بە سەرمەشقایەتی پلاتفۆڕمو ئاشتی و ئازادی ئەورووپای (EFFP) شاندێوە کەسێ جە ٣٩ کەسایەتیا پێک مێ بە مەبەسو ئەنجامدای دیداری چنی ڕابەر ئاپۆی جە چن ڕۆی ئایندەنە مەیا ئەستەنبوڵو گۆرە شارو تورکیای.
پلاتفۆڕمو ئاشتی و ئازادی ئەورووپای (EFFP) پەی هامکاری و برەودای بە چارەسەری دیموکراتیکانەو پەرسە و کوردی و پرۆسەکەی کەمپینو 'گەرەکما دیدار چنی عەبدوڵا ئۆجالان بکەر'ـ سەر و ئاستی مییاننەتەوەیی دەسش پنەکەردەن، پەی ئی مەبەسەیە جە قۆناغی یوەمەنە کەسایەتی کاریگەر سەر و ئاستی مییاننەتەوەیی و وڵاتا ئەورووپای بە پەڕکەردەیۆ داواکاری داوا جە وەزارەتو دادو تورکیای مکەرا بلانە دوورگەو ئیمراڵی و دیدار چنی ڕابەر ئاپۆی بکەرا. پێسە و هەنگامێوە جە چن ڕۆی ئایندەنە شاندێوە ٣٩ کەسە جە ئەرووپاوە مەیا ئەستەنبوڵ.
شاندە ٣٩ کەسییەکە کە پێکئامێنێ جە؛ ئەکادیمی، ڕۆنامەوان، نوویسەر، سیاسەتمەدار، یاساناس و سەندیکاوان ڕۆو ١ و ٢ـی تەمووز مەیا تورکیای و جە ئەستەنبوڵە زنجیرێوە ئەرەنیشتەی ئەنجام مرانە.
قەرارا شاندەکە بە یاوا تورکیا، سەرەتا جە ١ـو تەمموزینە سەردانو نوسینگەو یاسایی سەدساڵە بکەرۆ کە پێسە و نوسینگێوە یاسایی هەرمانە و پارێزنەری جە دۆسیەو ڕابەر ئاپۆی مکەرۆ.
هەرهەمان ڕۆ شاندەکە سەردانو ڕێکوزتە و ئەستەنبوڵو دەم پارتی مکەرۆ و دماتەر چەمشا گنۆنە بە هامسەرۆکو گرڏی دەم پارتی تونجەر باقرخان.
ڕۆی دماتەر کە کەرۆنە ٢ـی تەمموزی گفتوکۆ و گلێرۆبییەکا شاندەکەی بە ئەنجامدای مێزگردێوە جە تەلارە و تەقسیمی بەردەوام بۆنە و جە مێزگردەکەنە پەیوەس بە چارەسەرو پەرسە و کوردی و دەرفەتو هامکاری مییاننەتەوەیی گفتوگۆی کراوە ئەنجام دریۆ. جە میانو مێزگردەکەینە چەنین بەهێزکەردە و کەناڵەکا سیاسەتو دیموکراتیکی و دیدگاکا چارەسەری ئاشتیانە هورسەنگیۆنە.
قەرارا جە دما و گلێرۆبییەکەی و سەردانییەکێشا بەنامێ شاندەکەی ئەنجامنامێوە هامبەش وەڵاکریۆوە. شاندەکە دما و ئەنجامدای گلێرۆبییەکەی تورکیای جیا مازا و گێڵاوە پەی ئەورووپای.
