ئەرداڵ شاهین قۆناغ و ئامانجوو چالاکیەکەیش بە شێوەو گوزارشتېوە بە تابوروو نەمران و گەشمەرڎە زیلانۍ ئەرەیاۋنان و ۋاتەنش: "حەر زیندەوەرێوە کە مانا بە ژیۋای بڎۊ، پەی زەریفیەکا ۋېش بەخت کەرۊ. منیچ پۍ ئانەی بتاوو مانا بە گرڎوو جوانیەکا بڎە و پارېزنوشا، گەرەکما ۋېم فیدا کەروو".

نامەو ئەنڎاموو تابوروو نەمرانی گەشمەرڎە زیلانۍ پی جۆرەنە:

"ئا قۆناغۍ ئێمەش ئینایمۍ چنە تاریخی، هەستیار و ژیۋاییەنە، پۍ گرڎیما ڕېوە دیاری کەرۊ کە چنی پۊرەشەرە ۋیەرمۍ، چنی قەراری تازە بڎەیمۍ و هەڵوێستما جە وەران ۋەروو راسییەکانە بە شێۋېوە ڕۊشن نیشانە مڎۊ. ئی قۆناغۍ قۆناغێوەنە کە چ راس و چ غەڵەت، مشۊم راسییەکا جە یۊی جیاکریاوە و بە وردی مردایشا سەر کریۊ. ئا قۆناغۍ کە ئێمە ۋەرکەوتوو میامینی پېسە گێژاوۍ پێناسەش کەرمۍ و چنەشەنە مژیومۍ، پۍ ئانەی دلۍ گێژاوېنە جە گێژاوۍ تەرەنە نەژیومۍ، مشۊم گرڎوو هەنگامەکاما راس و دروسۍ با، ستراتیجوو رێکوستەی چی قۆناغېنە بە عالی بیاومېنە، مشۊم هەنگامەی ئامانج دارە هۊرگېرمۍ.

پۍ ئانەیچ مشۊم سەرەتا ستراتیجوو جەنگوو رێکوستەی بە عالی درکش پنەکریۊ، ئا دوژمنەی ئێمە رووبەڕووش بیەیمۍ، قەراروو ئانەیش دان کە پەکەکەی و جە کەسایەتی ئاڎینە گەلوو کورڎی و گلېرگەکەیش قڕکەرا. مەڵامەتوو ئانەی دوژمن پەناش پۍ سیاسەتێوە چەپەڵی پا جۆرەیە بەردەن، بێگومان ئیراڎەی گۊرەو ڕابەر ئاپۆی و هەڵوێسوو قەرارداین. دوژمن ۋەروو ئانەی مزانۊ مەتاوۊ ۋەر بە شکستیش گېرۊ، چېشش جە دەس مۍ کەرۊش، پېسە ئانەی سەرەش بڕیابۊ، پەلەقاژېشەنە. وەختۍ تەماشەو سروشتیچ کەرمۍ ئانە دیارا جە گرڎ زیندەوەرێوەنە ملۊ وەڵېوە. وەختۍ وینۊ کە یاوان بە ئاخر، پەلامارەو دەوروبەری مڎۊ. ئاژەو هەنووکەیی دوژمنیچ تەعبیرا چانەی. رێکوستەی ئی جەنگیە کە ئێمەش ئینایمۍ چنە پېسە جەنگ و مەنەی و نەمەنەیۊ هۊرسەنگنان. جەلایېوە هەژموونی جەهانی کە نوێنەرە سەرەکیەکەش دەوڵەتوو تورکین گەرەکشا ئێمە دلېنەبەرۊ ، جە لایۍ تەرۊ پەکەکە و گەلە شکۆمەندەکەش کە دژوو گرڎ ئەرەگیرا بە شێۋېوە بێهامتا جەنگوو ئیراڎەی کەرا، بیەیشا هەن. ئینە راسیەکەن کە مشۊم فەرماندەکۍ جە جەنگوو ئی قۆناغە دژبەیۊینە هەنگامەی عالە بنیا، ستراتیج و تاکتیکی دروس دەسنیشان کەرا، ۋېشا پۍ جەنگی ئاماڎە کەرا، گرڎوو هێزەکەیشا پۍ جەنگی پەروەردە کەرا. " فەرماندەی ژیر و ئاماڎە وەڵۍ ئانەی بلۊ مېڎانوو جەنگیوە، جە جەنگەکەنە سەرگنۊ. فەرماندەی بێ ئاماڎەکاری گەرەکشا جە مېڎانوو جەنگینە سەرگنۊ". ئا ئاژە بەراسی کەم تا فرە گوزارشت جە جەنگی هەنوکەیی کەرۊ. جە دما دیڎارەکانە چەمڎاریۍ فرە گرنگ کە ڕابەر ئاپۆ بەردەوام بەرشبڕۍ بە ئێمەیش ۋات، "جەنگ شۊنەو فەرماندەیرە گېڵۊ". وەختۍ ئارۊ تەماشەو ئا مولاحەزەو ڕابەرایەتی کەرمۍ، جە کەسایەتی کادرەکانە پراتیکێوە ئەنجامگیر، کە ڕاوەبەر مەکریۊ، بەروزۊ. ۋەرو ئانەی پېسە پەنەوازی جە بارەو جەنگیۊ ویر مەکەرمېوە، ۋەروو ئانەی ستراتیجېوە پۍ ۋېما دیاری مەکەرمۍ و جە مېڎانوو جەنگینە ویرکەرڎەیۊ سەرکەوتەیما جە جەنگەنە هەن، ئێمە مەتاومۍ پراتیکی ئەنجامگر جابەجۍ کەرمۍ.

گرڎ سەردەمێوە سەرمەشقی ۋېش خوڵقنۊ. پۍ ئانەی سەرمەشقۍ سەرگنۊ و ئا ئامانجەی ئاردەنش ئاراوە جابەجېش کەرۊ، پەنەوازوو ئاڎی بە کەسانێوەن کە ڕاو ئاڎیی گېرانەوەر و دەس جە گرڎ چېوە هۊرگېرا. پۍ ئانەی سەرمەشق سەرگنۊ، ئامانجەکەیش دەسەبەر کەرۊ پەنەوازش پا ئینسانا هەن کە ڕاو ئاڎیرە هەنگامە بنیا و بۊنەو ئانەیچۊ دەسبەرداروو گرڎ چېوۍ با. ۋەڵاکەرڎەیۊ فەلسەفە و ڕابەر ئاپۆی و ئانەی تائیسە هامشێوەو ئا ڕابەریە نامان جەهانۊ ، هەرمانەو ئێمەی کادری. ڕابەرایەتی ۋاتەبېش: "ئانۍ گەرەکشانە چنی من هەنگامە بنیا، مشۊم پېسە عیسای (علیەالسلام) خاچەکەیشا سەروو مازیشاوە هۊرگېرا". بە بەربڕیەیۍ تەر، ئاڎ باسش جە پەنەوازیۍ بە تەمامی فیداکارانەی کەردەبۍ. پۍ ئانەیچ مشۊم وەڵۍ گرڎ چېونە ئێمە بە عالی جە رابەرایەتی بیاومېنە و جابەجېش کەرمۍ. ئینسان مەتاوۊ چېوۍ کە چنەش مەیاوۊنە، جابەجېش کەرۊ. ئەگەر پێکیچش بارۊ، بەردەوام بەشێوە کەم بۊ. رابەرایەتی پی جۆرە ۋاتش: "ئانڎەی جەمن یاودېنە جابەجېش کەرڎۍ". واتا باس جە وۍ بەختکەردەی گرڎی کەرۊ. ئێمە ئا پراتیکەی کە مشۊم ئەنجام نەدریۊ، ئینەیچ پېسە ئانەی جە رابەرایەتی یاۋېنېنە جماوە و پێکشمارۊ. ۋەروو ئانەی بە دروسی جە رابەرایەتی مەیاوانە جە ۋەران وەروو دوژمنینە جەنگېوە بەقوەت ڕاوەبەر مەکەرمۍ. بیەی وەڵتەروو تاکەکەسیما، نامای سەروو دیسپلینی، پانەگېرتەیرە سەروو سەرکەوتەی، بێهیوابیەی، مامەڵەی ئەزمونکارانە، جیای ئانەی سەروو جەنگی ڕشدۍ باوە بە قۊرتە ژیانییەکا وەڵۍ جەنگینە تووشوو چەقبەستەی با، بە مامەڵەی پەلە پەل پراتیکەکەشا بە نیمەو ناچڵ ئاستۊ، جە ۋیرکەرڎەیۊ ئەقڵیەتوو من و داواکارییەکا ئێمە پۍ ژیۋایۍ تاکەکەسی، مەتاوا ستراتیجی جەنگی دروسی وەڵۍ وزا. ستراتیجوو جەنگ و رێکوستەی دیارا. بە ئیراڎېوە بەقوەت، داواکاری جە جەنگەنە یاوۍ بە سەرکەوتەی، بیاونۊ بە سەرکۊتەی. ۋەروو ئانەی رێبازوو ئێمە پۍ ئامانجی جیان جە ئامانجەنە یۊ مەگېرمېوە. رابەرایەتی باسش جە هێزوو ئەقڵوو گلېرگەی کەردەبۍ. وەروو ئانەی ئێمە جابەجېش مەکەرمۍ جە دژوارینە مژیومۍ. ئامانج جە بەینوو ئێمەنە مەنەنۊ. ئا ناوەندەی کە گرڎما چنەشەنە یۊگېرمېوە رابەرایەتین. ئامانج یۊگېرتەی و ئامێتەبیەین چنئ رابەرایەتی. بەڵام غیرەت مەکەرمۍ کە ۋېما وزمۍ دلۍ ئانەیۊ. ئەگەر رابەرایەتی بەحرېوە کەوەی بێ کۊتا بۊ، پۍ ئانەی چا بەحرەیە نەبڕیەیمۍ، ئا بەحرەیە پیس نەکەرمۍ مشۊم هێزېوە کە چنی رابەرایەتینە جە ژیۋایۍ راسەنە بژیۋمۍ، نیشانە بڎەیمۍ. ئا بەحرە بەحرېوەن کە ئێمە جە چەپەڵیەکاما پاک کەرۊوە. غەڵەت یاواینە چانەی گەورەتەرین ناپاکین. ئێمە بەردەوام ماچمۍ؛ پەکەکە کەوېوە ئاێرینا، ئانۍ بە غەڵەت کەراشەنە سۊچا. رابەرایەتی پېسەنە زەریای. راس نەیاواینە جە رابەرایەتی و بەغەڵەت نزیکبیەیۊ جە ئاوۍ پېسەنە یۊی. چا ئاوېنە پەیوەسبیەیۍ بێ کۆتا هەن و ئا پەیوەستبیەیچە پەکەکەی مەرزنۊرە. کەس مەتاوۊ بەتەنیا سەرگنۊ، ئەگەریچ سەرگنۊ کەموکوڵیش بۊ. ماچا، لقېوە داری بە تەنیا زوو مەڕیۊ. وەختۍ زیاتەر جە چن چڵە دارۍ بەیا لاو یۊی هیج هێزێوە مەتاوۊ ئا پەیوەستبیەیە و یۊگېرتەیە ماڕۊ. یۊگېرتەی پەکەکەی جە بەحروو رابەرایەتینە پی جۆرەنە. حیچ هێزێوە مەتاوۊ ئا ئاوۍ وشک کەرۊ.

سەرگوزشتېوە هەن. سەرگوزشتەو دار و فیداییەکان. دار ۋېش فیدا کەرۊ پۍ ئانەی لقەکېش جە دژوارترین ئاژەنە گۊرۍ با، فیداکاریېوە گۊرە کەرۊ. جە زمسانەنە گەڵاو دارەکەی جە لقەکا باوە و پۍ ئانەی دارەکە سەردا نەبەرۊش ۋېشا بۊنەشۊ بەخت کەرا. ۋەروو ئانەی ئا کەسەی گەڵاکېش خوڵقانېنۍ دارەکەن. گەڵەکېچ جە وەران ۋەروو ئا فیداکارییەینە ۋېشا بەخت کەرا. ۋەروو ئانەی گەڵاکۍ مزانا کە دارەکە ئاینڎەو ئاڎیشان. مزانا ۋېشا پۍ دارەکەی بەخت کەرا، پۍ ئانەی گەڵاکۍ تەرۍ گەورۍ با. پەکەکە جمیەرېوە پی جۆرەنە. ئانەی ئێمەش یاونا بە بیەی ڕابەرایەتی بۍ. مشۊم ئێمە جە ۋەران ۋەروو ئی گەورەتەرین فیداکارییەینە گەورەتەرین فیداکاری کەرمۍ. پۍ ئانەی ئێمە بە ناوەندێتی رابەرایەتی یۊگېرمۍ، مشۊم ئێمە گرڎما بەرەو هەمان ئامانجی بلمۍ. مشۊم ئێمە دەسبەرداروو ئا ئامانجا نەبیمۍ کە بە ڕای جیاجیا میاوا بە ئامانج. ئەگەر جە گرڎوو ئەندێشەکامانە ئامانج ئامانجوو رابەرایەتی بۊ، ئێمە متاومۍ چا ناوەندەنە کوۍ بیمۍ. وەختۍ ئینیشا ماچوو، من حەجگیز ۋېم جەبەروو ئانەیۊ مەوینوو. ۋەروو ئانەی ئېمەیچ هەمان ئا غەڵەتا کەرمۍ. ئێمە جە غەڵەتەکا هەنترینیۊ دەرز هۊرمەگېرمۍ.

ئانەی پەکەکەی کەرۊ بە پەکەکە ئا تایبەتمەندییەنە کە دەرز جە غەڵەتەکا تاریخی هۊرگېرۊ و ئاڵاو مدرامانی نیمە شۊکیاوە هۊرگېرۊ. هێزی کۆمەڵایەتیش ماناڎار کەرڎەن و فاڕانش پۍ پەیوەندیېوە بەقوەتوو راسی. ئەگەر هێزێوە کۆمەڵایەتی ساز نەکریۊ، جە هێزوو پارېزناینە یۊبیەی نمۍ دی. چا یاگېنە کۆمەڵایەتیبیەی و راسی بیەیش نییا، گلېرگېوە پا جۆرە خوڵقیۊ کە کۆمەڵایەتیبیەی کەرۊ بە تاک گەرایی و لیبڕاڵیزەش کەرۊ، بێ ئیراڎەش کەرۊ. جە ئاژېوە پا جۆرەیچەنە خانەکۍ سەرمایەداری کە جە مەغزەنە سازۍ بیېنۍ سەرجە نۊ زینڎۍ باوە. گەورەترین دەرز کە من چی قۆناغېنە فێرش بیا، ئا جەنگەنە کە وەختۍ جەنگی راسی ڕاوەبەر کەری، مشۊم سەرەتا چنی رۆحوو وېت گژیەی. ۋەروو ئانەی گرڎ چېوۍ جە کەسایەتی ئینسانەکانە ساز بۊ. ئانەی ئینسانەکا بەرزکەرۊوە، ئینسان کەرۊ بە ئینسان وېشا. ۋەروو ئانەی مشۊم ئێمە بە گرڎ چېوۍ ۋېماوە، پا ئامانجۊ وېما بەخت کەرمۍ. پېسە هامڕا زناری ۋات، 'پۍ فیداکاری پەنەوازش بە بەختکەرڎەی تەمامەتی و کەسایەتیېوە سەرکەوتەی جە گرڎ ساتێوە ژیوای هەن؛. ئانەی هامڕا زنار یاوناش بە ئامانج، کۊشیای ئاڎیی ۋەران ۋەر بە رۆحی و قەناعەتی بێ کۆتاش بە سەرکەوتەی بۍ. ئیسە بەتایبەتی من، ئەگەر ئێمە نەتاومۍ بیمۍ خۊتان ژیۋایۍ بە رێبازو زناری، مەڵامەتەکەش ئا لاوازیەنە کە ئێمە ۋەران ۋەر بە ۋېما بەرمېش ڕاوە. ئێمە بە شێۋېوە دروس مامەڵە چنی ۋېما مەکەرمۍ. ۋېما هۊرخەڵەتنمۍ.

جە قۆناغی ویەردەنە یۊ چا مژارا کە بە قورسی سەرشۊ قووڵبیاوە، ئانەبۍ. جەنگېوە راس ۋەران ۋەروو ۋېم. ۋەختۍ ئا پرسیارۍ جە ۋېم کەروو، بە شێۋېوە عال جە ۋېم نزیک بووە. چنە ۋېم بەراس مزانوو. ئامانجوو من چېشا و لاوازیەکۍ کە مەیا ۋەردەموو ئامانجەکەیم کامېنۍ. بە دەسنیشانکەردەی تێبینیېوە حۊڵ مڎەو کە ئا کەمو کەسرۍ وەرودەم و ئامانجەکەیمەنە لەمپەڕېنۍ ماڵوونەشا. ۋەروو ئانەی ئا ئامانجەی گېرتەنم ۋەر گۊرەن. ئامانجوو من ئانەن کە ۋېم بیاون و بە پێودانگەکا جەنگاوەری گیانبازی. پۍ ئانەی ۋېم بیاونوو پێودانگەکا ژیۋایۍ راسی فرە حۊڵ مڎەو، پۍ ئانەی جوابدەرەوەو ئا چەمەڕاییا بوو کە رێکوستەی جە منش هەن حۊڵی فرە مڎەو، نەبوو بە بار بەڵکوو بوو بە یۊ چانیشا شانە مڎا ۋەروو باری، پۍ ئانەی بتاوو رەخنەدای پراتیکی ۋەڵتەروو ۋېم بڎەو من فرە بە بەقوەتی بەشدار بوو.

چا قۆناغەنە من عالتەر یاوانینە پۍ ئانەی بیاوو بە ئامانج ماوېوە فرە مردای کەروو. یاوای بە ئامانجی پەنەوازش بە پشوودرێژیۍ فرەی هەن. ۋەروو ئانەی نیایرەو بناغەی ڕاو بەرەو ئامانجی پشودرێژیا، دڵسۆزی و پابەنڎبیەی بە ئامانجی نیشانە مڎۊ. یاوانینە ئەگەر ژیۋای تەنیا هەنگامېوە بۊ، پەنەوازەن  پشوودرێژیېوە گەورە نیشانە بڎەیمۍ پۍ ئانەی ئی هەنگامۍ بڕمۍ. چونکی ئامانج ئینا ترۆپکوو ئا هەنگامانا. ئینسان قەناعتش بە حەر چېوێ بۊ، جە بەرزتەرین ئاستەنە رووبەڕووش بۊوە و بەدەسش مارۊ. من هەمیشە ئی بەرزتەرین ئاست و ترۆپکەیە پۍ ۋېم پېسە ژیۋایۍ زیلان ئاسای و ۋۍ یاونای بە زناری هۊرسەنگنوو. چونکی یاوانینە کە ئاکاموو پشوودرێژی ژیانێوە زنار ئاساین.

جە دماینە گەرەکما ئانەی واچوو، کە من ۋېم بە حیچ جۆرێ چا چېوا کە جە سەرۊ باسم کەردۍ، بە جیاواز مەوینوو. چونکی ئەگەر ئێمە نوێنەرایەتی گلېرگېوە کەرمۍ، گرڎما بەتایبەت من ۋەرپرسیارېنمۍ جە گرڎ چېۋۍ. پۍ گرڎوو ئا کەموکەسرا چی پرۆسەنە تەجرووبەم کەرڎۍ و پۍ گرڎ چېوۍ کە ۋەرپرسیاری ۋېمم بە یاگۍ نەیاونا، من ڕەخنەدای ۋېم مڎەو. وەعد مڎەو کە حۊڵی فرە بڎەو پۍ ئانەی بەقوەتتەر و بە ئیرادەتەر بوو بە بەقوەتی جەنگ کەروو پۍ تۆڵەسانایۊ جە گرڎوو ئا هەرمانا کە دوژمنی کەردېنېش.

ئێمە ئینایمۍ جەهانېوەنە کە کۆکوژی ڕووە مڎا، ئینسانۍ بێتاوانۍ سەروو دەسوو هێزە هەژموونوازەکانە کوشیا. ئی سەردەمەو ئیسەی سەردەموو کۆکوژی و دڕندەییا. جمیەرەکەما پۍ ئانەی دمایی بە زاڵبیەی ئی جەهانە تاریکەیە بارۊ دەسش بە کۊشیای کەرڎ. پۍ ئانەی بە دروسی ئی کۊشیایە ڕاوەبەرکەرمۍ، مشۊم بە گیانبازییوە کە رۆحوو راستەقینەو پەکەکەین جواب و ئی تاریکیە بڎەیمۍ.

هەزاران ساڵېن چی خاکانە ملۋېنان کەسۍ ژیۋایشا جە دەسدان. فرە سەرهۊردۍ ئامۍ ئاراوە. بە ملۋېنان کەس کە چۆکشا پۍ دوژمنی نەڎارە گیانوو ۋېشا بەخت کەرڎ. ئارۊنە ئی جەنگە دما شێوەو ۋېش گېرتەن وەر. ئا جەنگەی ئیسە کریۊ، جەنگوو دلېنەبەردەین. وەخت وەختوو ئانەین کە چی جەنگەنە بە شێوازوو دوژمنی مامەڵە چنی دوژمنی کەرمۍ. مشۊم ئێمە ئېشوو ئی جەنگەی کە جە کوردسانەنە بە گەلوو کورڎیش چەشا، پایشاش چەشمۍ. ۋېش جە ۋېشەنە ئیسە وەختوو ئانەی نییا پېسە ئینسانۍ مامەڵە چنی دوژمنی کەرمۍ. پەنەوازەن پاسەکەرمۍ گرڎما بە قووڵی هەست پی جەنگەیە کەرمۍ و چنەشەنە بژیومۍ و تەجروبەش کەرمۍ. دوژمن ۋەران ۋەر بە ئێمە بە گرڎ جۆرە دڕندەیی و وەحشیگەریېوە هجوم کەرۊ سەروو گەلی و هامڕایاما. تا ۋنەپەرسایۊشا چنی نەکریۊ، مەبۊ یەک جەنگاوەری ئاپۆیی بە ئاسوودەیی بژیۋۊ. ئێمە پەی گرڎوو گەلا چەوەسیای و ستەمونەکریای دەسما پی کۊشیایە کەرڎ. وەعدما دا کۊشیای ڕابەر ئاپۆی بەرەو سەرکەوتەی بەرمۍ. جە گرڎی گرنگتەر وەعدما بە گەشمەردەکاما دا. وەختوو ئەنەی ئامان ئەرەگیرا جە خاکەکامانە بەرپڕنمۍ. ئەگەر چانەینە سەرنەکەوتیمۍ حەجگیز تاریخ چنەما وەش مەبۊ.

مەنەنش...