موراد کاڵماز هامسەرۆکو ئیستەنبوڵو دەم پارتی ، سەرو سیاسەتەکا قەیومی دەسەڵاتداری و هەرمانەکا دەم پارتی ئەستەنبوڵی جە دژو قەیومی پەی ئاژانسو فوراتی هۆرسەنگنایش کەرد.

 موراد کاڵماز ئاماژەش پانەیەکەرد، نریارەو قەیومی جە شارەوانیی ئەسەنیورتی کودەتێوەن جە دژو هامپەیمانی شارەکەی و ئەرەیاوناش، ئیسە هەمان سیاسەتو قەیومی جە وەرنیشتەنە ملۆ ڕاوە. موراد کاڵماز واتش: "وەڵتەرێ قەیوم جە دووێ سەردەمەنە جە کوردەسان نریێرە، ئینە جاری یەرەما، ئیجارەشا یەکەم قەیوم جە جۆلەمێرگەنە نریارە، دماتەر جە ئەسەنیورت، ئێلح، مێردین و خەلفەتی نریێرە، مەڵامەتو بنەڕەتی پەی ئانەی دۆڵەت دەس بەهەرمانی چانێ کەرۆ جە ئەسەنیورت ئانەن؛ چاکە هامپەیمانی شاری دروس بیی، بە تایبەتی پەی یەکەمجاری کورد جە ئەستەنبووڵەنە بیێ بە خاوەن قسێ وێشا.

نمەتاوا بییە و دەسکەوتو کوردی قبووڵ بکەرا جە وەرنیشتەنە

کاڵماز ئاماژەش پانەیەکەرد، دەسەڵاتداری بەتایبەتی بییەو کوردی جە شارەکا وەرنیشتینە پنەش قبووڵ نمەکریۆ و واتش: "وەڵێ گرد چێوێ میدیاکا دەسەڵاتی دماو هۆرچنیەی هەوڵشادا بە تیرۆریس نیشانەشابڎا. ئینەیچ دەسوەردایێ بێ جە کوردەسانەنە، هەرپاسە گەرەکش نیا جە وەرنیشتەنە کورد چنی لایەنە جیاوازەکا هامپەیمانی دروس کەرۆنە، وەرو ئانەی دژو گرد جۆرە هامپەیمانیێوەنۍ و گەرەکشا نیا کورد بۆنە بە خاوەنو قسێ وێش".

ناڕەزایی نیشاندای جەهەپەی جە دژو قەیومی وەسێ نییا

کاڵماز ئاماژەش پانەیەدا کە جەهەپە پێسەو پەنەوازی جە دژو قەیومی کاردانەوەش نیشانە نەڎان و واتش: "جەهەپە ئا ناڕەزایەتیەیە کە نیشانەش مڎۆ فرە لاوازا. بە شێوێ تێرکەر ناڕەزایەتیش نیشانە نەڎان. تەنیا بە ڕەخنە گێرتەی مەبۆ. قەیوم نریانەرە و نوێنەرو حەقەتینەو گەلی لابریان قەیوم جەلایەنو دەسەڵاتدارو کۆماریۆ نریانەرە، بەڵام ئۆپۆزسیۆن پێسەو پەنەوازی کاردانەوەش نیشانە نەران. ئێمە پێسەو دەم پارتی، هێڵێوە ئەرەکۆشایما هەن و درێژە بە ئەرەکۆشایما مرەیمێ. جە ئەسەنیورت چنی هێزەکا ڕەنج، ئاشتی و دێموکراسی گلێربیەیمۍ. ڕۆو ٨ و دیسەمبەری گلێرۆبییەی دژو نیارەو قەیومی ئەنجام مڎەیمۍ.

موراد کاڵماز، جە دما دمای قسەکاشەنە واتش: "دماو تەلەفۆنەکەو ئێژا ئۆجالانی دەمودەس قەیومشا نیارە و سەر جە نۆ دیڎارشا قەڎەغە کەرد. ئینەیچ نیشاندەرو ئانەین کە پرۆسەکە بە ویستو وێشا و ئاشتی بە ویستو وێشا سەپنانە. قەیوومیش پێسەو هەڕەشێ ئی سەپناینە. هەرپاسە سیاسەتو گۆشەگیریی پێسەو ئامرازێ جە دژو تەڤگەرو ئازادیی کوردی بەکارمێنە ئی سیاسەتێ جە بەرژەوەندی تورکینە نییەنه. ئارێ گەرەکشا پێ بە سیاسەتو گۆشەگیریی سەرو بەڕێز ئۆجالانی ئەنجام ور گێرا، بەڵام سەرنەکەوتێ و ئی سیاسەتێ دەسەڵاتدارا تورکی نیگەران مکەرۆ و وەرەوڕو قەیرانێوە هەمەلایەنەی بییەنۆ. بە سیاسەتو گۆشەگیری و نیارەو قەیومی، مەتاومی ئەنجام ورگێرمێ. پەی ئاشتی  تورکیانە مشۆم دەمودەس چنی موخاتەبەکا بنیشارە گفتوگۆ دەس پنە بکەرا."