هاکان فیدان کە بە بنەچە کورڎا، هاموەخت دوژمنێوە دڕنڎەو کورڎان، خەڵاتوو ‘خزمەتی شایستە’ یی دەوڵەتیش پنە بەخشیان،کە بێگومان ئی خەڵاتە ۋەرو ناپاکییش جە گەلوو ۋېش پنەش دریان

هاکان فیدان یۊن چا کەسا کە جە سیاسەتوو جەنگەرانی بەروو حکومەتوو ئاکەپەینە ئەرکدار بیەن، چونکی سەرۆکوو میتی بیەن، ڕێکوزو ئۆپەراسیۆنە نهێنییەکان، جە پیلانگێڵنای و هەڕەشانە پسپۆڕا، ۋەرپەرسا جە گرڎ کۆکوشیی و هجوم و ئەرەگیریەکانە کە کریا سەروو پانیشتو و ۋەرنیشتوو کوردسانی و جمیەری ئازاڎییوازی گەلوو کورڎی.

پېسە گرڎ وەختۍ دەسوو هاکان فیدانینە، مەلەفېوە حېقم و  نە فاڕیا هەن، کە ئینا سەروو گرڎوو مەلەفاکا تەریۊ، ئاڎیچ جەنگا دژ بە کورڎی و بەتایبەتی گەریلاکا ئازاڎیی کوردسانی.

پېسە کۆمیتەو پەیوەندییەکا کەجەکەی جە ئەرەیاۋناکەشەنە باسش چنە کەرڎەبۍ، وەزیروو بەرو تورکی کە بە ئەرەگیرکەرڎەو خاکوو عێراقی ١٠٠ بنکۍ سەروازی و ناوەنڎۍ میتیش کەرڎېنېوە، بە بێ ئانەی شەرم جە ۋېش کەرۊ باس جە یەکپارچەیی خاک و سەروەری عێراقی کەرۊ.

فیدان گەرەکشا ئەرەگیری سەروازی تورکیای دلۍ خاکوو عێراقینە جەلاو عێراقیۊ ئاسایی کەرۊوە و پاسەکەرۊ کە قبوڵش کەرا.

تورکیا کە هۊلێرش جە روو سیاسی، سەروازی و ئابوورییوە پېسە ویلایەتێوە تورکیایش پنەکەرڎەن، بێدەنگی حکومەتوو پانیشتوو کورڎسانی، دەوڵەتو عێراقی و نەتەوەیۊگېرتەکا پېسە فرەسەتی و دەرفەتی مۋینۊ، گەرەکشا ئا سیاسەتەیە ۋەڵاکەرۊوە و ئەرەگیری ۋېش جە کوردسان و خاکوو عێراقینە جە ڕاو 'دیپلۆماسی'وە بە هەمیشەیی کەرۊ.

هاکان فیدان کە بە پیلانگێڵی و ئاژاوەگێڵی ئشناسیان و پۍ ئەرەگیرکەرڎەو سوریای ۋاتەبېش، 'ئەگەر پەنەواز کەرۊ جە سوریاوە چن موشەکۍ منیەو خاکوو تورکیایۊ'، ئیساتۍ بە نامۍ تورکیایۊ هەرمانەی 'دیپلۆماسی'یە کەرۊ.

هاکان فیدان کە شارەکۍ پانیشتوو کوردسانیش بە جاسوسەکا میتی و چەتە بکوشەکاش پەڕکەرڎېنۍ و بە ئەمرەکاش جە سلێمانی، شەنگال و مەخمورنە بە دەیان ئینسانېش تیرۆر کەرڎېنۍ، بە بێ ئانەی شەرم جە ۋېش کەرۊ باس جە کۊشیای هامبەشی جە دژوو 'تیرۆر'ی کەرۊ.

سەرۊکو ۋەڵتەرو میتی و وەزیروو بەروو ئیساتۍ تورکیای بە قسە پەڕ  جە درۆ و دەلەسەکاش و بە ۋاتەی 'تورکیا دژ بە داعشی کۊشیای گۊرە ڕاوەبەرکەرۊ' درێژەش پنەدا و پاسەش خیاڵا  کە پا دروا متاۋۊ جەهانی خەڵەتنۊ.

جە ١٠و حوزەیرانوو ٢٠١٤ینە وەختۍ داعش هورشکوا سەر و کونسولخانەو تورکیای جە موسڵ سەرکونسوڵ ئۆزتورک یڵماز و ئا تیمە تایبەتەی کونسوڵخانەکەی پارېزنېنۍ بە بۍ ئانەی گولېوە تەقنا ۋېشا دا دەسۊ.

ئا وەختە هاکان فیدان سەرۆکوو میتی بۍ. ئانەی کە بە سەرکونسوڵ و تیمە تایبەتەکەیش ۋات ' ۋەران ۋەر بە داعشی دەس نەکەراوە، ئێمە ئینایمۍ سەرو خەتیۊ' خودوو ئا کەسیە بۍ.

ۋېش جە ۋېشەنە چەتەکۍ داعشی کە جە ماوەو ١٠ دەیەقانە دەسشا سەرو کونسولخانەکەیرە  گېرتەبۍ دمابەدماو ئا هورکوای سەرو کونسوڵخانەی ئەرەیاۋناشا، 'ئاماڎېنمۍ چنی ۋەرپەرسا تورکی گفتوگۊ کەرمۍ'.

پەیوەنڎیەکۍ تورکیای و داعشی کە چا وەختۊ دەسشاپنەکەرڎ، ئیسەیچ جە ڕاو هاکان فیدانی و میتیوە بە شێۋېوە ئاشکرا ۋەردەوامېنۍ.

ئا نەوتۍ عێراقی کە دزیۊ و جە ڕاو تورکیایۊ رەوانەو بازاڕی کریۊ، یۊن جە هەرمانەکا هامکاری بەینوو دەوڵەتوو تورکی و داعشی.

چا مژارەنە بەڵگۍ و دیمەنۍ فرۍ پۍ رای گرڎیی ۋەڵاکریېوە.

ئا وەختەی هاکان فیدان سەرۆکوو میتی بۍ، بە هامکاری دەوڵەتوو تورکی و داعشی بە دەیان کۆکوشیۍ و هجومۍ ئەنجامدریۍ، ئەنجامدەرۍ راسەقینەو ئا هجوما حەجگیز نەگیریۍ.

ئینە جیا چانەی ٢٠٠٣ بیەن بە سەرۆکوو ئاژانسوو تیکای کە ساڵانێوەن ئا ڕێکوزیا جە هەرېموو کوردسانی بەنامۍ هامکارى زارۊڵا و گەنجا و کەرتوو پەروەردەینە، پەیوەنڎیی چنی گەنجا ۋەشکەرۊ و گەرەکشانە کەراشا جاسوس بەتایبەت چا مەنتیقانە کە تورکمانېش چنە مژیۋا پېسە کەرکوکی و هۊلێری و خانەقینی و تەلعەفەری.

ئامانجی ئەساسی سەردای هاکان فیدانیچ پۍ بەغڎای و هۊلێری کە بەنامۍ وەزیروو بەریۊ ئەنجامش دا، ئانە بۍ کە ئەرەگیری تورکیای سەروو خاکوو عێراقیۊ نەبۊ بە یاگۍ مشتومڕی، جیای ئینەیچ سیاسەتێوە پا جۊرە گېرۊنە ۋەر کە پانیشتوو کوردسانی کەرۊ بە ویلایەتێوە تورکیای.

چنی ئانەیچ داواش کەرڎ، کە سیاسەتوو تیرۆری و هجومەکا پۍ سەروو سلێمانی، شەنگالی و مەخموری درێژە پنەبۊ.

هـ . ش