بەرلینو پایتەختو ئەڵمانیاینە بۊنەو ٣٢ەمین ساڵیاڎو کۆمکوژی مادماکیۆ، هێزی ڕاپیمایې جەماوەری ئەنجام دریا. ڕاپیماکەی بە سەرمەشقایەتی جەمخانەو-گلېرگەی عەلەوی بەرلینی ڕێکوزیا و جە ڕاپیماکەینە ئەنداماو ئەنجوومەنو ژەنا دەست دان-هێڤی، ناڤ بەرلین، یەژادە-بەرلین، دیدف و یۆبیەی بەرلینو جەهەپەی بەشدارې بېنې.

هاموڵاتیا کورد و تورکی جە مېڎانو هێرمانپلاتزینە کوې بیێوە، تاوەکو مېڎانو ئۆرانیەنپلاتزی ڕاپیمایشا کەرڎ و ئەرەیاۋنێوە ۋنیاوە.

جە ئەرەیاۋناکەینە ئاماژە پانەی کریا سەرەڕاو ۋېیەرنای ٣٢ ساڵا سەرو ئا قۆمیایەی کە جە ٢ې تەمموزو ١٩٩٣ ڕووەشدا و پېسە "کۆمکوژی مادماک"ی کۊت دلې تاریخی، بەڵام هەڵای بە ئێشې قووڵۆ ئینا ویرو گلېرگەینە.

هەرپاسە جە ئەرەیاۋناکەینە ئاماژە پانەیچ کریا کە چا کۆمکوژییەنە ٣٣ ڕۆشنۋیرې و ٢ کۊششکارې هۆتێلەکې گیانشا جە دەسدا و وچیا: "تاوەکو دادپەروەری بە دی نې، ئی ئێشەیە جە یاڎ نمەکەرمې و نمازمې یاڎەنە بشۆ."

هامسەرۆکو دی لینکو بەرلینی کەرسن والتەر قسێش کەردې و ئاماژەش پانەیە دا کە کۆمکووژی مادماکی تەنیا قۆمیایې تراژیدی نییا، ئی کۆمکوژییە ۋەرو چەما دۆڵەتاوە ئەنجام دریا و واتش: "جە کۆمکوژییەکەو مادماکینە ٣٣ هونەرمەڼې، ڕۆشنۋیرې و عەلەویې بە زیڼەیی ئېرشا وەردریانە. ئینە ڕووەدایې نەبې. جە تورکیانە هەوڵمڎریۆ پاسە نیشانە بڎریۆ، بەڵام ئینە کۆمکووژی بې."

جە نوێنەراو دەم پارتی جە ئەڵمانیا، سبەل ئیگیتالپ ئاماژەش پانەیە کەرڎ ئا کەسې جە کۆمکوژی سێواسینە گیانشا جە دەسدا، بەهای هامبەشو گەلانې و واتش: "ئەرکو ئێمە ئانەن کە جە ۋەرا ۋەرو ئی زوڵمەینە مردمېوە. جە هەلومەرجو جەنگی سەختو ۋەرکۊتوو مېیامینینە، تاوەکو کورد، تورک، عەلەوی، ژەنی و باوەڕییە جیاجیاکې پێوەرە مامەڵە نەکەرا ئی زوڵمە بەردەواما، بەڵام ئەر پێوەرە بیمې متاومې ئی زوڵمەیە مردنمې."

دماو قسەکا چالاکییەکە بە واتەیۆ درووشمەکا دمایش پنە ئاما.