دەسەو باوەڕدارا شەنگالی بە مەڵامەتو ئەرەمەرزناو ئەنجومەنو باڵاو ئێزدییەکاۋە جە لایەنو پەدەکەیۊ ناڕەزایش بەربڕی و ئەرەیاۋناش کە ئاڎۍ گرڎو قەرارەکا جە جبەرو ئیراڎەو خەڵکو سەنگالیۋە ڕەڎکەراۋە.
دەسەو باوەڕدارا شەنگالی جە بارەو ئەرەمەرزناو ئەنجومەنێوە جە لایەنو پەدەکەیۊ بەنامۍ ئێزدییەکاوە، ئەرەیاۋنېۋەش ۋەڵاکەرڎۊ.
جە ئەرەیاۋناکەنە ئامان، کە پەدەکە گەرەکشا سەرو دەسو میری و چېرو نامۍ ئەنجومەنو باڵاو ئێزدییەکانە، ئامانجە سیاسیەکا ۋېش بارۊنەدی و پی جۆرە ئەرەیاۋیان: "ئەنجومەنێوە کە ئێمە پېسە باوەڕدارا، سەرۆک هۆز و خەڵکو شەنگالی دلېشەنە نەبیمۍ، بە حیچ کڵوەجۍ مایەو قبوڵ کەرڎەی نییا. ماۋېوەن چنڎین پلانۍ سەرو ئێزدییەکارە جابەجۍ کریا و میرو ئێزدییەکایچ حازم تەحسین بەگیچ پەشگیری ئا پلانا کەرۊ. جیای ئانەی میر بە پاو مەسڵەحەتەکا گلېرگەکەی جمۊۋە، قەرارو لایەنێۋە سیاسی و دیاریکریای جابەجۍ مکەرۊ. ئا ڕانومایۍ و هەرمانۍ کە چېرو چەترەو میرینە ئەنجام دریا نیەنۍ مەسڵەحەتو ئېزیدیەکانە و ئێمە پېسە باوەڕدارا ئێزدی دژو گرڎو ئا قەرارانمۍ کە بە بۍ هۊرگېرتەی راو خەڵکو شەنگالی بەرکریا".
جە درێژەو ئەرەیاۋناکەینە ئامان کە ئا ئەنجومەنەی مەرزیانەرە، بە بەتەمامی جە لایەنو پەدەکەیۊ ئەنڎامەکېش هۊرچنېینۍ و حیچ پەیوەنڎیېۋەش بە خەڵکو شەنگالیوە نییا.
هـ . ش
