جە سەرنیشتوو ۋەرکۊتوو سوریاینە بە مەڵامەتوو هرووژمەکا دۆڵەتو تورکی و چەتاکاشۆ جە مابەینو ساڵەکا ٢٠١٩ پەی ٢٠٢٤ ی ١٤٢ ژەنۍ گەشمەرڎۍ بیێنۍ. حەلیمە عوسمانە یوەنە چا ژەنا کە چا هرووژمانە ڕزگارش بیەن باسش چانەی کەرڎ؛ ئیراڎەو ژەنۍ مەرامو دۆڵەتو تورکین.
جە سەرنیشتوو ۋەرکۊتوو سوریای ئا فاڕیایەی چنی شۆڕشی جە ڕووی سیاسی، کۆمەڵایەتی، ئابووری و پەرەوەردەیۆ وەش بیەن، بی بە پرۆسێوە کە سەرجەنۆ دەورو ژەنێش چنە پێناسە بکریۆوە. بێگومان چی شۆڕشەنە ژەنی دەوری سەرەکی و بنەڕەتیشا بیەن پی مەڵامەتەیچۆ بیێنۍ بە مەرامو دۆڵەتو تورکی و چەتەکاش بەجۆرێ کە؛ جە ماوەو پەنج ساڵانە ١٤٢ ژەنۍ بە هێروژمی ئاسمانی تیرۆرۍ کریێنۍ و کریێنۍ مەرام. چێگەنە باس جە ڕازەو بەشێوە چا ژەنە سەرمەشقە گەشمەرڎا شۆڕشو ۋەرنیشتی مکەرمۍ؛
خالیدە عیسا
خالیدە عیسا و کوڕەکەش هەژار سلێمان جە ٢٨و ئابو ٢٠٢٤ینە جە ئاکامو هرووژمێوە ئاسمانی دۆڵەتو تورکینە جە قامیشلۆ گەشمەرڎۍ بیۍ. خالیدە عیسا جە ساڵەو ١٩٧٩ینە جە تربەسپینە جە ئەڎۍ بیێنە. خالیدۍ ئەڎاو ٤ زاوڵا بۍ جە ساڵەو ٢٠١٤ینە جەگەڕەکەو عەنتەرییەینە بەشدارەو جەمەو گەشمەرڎە جەسوری بیە. دماو چن ساڵا کار و خزمەتی مبۆ بە ڕاوەبەرەو کۆنگرە ستارو گەڕەکەو عەنتەرییەی. هەرپاسە جە ڕوو وەشەسیای و هەوڵو ئەرەکۊشایۆ خالیدە کوڕێوەیچش بەشدارو دلۍ ئەرەکۊشای ئازاڎیی بیەن و بی بە گەریلا.
لەیمان شوێشە و یوسرا دەروێشە
هامسەرۆکەو ئەنجومەنو کانتۆنو قامیشلۆی یوسرا دەروێشە و یاگەگیرەو هامسەرۆکەو ئەنجومەنو کانتۆنو قامیشلۆی لەیمان شوێشە جە هرووژم و ٢٠و حوزەیرانو ٢٠٢٣ۍ دۆڵەتو تورکینە گەشمەرڎۍ بیۍ.
لەیمان شوێشە ساڵەو ١٩٦٨ جە شارو عامودۍ کانتۆنو جزیرەینە جە ئەڎۍ بیێنە. جە ساڵەو ١٩٨٩یۆ بەشدارەو ئەرەکۊشای ئازاڎیی مبۆ. ساڵەو ٢٠٠٢ بە بەهانۍ کار و ئەرەکۊشای ئازاڎیی ژەنێوە جە لایەنو پەدەکەیۆ پەی ماوەو ٦ مانگا گیریۆ. جە درێژەو کارەکاشەنە ساڵەو ٢٠٠٨ ملۆ پەی ڕوسیای و پەی ماوەو ٧ ساڵا چا کۆشش مکەرۆ. دماو دەسپنەکەرڎەی شۆڕشو ۋەرنیشتی گێڵۆوە پەی ۋەرنیشتی و جە کۆبانێنە درێژە بە کۆشش و ئازاڎی ژەنۍ مڎۆ.
یوسرا دەروێشە ساڵەو ١٩٧١ جە شارو عامودێ جە ئەڎۍ بیێنە. هەر جە زاوڵەیۆ هەست پا سیاسەتە نەژاڎپەرستییەو ڕژێمو سوریای مکەرۆ کە جە ڕاو پەرەوەردەیۆ جابەجێش مکەرۆ پۊکەی چا کاتۆ دژو ئا سیستەمە نەژاڎپەرستییە مبۆوە و بەشدارەو دلۍ ئەرەکۊشای ئازاڎی مبۆ. جە دڵسۆزیش پەی پەرەوەردەی مبۆ بە یووە جە ئەرەمەرزنەرا ڕاوەبەرایەتی ۋەننگەکا عامودێی. ساڵەو ٢٠١٢ی جە هامسەرۆکایەتی ئەنجومەنو عامودێنە هەرمانەش کەرڎە و دماتەر پەی هامسەرۆکایەتی دەسەو پەروەردەو عامودێ هۊرەچنیا.
ژیانە و ڕۆژە و وارانە؛ ژەنە جەنگاوەرا شۆڕشو ۋەرنیشتی
ژیان تۆڵهەلدانە، ڕۆژ خابورە و بارین بۆتانە کە بەشدارۍ کۊشش و ژەنا سەرنیشتوو ۋەرکۊتوو سوریای بیۍ؛ جە ٢٢ۍ تەمموزو ٢٠٢٢ بیۍ بە مەرامو هرووژم و دۆڵەتو تورکی ئەرەگیری. جە ئاکامەنە ئا یەرە جەنگاوەرۍ یەپەژەی گەشمەرڎۍ بیۍ.
ژیان تۆڵهەلدانە ساڵەو ١٩٨٠ جە دەگاو مەمالای ناوچەو ڕاجۆو عەفرینی جە ئەڎۍ بیێنە.ژیانە بە مەڵامەتو بیەی بنەیانێوە وڵاتپارێزنیۆ زیاتەر ئاشناو ئەرەکۊشای ئازاڎیی کورڎەسانی بیە، بەتایبە دماو ئانەی عەلی عەفرینی کاکەش ساڵەو ١٩٩٦ بەشدارو دلۍ ئەرەکۊشای ئازاڎی بی. ژیانە دماو پیلانگێڵنی مېیاننەتەوەی ١٩٩٩ی سەرو ڕابەرو گەلوو کورڎی عەبدوڵا ئۆجالانی بەشدارەو دلۍ ڕیزەکا ئەرەکۊشای ئازاڎیی مبۆ. ژیانە جە شۆڕشو ۋەرنیشتینە چڼین هەرمانێش کەرڎۍ پەی ئەوەڵجاری جە یۆبیەی خۆنکارا کورڎەسانینە هەرمانە مکەرۆ، دماتەر جە ئەرەمەرزنای یەپەژەی و یەپەگەینە دەورێوە عاڵش دی. ژیانە جە ڕوبەڕوبیەیۆ چەتەکاو داعشینە جە چڼین مېڎانێنە کۆشش کەرڎ.
ڕۆژ خابورە ساڵەو ١٩٩٢ دربەسبینە جە ئەڎۍ بیێنە. ساڵەو ٢٠١١ی بەشدارەو دلۍ ڕیزەکا شۆڕشی بۆ. یووە جە ئەرەمەرزنەرا یەپەگەی بۍ. جە ماوەو ئەرەکۊشای ئازاڎینە جە چڼین مېڎانێنە جە دژو چەتەکاو داعشی و چەتەکاو سەر بە دۆڵەتو تورکی ئەرەگیری کۆشش کەرڎ.
بارین بۆتانە جە ناوچەو ئەحرەزی کانتۆنو شەهباینە جە ئەڎۍ بیێنە. ساڵەو ٢٠١١یۆ بەشدارەو دلۍ کۊشش و یۆبیەی خۆنکارا کورڎەسانی مبۆ. جە ساڵی ٢٠١٨ینە بەشدارەو دلۍ ریزەکاو یەپەژەی مبۆ. جە ماوەو ئەرەکۊشای ئازاڎینە جە چڼین مېڎانێنە دژوو چەتەکاو داعشی و چەتەکا سەربە دۆڵەتو تورکی ئەرەگیری کۊشش کەرڎ.
ڕۆژینە و ڤیانە و نوژیانە
دۆڵەتو تورکی ئەرەگیری جە ٢٥و کانوونو یووەم و ٢٠٢١ینە ٤ کەسێش تیرۆرۍ کەرڎۍ، ڕۆژینە دماو ئانەی چا هرووژمەو دۆڵەتو تورکینە بە سەختی زامڎارە مبۆ، بەمەڵامەتو فرەیی زامەکەیشۆ گەشمەرڎۍ مبۆ.
ڤیان کۆبانێ، ژیان ئۆجالانە و ڕۆژین ئەحمەدە ئەندامۍ یۆبیەو جوانە ژەنا بێنۍ. هەر یەریشا دماو ئەرەکۊشای جە مېڎانەکا گلێرگەینە جە ئاکامو هرووژمۍ دۆڵەتو تورکینە گەشمەرڎۍ بیۍ.
هەبوون و زەهرا و ئامینە
ئەندامۍ کۆردیناسیۆنو کۆنگرە ستارو کانتۆنو فراتی زەهرا بەرکەلە، ئامینە وەیسی، وە هەرپاسە ئەندامەو کۆنگرە ستارەو کانتۆنو فراتی هەبوون مەلا خەلیلە جە ٢٣ۍ حوزەیرانو ٢٠٢٠ینە جە دەرەنجامو هرووژمۍ درۆنی دۆڵەتو تورکینە جە دەگاو هەلنجەی کۆبانێنە گەشمەرڎۍ بیۍ.
ڕۆنامەوانەو ڕاو حەقیقەتی؛ دلۆڤان گەڤەرە
دلۆڤان گەڤەرە جە وەختو مڎرامانو کۆبانێنە پېسە کۊششکارێوە ڕۆنامەوانی هەرمانەش کەرڎە. دلۆڤانە بە درێژای مڎرامانو کۆبانێ گرڎ هەوڵێوە دڵسۆزانەش ئانەبۍ جە ڕاو چەمو کامێرەکەیشۆ حەقیقەتو مڎرامانو ئازاڎیی کۆبانێ و دڕندایەتی دۆڵەتو تورکی و چەتەکاش فاڕۆوە پەی جیهانی. ساڵەو ٢٠١٩ینە جە کاتو فاڕایۆ هەواڵەکانە دەربارەو هرووژمەکا دۆڵەتو تورکی پەی سەرو گرێ سپی، مبۆنە بە مەرامو هرووژمەکا تورکی، بە سەربەرزیۆ بیە بە گەشمەرڎۍ ڕاو ئەرەیاۋنای ئازاڎیی.
حەلیمە محەمەدە؛ یووە جە ڕزگاربیا هرووژمەکا دۆڵەتو تورکی
دیارا جە دەرەنجامو ئا هرووژما دۆڵەتو تورکینە پەی سەرو ژەنا، بڕۍ چا ژەنا بە زامڎاریێوە سەختۆ ڕزگارشا بیەن. حەلیمە محەمەدە یووەنە چا ژەنا کە جە هرووژم و ١٨و نیسانو ٢٠٢٤و دۆڵەتو تورکینە پەی سەرو ترۆمبێلەکەیشا ڕزگارە مبۆ، بەڵام حەلیمە قاچێوەش چا هرووژمانە جە دەس مڎۆ. حەلیمە باسش جە مەرامو هرووژمەکا دۆڵەتو تورکی کەرڎ پەی سەرو ژەنا و ئاماژەش پانەیە کەرڎ کە دۆڵەتو تورکی جە ئیراڎەو ئازاڎیی ژەنۍ متەرسۆ پۊکەی هرووژم مکەرۆ سەرو ژەنا. پۊکەی ژەنی بە ئیراڎۆ دژو ئا هرووژما مرداوە.
