېزوو ژەنۍ ، ژیای، ئازاڎیی، جە ۋەرکەوتوو کورڎسانی و جەهانی
-شۊنیرەلۋای پۍ ڕاسپاردەو قەرارەکا کۊنگرەو ئی دماییە و لۊزانی
-ئاژەی نادیاروو ڕابەر ئاپۊی.
جە ئیسەنە سەروو ڕۊژەڤی دیاری کریای گفتوگۊی چڕ کریۊ نوېنەرۍ لایەنە بەشڎارەکا پەیلۋاکا ۋېشا و ڕاو چارەسەری چا بارۊ بەربڕا.
هـ.ش
