هامسەرۆکو شارەوانی دێرسیمی بیرسەن ئۆرهان کە دەس سەرو ئەرکەکەیشەرە گیریان و قەرارو، گێرتەیش دریا بۍ بە داواکاری زینانی کەردەی رەوانەو دادگای کریابێ و دادوەریچ قەرارو دەس بەسەرکەردەیش جە یانەنە پەی بڕیەنۆ.

دماتەر بیرسەن ئۆرهان چنی جەماوەری لوا وەردەمو بیناو دەم پارتی جە دێرسیمەنە چا کۆنفڕانسێ رۆنامەوانیش بەست.

بیرسەن ئۆرهان ئانەش وست ڕووە کە قسەکێش پێسەو تاوانێ نیشانە دریێنێ، بەڵام ئا قسێ راسێنێ و حەجگیز دەس جە واتەو راسی هۆرنمەگێرۆ. بیرسەن ئۆرهان واتش، "بەڵێ جە ساڵەو ١٩٣٨ مەرگەساتێ سەرو ئی گەلەیرە ئاما. ئارۆیچ ئی گەلە ئینا دلێ مەرگەساتینە. پێسە چنین جە ساڵەو ١٩٣٨ مرۆڤەکێما جە یاگێ و ماواو وێشانە هۆرۍ کنیۍ و ئاوارێ کریێ، مرۆڤەکێما جە ناوەندەکا ئایین و کلتورو وێشانە جینۆسایدۍ کریێ، ئارۆیچ هەمان چێوشا کەرد. کەس نمەتاۆ نکۆڵی چانەیە بکەرۆ. دماو قەیوومەکا ساڵەو ٢٠١٦ بە دەیان هەمڕێما سەرو هەرمانێوە لا دریێنۍ. فرەیشا ناچارێ کریێ جە وڵاتەنە کۆچ بکەرا. گەرەکمانە ئانەی واچمێ؛ یۆ چا کایە و بوارا ئی سیستمە هجومش مکەرۆ سەر سیستمو هامسەرۆکایەتیا. قەیوم هجوم مکەرۆ سەرو دەسکەوتەکا ژەنا.