چالاکۍ، ڕۊنامەنویسۍ و ئازاڎیوازاو هەولێر، سلێمانى و هەڵەبجەی، دژوو سزادایۊ شێروان شێروانى و گیریایای تەروو بادینانی کوۍ بیێوە و ئەرەیاوناشا، کابینەو نۊیەموو حوکمەتوو هەرێمینە، ئازاڎى ڕابەروستەی و ڕۊنامەوانى پاشەکشێش فرێش کەرڎێنە.
هیزی وەرڎەموو دادگاو هەولێرینە، بەشێوە جە ڕۊنامەنویسا و چالاکا، کۊبییەیۊیۍ ناڕەزایەتییشا کەرد،جە کۊبییەیۊکەینە فەرمان ڕەشاد، بە نامۍ بەشداربییاوە بەیاننامێوەش واناوە و دلێشەنە ئامابۍ، گرد لێوە هاگادارۍ کەرمێوە، بەرڎەوامیی ئی دۊخەیە و ئا گردوو پاشێلکارییاو دەسەڵاتوو هەرێموو کوردستانی، پاسەما پەنە کەرۊ بەرڎەوامۍ بیمۍ جە هەرمانکەرڎەی پەی فراوانکەرڎەی ناڕەزاییەتییەکا و گێرتەیرەوەروو گرد ڕاوشۊنێوە پەی یاونای دەنگیما و دماییئارڎەی پی دۊخەیە.
ئەئانەیچە وزیان ڕووە، سزادای شێروان شێروانی و ئازاڎنەکەرڎەی گوهدار زێباری، تازەتەرین زنجیرەو خراپبەکارئاردی یاساێن دژوو ڕۊنامەنویس و چالاکا، بە نۊعێوە دەسوستەینەی سیاسیی بەڕۊشنی چی کەیسەنە دیارا و ئامانج چەنەش ئاستەیۊ شێروانی و گوهدارین، پەی ماوێوە زیاتەری.
ئاماژە پانەیچە کریابۍ، هەرێموو کوردستانی پاش نیان قۊناغێوە خۊفناکۊ جە زەوتکەرڎەی ئازاڎییەکانە و بە ئەندازێوە فرە دۊخەکە بەرەو سیستمێوە دیکتاتۊریی ئەمنیی هەنگامە منیۊ.
هاموەخت حەر هیزی، وەرڎەموو دادگاو سلێمانینە، دەسەو داکۊکی جە ئازاڎی و ژمارێوە فرە جە ئازاڎیوازا، کۊبییەیۊیۍ ناڕەزاییشا کەرد.
لاو وێچشاوە بەشێوە جە چالاكا و ڕۊنامەنویسا وەرڎەموو دادگاو هەڵەبجەینە، کوی بیێوە و واتشا، جە ئەوەڵوو دەسبەكاربییەی كابینەو نۊیەمیوە، سەرەڕاو وەعدەکاو خاسازیی و فراوانكەرڎەی پانایی ئازاڎیی ڕابەروستەی، دۊخوو مافوو ئینسانی و ئازاڎیی ویروڕای و ڕۊنامەگەری و هەرمانۍ ڕێكوزیایۍ، جە هەرێموو كوردستانینە، كە كۊڵەكۍ حەر سیستمێوە دیموكراسینە بە فرەیی ڕووەش جە پاشەكشۍ كەرڎێنە.
پارێزگاو دهۊکیچنە هێزە ئەمنییەکۍ ڕاشا گێرتە جە کۊبییەیۊ چالاکا و ڕۊنامەنویسا.
ئی ناڕەزایەتییۍ ئینۍ وەختێوەنە بنەیانەو گوهدار زێباری، زیندانیکریاو بادینانی جە ئەرەیاوناێوەنە ئاماژە پانەیە مدا، ڕوەبەرایەتیی ئاسایشی گردینوو هەولێری ڕاگێری جە فاڕایۊ قسا و بەڵگەنامەکاو گوهدار زێباری کەرۊ و ڕەزامەندییش نەدان کیانیۊ پەی دادگا.
بە پاو زانیارییەکایچ تا ئیساتۍ گوهدار زێبارى بۊنەو پاشێلکەرڎەى مافەکاش و ئازاڎنەکەرڎەیش مانیش جە وارڎەی گێرتێنە.
س.ز
