مەزڵوم (ژیر باز) جە ١٠و ئایاروو ١٩٩٢ێنە دەگاو پەیانسەو جۊلەمێرگینە بنەیانێوە وەڵاتپارێزن و دڵسۊزوو وەڵاتەکەیشانە پەیدا بی، یەرەم زارۊڵەو بنەیانەکەیشا بۍ جە پەنج زارۊڵا. ئامادەیی پیشەسازیی بەشوو کارەبێش تەمامنا، حەوڵێش دۍ هامکاریی بنەیانەکەیش کەرۊ. سەروو پایاو وێش ژیوا و پێسە بەرڎەوام بی.  مەزڵوم بە بەشداربییەی برێوەش پەی دلۍ ڕیزەکاو گەریلای و  بۊنەو گەشمەرڎەبییەی مامۊزێوەیچشۊ بە نامۍ ئافات-یوە جۊلەمێرگنە ساڵەو ٢٠١٠ کاریگەریی فرەش سەرۊ نریابێرە. وەروو ئانەیە بنەیانەکەشانە گەریلا و هەم گەشمەرڎێشا بێنۍ، جە زارۊڵەییوە پەکەکە و ڕابەرایەتییش ئشناسۍ و کاریگەر بی پەنەشا. تا بتاوۊ سیاسەتوو جینۊسایدوو دوژمنی سەروو گەلەکەیماوە ورشانۊوە و ڕێکوستەی گەلەکەیما قەوەت کەرۊ، پەی ماوێوە فرەی  بەشدارییش دلۍ خەباتوو گەنجانە کەرد.

حەرمەیڎانێوەنە بە کاریگەریی وێش سەروو خەڵکیوە، بەتایبەتییچ سەروو هامڕایاش، بی بایسوو ئانەیە بڕۍ جە هامڕایەکاش بەشدارۍ با. مەزڵوم جە  هەرمانەکاو شارینە بە هەڵوێستی سەرمەشقانە و ڕێکوستەی کاریگەرییش سەروو خەڵکیوە نیارە، پەوکای دوژمنی بە ئامانج گێرت. ساڵەو ٢٠١١ینە زیندان کریا. دماو یەرۍ ساڵا مەنەیۊ زیندانوو دوژمینە، مەزڵوم قەرارش دا وەروو ئانەیە بتاوۊ وەرپەرچوو گۊشەگیریی سەروو ڕابەروو گەلوو کوردی عەبدوڵڵا ئۊجالانی بدۊوە و ڕەخنەدای وێش پێشکەش کەرۊ، ڕووە کەرۊ کەشی و بەشداری جە ڕیزەکاو کۊشیای ئازادینە کەرۊ. بکات. ئیتر ڕووەش کەرڎە کەشەکاو کوردستانی، کە وەشێش گەرەکۍ بێنۍ و پەنەشا سەرسام بۍ. مەزڵوم کە ئامانجەکەش ئارڎەبۍ دی، تا هەنگامۍ قەوەتۍ بنیۊ کەشۊ نامۍ وێش نیا ژیر و ئیتر پێسە ژیر بازی ئشناسییا.

ژیر جە ٢٠١٤ەوە تا ٢٠١٨  خواکورکنە گەریلایەتییش کەرد. دلۍ ڕیزەکاو گەریلاینە حەرمەیڎانێوەنە مەنێوە و هەرمانەش کەرڎۍ، بە گیانبازی بەشداریی کەرۍ کرد و بە ورسونیشت و مامەڵەی دروسیش بی بە جەنگاوەرێوە ئاپۊیی نموونەیی. کەشەکاو کوردستانینە تا زیاتەر وێش ئشناسا، بی بە ساعیبوو هەڵوێستێوە مانادارتەری و یاواینەتەری. کەش پەی ژیری ئا یاگۍ بۍ، کە پێسە ئەڎێوە باوشیش پەی کەرڎەبێوە، پارێزنێش، گەورە و قەوەتش کەرۍ. وەروو ئانەی پێسە چەنی کەش ئادی پارێزنۍ، ئادیچ قەناعەتش چانە بۍ کەمشۊم کەشەکا پارێزنمۍ.

یاگۍ وێشەنە بێ

ژیر فرە حەزش جە کەشەکا بۍ، پەوکای کە گێڵێشا پۊرە و هەنگامۍ نیۍ دڵوەش بۍ، پێسە دەروێشێوە کەشۊ ژیوۍ، یاگۍ وێش دیێبێشۊ.. بەتایبەتی وەختێوە جیاوازیی بەینوو ڕەفاقەتوو کەشی و ڕەفاقەتوو دلۍ سیستمیش دی، زیاتەر بی بە دڵسۊزوو ئا هەوارگەیە. ژیر باز ئەکادیمیاو گەشمەرڎە ماهیریش بە قووڵبییەیۊێوە تاکتیکی پێسە سابۊتاژڤانێوە پسپۊڕی تەمامنا. دماو تەمامنای بواروو سابۊتاژیوە هەستش کەرد، کە تەنیا بە چەکەکەیش متاوۊ بۊ بە جوابوو ئامانجوو ئازادیی گەلا و ئازادیی جەسەیی عەبدوڵڵا ئۊجالانی. پەی خزمەت پا ئامانجەیە قەوەتتەر نەما چەکەکەیش. بە ڕەنج و مانیایێوە گەورەوە مامەڵەش چەنی گردوو هەرمانە و وەرپەرسبییەێوە ڕێکوستەینە کەرد، پا یاواینەوە  بەشدارییش کەرد. دلۍ ڕێکوستەینە فەرماندەیی تیمیوە تا دابینکەرڎەی پێڎاویسیی لۊجستی هامڕایەکاش بەچەنەویەرڎەییوە بەشدارییش گردوو خەبات و هەرمانەکاو وەشکەرڎەی تونێلەکاو جەنگینە کەرد.

جە ساڵەکاو ٢٠١٥ و ٢٠١٦ینە وەختۍ هەرمانەو تونێلەکاو بەرەکاو جەنگی کەرۍ، بۊنەو ڕووەداێوە سەرە، شانە و قاچش بریندارۍ بیۍ. وەلۍ برینەکێش نەکەرڎۍ بە وەربەس وەرڎەموو بەرڎەوامبییەیشنە. جەنگاوەرێوە چانە بۍ کە دلۍ هامڕایاشنە یاگۍ وەشەسیای و ڕێزی بۍ. ژیر باز هەمان وەختنە ساعیبوو ئا هونەرەیە بۍ، کە ڕەفێقەکاش دەورشنە کۊ کەرێوە. دلۍ ژیوای پارتەکەیشنە سەرمەشق بۍ. جەنگاوەرێوە بۍ کە ئازایانە لوۍ سەروو دوژمنی.

ژیر فرە بە ژیوای گەریلایەتی و گەشمەرڎەبییەی هامڕایەکاش کاریگەر بۍ. وەرڎەموو هەقیقەتوو گەشمەرڎەبییەیشانە بەرڎەوام حەوڵۍ دۍ لایەقشا بۊ و کەسایەتیی وێشەنە هاگاش چەنەشا بۍ. ئانەش پەی وێش کەرڎەبۍ بە پیمانە. وەرڎەموو گەشمەرڎەبییەیشانە ورەش نەوەڕۍ و قوەش کەم نەبێوە، دایمە حەوڵێڎۍ هەقەشا کەرۊوە. ژیر کە ساعیبوو ڕۊحێوە گیانبازانەی بۍ کەشۊ چەنی ڕابەر ئاپۊی، گەلەکەیش، هامڕایاش و کوردستانی پەیوەندیی قەوەتش نیارە و دڵش پا ژیوایۊ بۍ. ژیر باز بە بییەیش بی بە هۊمیدوو خەڵکەکەیش. جە ٧وو تشرینوو یوەموو ٢٠٢٠ینە، هجوومێوە عاسمانیی دەوڵەتوو تورکی فاشیستینە هەرێمەکاو پارێزنای مێڎیاینە گەشمەرڎە بی.

س.ز