ئەنڎاموو کۊمیتەی ڕاوەبەری پەکەکەی دوران کاڵکان باسش جە سەرمەشقا کۊشیای ئازاڎیی کورڎی، گەشمەرڎا یاۋنەری ئازاڎیی غوربەتلی ئەرسۊزۍ، عەلیشېر کۊچگری و سەید ئەڤرانی کەرڎ. کاڵکان ئەرەیاۋناش،"تا گلېرگە بۊ، ئیراڎەی ئازاڎ، ویست، ئامانج و زانابیەی بۊ، فرە ئاشکران کە ئا کۊشیای و خەباتەشە بەردەوام بۊ".

کاڵکان جە چەمپنەکۊتەیۍ تایبەتەنە چنی ئاژانسوو هەواڵی فورات(ANF)ی باسش جە دما نامەو سەید ئەڤرانی کەرڎوو ۋاتش ،"پېسە دما وەسیەتیش بە ئېمەش ۋات، جە وەشی و وەشەویسینە بیدۍ. ئېمەیچ ماچمۍ کە تۊ ئیسراحەت بە، قەڵەم، کامېرە و تفەنگ و تۊ ئینۍ دەسوو هامڕایاتۊ. درېژە بە ئەرکوو ڕووانەیشا مڎا".

دەقوو چەمپنەکۊتەکەی پی جۊرەنە:

بەنامۍ ڕاوەبەری پارتەکەیماوە هامڕا سەید ئەڤرانی بەڕېز و پنەزانایۊ یاڎ کەرووە.

پېسە دما وەسیەتیش بە ئېمەش ۋات، جە وەشی و وەشەویسینە بیدۍ. ئېمەیچ ماچمۍ کە تۊ ئیسراحەت بە، قەڵەم، کامېرە و تفەنگ و تۊ ئینۍ دەسوو هامڕایاتۊ. درېژە بە ئەرکوو ڕووانەیشا مڎا.سەروو گەشمەرڎەبیەو هامڕاکەیشا  گرڎوو وەشەسیایاش جارېوەتەر ۋېشا وست وەروو ۋنەپەرسایۊ. پەنەوازیەکۍ ئەرک و ۋەرپرسیاری ۋېشا هۊرسەنگناوە، پۍ ئانەی سەروو بنەماو ڕەخنەی و ڕەخنەدای چنشا جابەجۍ کەرڎەن. ۋېشا بە ئیرادەتەر و ڕژدتەر کەرا. ئا کۊشیایەی سەروو بنەماو ئازاڎیی جەستەیی ڕابەر ئاپۊی و چارەسەری پەرس و کورڎی ڕاوەبەرش کەرمۍ، جە قۊناغەو ۋەروو دەمیمانە بەبەقوەتتەر وەڵېگنۊ. بە دڵنیایوە یاڎوو گرڎوو گەشمەرڎا بە زینڎەیی ڕاگېرمۍ، ئامانجەکاشا میاۋنمۍ بە سەرکۊتەی.

جە مەزڵوم دۊغانۊ تا سەید ئەڤران...

بەڕاسیچ جە مەزڵوم دۊغانۊ تا سەید ئەڤران سوپېوە یاۋنەری ئازاڎما هەن. جمیەری ئازاڎیما تاواش بەشېوە پی جۊرەیە مەرزنۊرە. سوپاو گەشمەرڎا یاۋنەری ئازاڎیش ئارڎ کایۊ. ئیجارە ئېمە جە ئاخروو مانگەو ئەیلولینە ٢٨و ئەیلولی ١٢ەمین ساڵیاڎوو گەشمەرڎەبیەو هامڕا عەلیشێر کۊچگرین کە پېسە هامڕا سەید ئەڤرانی، جە سەرەتاو ١٩٩٠ی بەشڎاربیەیۍ گۊرەش جە یاۋنەری ئازاڎیینە بۍ. هامڕایا ڕۊستەم ، چیچەک، ڕۊزەرینە جە خواکورک جە هجومۍ دوژمنینە گەشمەرڎۍ بیۍ.  ئا ۋەختیچە پېسە ئیسەی کۊشیایما قورس بۍ.چا چوارچېوەنە هامڕا عەلیشېروو هامڕېکېش کە چنیش گەشمەرڎۍ بیۍ، جە ١٢ەمین ساڵیاڎوو گەشمەرڎەبیەیشانە بە ڕېزوو ۋەشەویسیۊ ۋیرشا مارمېوە.

حەرپاسە حەفتەو یۋەموو مانگەو ١٠ی ٢٦ەمین ساڵیاڎوو گەشمەرڎەبیەو هامڕا زەینەبېن، واتە هامڕا غوربەتلی ئەرسۊزۍ کە جەسەرەتاو ساڵەکا ١٩٩٠ی پېسە هامڕا سەیدی و عەلیشېری ڕەنجی گۊرەش جە یاۋنەری ئازاڎیینە جە سەرنیستوو کورڎسانی و تورکیانە کېشتەبۍ. جە ٨ /١٠/١٩٩٧ی چنی ٢٥ هامڕایاش گەشمەرڎۍ بیە. وەختۍ جە زاپ، مەتیناو گارەنە کە ئیسە داستان و مدرامانی منۋیساوە، خەباتشا کەرڎ، کۊشیۍ، جەنگشا کەرڎ و گەشمەرڎۍ بیۍ.

ئا دوژمنەی هجوم کەرۊ هەمان دوژمن بۍ. دۊڵەتوو ترکی بەهامکاری خیانەتوو پەدەکەی هجومشا کەرڎەبۍ.چا هجوومەنە یۊ جە بەقیمەتتەرین خەباتکارەو یاونەری ئازاڎیی، هامڕا زەینەبە گەشمەرڎۍ بیە. بەرېزوو ئیحترامۊ هامڕا غوربەتلی ئەرسۊزۍ و ٢٥ هامڕېش کە چنیش گەشمەرڎۍ بیۍ یاڎ کەرووە.

بە زینڎەیی ڕاگېرتەو ئا هامڕایاما و سەروستەی ئامانجەکاشا، قەراری بنچینەیی جمیەرەکەیما و گرڎیمانە. پۍ سەوستەی ئامانجەکا هامڕا زەینەبۍ ٢٦ ساڵېن، ئېمە بەقەرارداری کۊشیەیمۍ. جە ئیسە بەدمایچۊ بەردەوامۍ بیمۍ. پیسە هەڤاڵ سەیدی ئەرەیاۋناش، ئا سەرگوزشتە وەردەوام بۊ. ڕابەر ئاپۊ ۋاتس؛ پەکەکە ڕۊمانېوە بۍ کۊتان، شیعرېوەنە، بەڵۍ نۋیستەیۊ ڕۊمانی وەردەواما، سەرگوزشتە بەردەواما، کۊسیای بەردەواما. ئېمە قەناعەتما پاسەن کە تا مرۊڤایەتی نەیاۋۊ بە ئاستېوە کە سەروو بنەماو ئازاڎیی ژەنۍ بە ئازاڎیی بژیۊ، ئا کۊشیایە بەردەوام بۊ.

ڕاوەبەروو سەرمەشق و خەباتی یاۋنەری ڕابەر ئاپۊن

وەختۍ تەماشەو تاریخوو کۊشیای ئازاڎیی ۋېما کەرمۍ، ئېمە تاریخوو خەباتی یاۋنەری ئازاڎیچ بە لقۍ چا تاریخیە منیەیمېرە. ئېمە جە سەرەتانە ئانەی بە زارەکی کەرېنمۍ. دماتەر ئېمە ۋنەکۊڵیایما سەروو بنەماو پڕووپاگەنڎەی چەکڎاری کەرڎ. هەڵبەت چا قۊناغەنە یاۋنەریچ دەسش پنەکەرڎ. جە ساڵەکا ١٩٩٠یۊ ئېمە بەفرەیی جە ڕاو یاۋنەریۊ خەباتی پڕوپاگەنڎە و بانگەشەیما ئەنجام مڎەیمۍ.

بېگوومان سەرمەشق، ڕاوەبەروو ڕابەروو ئا خەباتیە، زیاڎ جە گرڎوو خەباتەکا ڕابەر ئاپۊن.

چا خەباتانە هەنگامە سەرەتاییەکۍ چنی هۊرگیریۍ ، من مزانوو. چنی نزیک بیەیۊ یووەم ساڵیاڎوو گەشمەرڎەبیەو هامڕا حەقی قەرارینە رابەر ئاپۊ بە ناموونیشان و "پۍ یاڎوو حەقی قەراری"یاڎۍ ٧ پەڕەیش نۋیس. هەڤاڵ فوئادیچ شئرېس نۋیستە، شمە مزاندۍ، شعرەو"من ئینسان بېنا". بە ڕاسی متاوو واچوو وېژەو پارتەکەیما پانیسا دەسش پنەکەرڎ.ڕابەر ئاپۊ وەڵتەر ڕەشنۋیسوو بەرنامەو پارتیش ئاماڎەکەرڎەبۍ. پڕووپاگەنڎەی زارەکی و خەباتی پەروەردەیی ئېمە کە تا ئا وەختە لۋۍ ڕاوە، هەنگام بە هەنگام فاڕیا پۍ مادەو کەرەسەی نۋیسیای. چا گلېرۊبیەینە کە جە وەهاروو ١٩٧٨ی سازکریا قەرار دریاکە دەسەو وەڵاکەرڎەیۊ ناوەنڎی وەش کریۊ و وەڵا کریېوە ناوەندی  پېسە گۊڤاری سەروو بنەماو چېرزەمینی و نایاسایی ۋەڵاکریۊوە. جە ناوەنڎوو ئامەڎینە دەستېوە پا جۊرەیە مەرزیارە. منیچ چنەشەنە بەشڎاربېنا.

ڕابەر ئاپۊ سەرپەرشتیش کەرۍ. هەڤاڵ مەزڵوم و خەیری ئەنڎامۍ سەرەکیۍ بېنۍ. فاتمەیچ دلۍ ئا دەستەینە بۍ. جە مانگەو حوزەیرانی کۊبیەیۊ سازکریا. ئېمە جە وەختی جیاجیانە کۊبیەیۊ دەسەتەی نۋیستەیما سازکەرڎ. ڕابەر ئاپۊ هۊرسەنگنایش کەرڎ. ئېمە چنی ئا هەرمانۍ کەرمۍ؟ ئېمە چنڎین جارۍ گفتووگۊما کەرڎ. پلانە، پڕۊژەو بەرنامەما ئاماڎەکەرڎ. جەلایېوە، ئېمە بەرنامەو وتارەکاما سازکەرڎ. هەڤاڵ مەزڵومیچ دەسس بە نۋیستەی کەرڎ. جە لایۍ تەرۊ حۊڵما دا کە ئامېروو کەلووپەل و چاپکەرڎەی بەدەس بارمۍ.

چاپی یۋەم ژمارەو سەرخۊبونی

ڕابەر ئاپۊ جە مانگەو تەموزینە جە ئاماڎ مانیفیستۊو "ڕاو ئاخېزوو کورڎسانی"ش نۋیست.بەڕاسیچ ئانە پۍ خەبات و چاپی و وەڵاکەرڎەیۊ ئېمە فرە گرنگ بۍ. ئېمە جە مانگەو ئابینە ڕاو ئاخېزوو کورڎسانیما پۍ چاپکەرڎەی ئاماڎەکەرڎ. پېسە دەسەو وەڵاکەرڎەیۊ ئېمە ئانەما وەروچەما گېرت، سەروو کاغەزی مۊمینە تایپما کەرڎ. ئېمە چوارچېوېما ئاماڎەکەرڎ. ئېمە ئاۋنەکۊڵیایېما جە ئامەڎ کەردۍ. نەوەنڎە سەرەکیەکە جە ئامەڎ بۍ، بەڵام ئېمە پەی دیلۊکی وچەولیگیچما فاڕاوە. یۊیچشا بەرەو دېرسیم لووا. ئېمە هەرمانەکۍ چاپی وەڵاکەردەیۊ ڕاو ئاخېزوو کورڎسانیما تا ئا یاگۍ بەرڎ.

جە ئاکامەنە ئېمە پا سیستموو چاپەمەنیەی کە ئاماڎەما کەرڎ، چوارچېوەکەما ئامەڎەنە چاپ کەرڎ. ئېمە ئانەما پا کەلووپەلا وەش کەرڎ کە ۋېما ئېستېبێنێماوە و ئېمە چاپېوەما وەشکەرڎ کە بەڕاسیچ جە چاپی ئۊرجیناڵیۊ نزیک بۍ. ئېمە شەوۍ تا سەرسەعب جە یانېوەنە کە جە باغلەر ئاماڎەما کەرڎەبۍ، چوارچېوەکۍ پەنج-شش ژمارېما چاپ کەرڎ. ڕابەر ئاپۊ تا سەعبۍ حەر ئاماو لووا. ئاڎ چەمڎاریش کەرڎوو وردبینی هەرمانەکا ئېمەش کەرڎ. بەڕاسیچ هسابش کەرڎ کە ئایا ئېمە چېس کەرمۍ، ئېمە چنڎە متاومۍ ئەنجامش بڎەیمۍ، ئایا متاومۍ کەرمېش. ئانەی هۊرسەنگنۍ کە ئېمە چن چنە ئامۍ بیمۍ و ئېمە چنە بتاومۍ ئا هەرمانا بیاونمۍ بە سەرکۊتەی.

جە ئاخیچەنە ئېمە هەم بەرگەکەو هەمیچ ئاماڎەکاریەکۍ تەرېما بەرڎۍ پۍ چەولیگی. ئېمە جە چەولیگ بە ئامېروو تایپی نۋیستما. ئېمە جە ماوەو ئیسراحەتوو جەژنېنە جە سەرەتاو مانگەو ئەیلولی جە ڕاو بەکارئارڎەو ئامېروو چاپیۊ سەر جەنۊ چاپما کەردۊ.پاسە بزانوو جە سەرەتاو  مانگەو ئەیلولینە دمایس پنە ئاما و ئېمە چاپکەردەکەیما یاۋنا بەدمایی. وەختۍ ئانەما تەمامنا فرە دڵوەشۍ بېنمۍ. ئیسەیچ وەختۍ سەرخۊبون چاپ کریۊ و گرڎ ڕووۍ وەڵا بۊوە، هامڕېکېما ئینۍ دڵوەشی سەرکۊتەینە، ئا وەختیچە پېسە ئا کەسا چاپخانە بەراڕاوە، ئېمەیچ پا جۊرە دڵوەشۍ بېنمۍ.ئېمە چن سەڎ دانېوەما چاپ کەرڎەبۍ. ئېمە ئانەما فاڕا پۍ گۊڤاری و وستما سەروو بەرگی . قەرارما دا کە نیمەیشا شارمېوە پۍ دماتەری نیمەکەی تەریچشا وەڵاکەرمېوە. نزیکەو نیمەیشا دېما دەسوو هەڤاڵ حسېن دورموشی کە هۊرشا گېرۊ. ئا وەختە ۋەرپەرس و چەولیکیما بۍ. وەختۍ کە بەردېش تا سارۊشاو ئاڎیچ گیریا. دەسشا گېرت سەروو گرڎوو ژمارەکا گۆڤاروو سەرخۊبونیرە کە دابېما پنە. حەرپۊکەی ئی قەرارەما دا؛ ئېمە جە سەرەتای سەرەتاوە و جە ئاستی باڵانە وەڵا ش کەرمېوە. با جە گرڎ یاگېنە وەڵا بۊوە تا کۊکەرڎەیشۊ جە لاو دوژمنیۊ ئاسان نەبۊ، چونکی ئەگەر بەتەمامی دەسشا سەرەرە گیریۊ گرڎ چېوۍ دەسەنە مشۊ.

ئا دەسگېرتەی سەرەرە پۍ ئېمە بی بە دەرزۍ گۊرە. ئېمە ئانەی مەنەبېوە وەڵاما کەرڎۊ، ئەگەر ئینسان سەرنج بڎۊ ، پۍ کۊنگرەو ئەرەمەرزناو پەکەکەی کە جە ٢٧/١١/١٩٧٨ی سازکریا، سەرەکیتەرین و بنچینەیتەرین مژارنۋیستەی و ۋەڵاکەرڎەیۊ مانیفیستۊی ڕاو ئاخېزوو کورڎسانی بۍ. ئانەیچ بی بە یۋەم ژمارەو گۊڤاروو سەرخۊبونی.

دماتەر ئېمە پېسە ژمارېوە تایبەتی بە چوار پەنج جۊرۍ تەر مانگەو ١٠ی و ١١و ٧٩ی درېژەما پنەدا. دماتەر هەڤاڵ مەزڵومیچ گیریا، دەسگیریا سەروو چاپخانەکەیچمارە.خەباتوو چاپی و وەڵاکەرڎەیۊیما مردا.

من مزانوو کە ژیۋنایۊ ڕېکوستەی جە بەروو وڵاتی، جە مېڎانوو لوبنان-فەڵەستینی بەئەنجام یاوا. جە پلانېوەنە کە دماو کۊنفرانسوو یۋەم و پەکەکەینە جە تەموزوو ١٩٨١ی جە دۊڵەو بیقاعی سازکریا، یۊ جە قەرارە گرنگەکایچ چاپکەرڎەی گۊڤاروو سەرخۊبونی بۍ جە ئۊرووپا پېسە ئۊرگانی وەڵاکەرڎەیۊ ناوەنڎی. راوەبەروو ناوەنڎیما بەپاو ئانەی هەرمانەکېس بەش کەرڎۍ. گرووپۍ جە هەڤاڵا ناوەندەکەیما پۍ ئانەی ئا خەباتیە ڕاوەبەر کەرا بەرەو ئۊرووپا کۊتۍ ڕا.

ئانەی بە فرەیی جە دلۍ وڵاتینە خەباتی تیۊریکی ڕاوەبەر کەرۍ ڕابەر ئاپۊبۍ. جە زمسان و  ٨١-٨٢ېنە ڕابەر ئاپۊ خەباتېوە تیۊریک، ۋنەکۊڵیای و شرۊڤەش ڕاوەبەرکەرد. ئاڎ ئەندېسەکۍ ۋېس بە زارەکی باس کەرڎۍ. ئانۍ نۋیسیېوە لوایۊ پۊرەیشا پۍ کریا و فاڕیۍ پۍ کتېبی و خەتەی ستراتیجیشا جە ۋۍ گېرت. کۊنگرەی دووەم ئا کتېبېشە پەسەنڎ کەرڎۍ. سەردەموو دووەم و بە پارتی بیەیما، قۊناغەو هەڵمەتەو ١٥ و ئابی، سەروو ۋنەکۊڵیایۍ تیۊری قوڵی پا جۊرە وەڵۍ کۊت.

سەرخۊبوون.. درېژ مەوداتەرین چاپ و وەڵا کەردەیۊ

ئینۍ جە هەمان وەختەنە ئاماڎەکاری بۍ پۍ ۋەڵاکەرڎەیۊ سەرخۊبونی . ئېمە جە ئەنجاموو کۊنفرانسیۊ دەسما پنەکەرڎ و گرڎوو خەباتی تیۊریکیما کۊکەرڎۊ، کیاستما پۍ ئۊرووپای و جە کانونی دوەموو ١٩٨٢ یۋەم ژمارە وەڵا کریاوە.

فرە خاس ویرما کە ژمارەی یۋەم یاوا ۋەرکەوتوو میامینی، لوبنان و سوریا. ڕابەر ئاپۊ پۍ وەڵۍ کۊتەی چنڎین ڕووۍ حۊڵشدا. وەختۍ ژنیش کە یاوان فڕگەخانە، وەروو بەرەینە بە جۊش و خرۊشۊ چەمەڕاو هورگېرتەیشۊ بۍ. ئېمە هەڵای ئینا وەروو چەماماوەکە چنی پاکەتەکا ورپڕچنۍ و بە وردی تەماشەو یۋەم ژمارەی کەرۍ. ئنڎە  جۊشوو خرۊش بەخشۍ و ئنڎەکاریگەربۍ! ئیسە سەرخۊبوون هەژماری ٥٠٠ەمینش مانگەو ئابی ۋیەردەی وەڵا کریاوە. جە ئەیلولەنە دەس بە ٥٠٠ی دووەمی کەرمۍ، ژمارەو ٥٠١ەمینی وەڵا کریۊوە. هەڵبەت ٢٠-٣٠ ژمارۍ تایبەتۍ تەریچ هەنۍ، جگە جە ژمارەی ئاسایی مانگانەی، ژمارۍ تایبەتېچ بېنۍ. جە ساڵەکا ٧٨ و ٧٩ی کورڎسانەنە سەرەتاو ئانەین کە پېسە نایاسایی پەنج- شش ژمارېش وەڵا کریېوە.ئەگەر ئینسان ئانیشا گرڎ حساب کەرۊ یاوۊ زمارە ٥٢٠-٥٣٠ی چاپ و وەڵاکەرڎەیۊ سەرخۊبونی بەشېۋۍ ڕېکووپېک و بۍ پڕچیای جە تاریخوو کورڎانە یۋەمینا. جە ڕاسینە جە تاریخوو ئاخېزەکانە یۋەمینا. یۊ جە گۊرەتەرین ڕووەداکا تاریخین کە جمیەرۍ پېسە پەکەکەی جە هەلوومەرجۍ قورسەنە سەرەڕاو هجومی ئەرەگیری و قڕکەرڎەی جە کورڎسانەنە و سەرەڕاو پیلانگېڵی میان نەتەوەییچ کۊسیای ئازاڎیش ڕاوەبەر کەرڎ و خەباتی یاۋنەریش کەرڎوو ٤٢ ساڵېن ۋەردەواما جە وەڵاکەرڎەیۊی مانگانەی. ئینە یۊ جە گۊرەتەرینە سەرکۊتەکا ئاخېزی ئازاڎیی کورڎسانین. ئانە گۊرەتەرین سەرکۊتەی ئاخېزین. سەرخۊبوون چېگە بی بە دەنگوو ئاخېزی. ڕامان و تېزەکۍ ڕابەر ئاپۊی گرڎ چا وەڵۍ کریېنۍ. حیزب، جەنگەوانەکۍ ئازاڎیی، گەلە وڵات پارېزەکەماو مرۊڤایەتیش پەروەردە کەرڎو ڕۊشنش کەرڎۊ. هەڵایچ بەردەواما جە ڕۊشنگەری. ئەرکوو ڕۊشنگەرانەو ۋېش بە سەرکۊتەیی ڕاوەبەر کەرۊ.

دۊسەکېما هېزی گۊرەش چنە هۊرگېراو  دوژمنیچ قینیش چەنەشەنە. ۋەروو ئانەی جە ۋیەردەنە واچېنۍ کە پۍ چی نەتاواما ڕاش چنە گېرمۍ. دیارا کە فشارەکاشا زیاتەر کەرا، زیاتەریچ با.

خەباتوو یاۋنەریما سەرجەنۊ فاڕاوە پۍ سەرنیشتی

دووەمین خەباتوو یەونەریما جە ساڵەو ١٩٨٢ بەدماوە سەروو ئۊرووپای بۍ. ئاڎیچ یۊ جە ۋەرهەمەکا دیموکراسی ئۊرووپاین پۍ گەلوو کورڎسانی و کۊشیای ئازاڎیی کورڎسانی، کە تا چ ڕادېوە پنەش ماچا دیموکراسی. دماتەر گەشەئەسای یاۋنەری جە مەنتیقە جیاجیاکا وڵاتی جە ئاخروو ٨٠کا سەڎەی ۋیەردەینە و سەرەتاو نەوەڎەکانە جە تورکیاو سەرنیشتوو کورڎسانیۊ دەس پنەکەرۊ و بەرەو پانیشت فاڕیۊوە. جە دلېڕاسەو ٨٠کا سەڎەی ۋیەردەینە جە ۋەرنیشت، سەروو خەتەو لوبنان-سوریای، چاپ و وەڵاکەرڎەیۊ عەرەبی و کورڎی بەشېۋەو گۊڤاری تەشەنەش کەرڎ. دماتەر جە هەرېموو ۋەرکەوتی وەڵا بیۊ. بېگوومان خەباتی یاونەری ئېمە جە ئیستەنبوڵ و ئامەد ئنجام دریا کە جە گرنگتەرین یاگەکانۍ کە چنەشانە فرەتەرین جەنگ و فرەتەرین کۊشیای کریۊ. ئانېم بەعالی ۋیرېنۍ . تەجرووبەو ئاماڎەکاریەکۍ جە ئۊرووپاوە فاڕیېوە. پېسە جە وڵاتەنە؛ ئەگەر جە ئامەڎۊ دەسش پنەکەرڎەبۊ. سەروو خەتەو ئامەڎیی، خارپێت و چەولیگ جابەجۍ بی چایچۊ بەرەو ۋەرکەوتوو میامینی و ئۊرووپای وەڵا بیۊ، جە ئاخروو هەشتاکا سەڎەی ۋیەرڎەینە جارېوەتەر جە ئۊرووپاوە بەرەو تورکیاو کورڎسان فاڕیاوە. جە ساڵەکا ٨٧-٨٨ینە سەروو ئا مژاریە خەباتی گۊرەی ئاماڎەکاریما کەرڎ. ئېمە ئاماڎەکاری و ۋنەکۊڵیای فرەما کەرڎ. هەلوومەرجەکۍ تا چن گونجیېنۍ، ئاژەی یاسایی تاچن ڕا مڎۊ، جە بارەو گرڎیشاوە ۋنەکۊڵیایما کەرڎ. بڕې جەمۍ مەرزیېرە، گۊڤاروو ڕۊنامۍ چاپ و وەڵۍ کریېوە. ئېمەیچ تاواما یۊبیمۍ چانیشا ئیسفاڎە چا ژیوگەیە هۊرگېرمۍ.جە وەهاروو ١٩٨٨دەسما بە دەسوەڵېوستەی فاڕایۊی جە ئۊرووپاوە کەرڎ.دماتەر گیریایمۍ، مزانیۊ جە زینڎانە چەمڎاری کریېنمۍ.

ئانۍ ئېمەشا گېرتەبۍ ، بەشېوېوە سەرەکی بەمەڵامەتوو ئا کاروو خەباتیماوە حۊڵ دېنۍ تاوانبارما کەرا.چەمڎاری کاروو خەباتیما جە مەجال و یاونەری و چاپی و وەڵاکەردەیۊینە کەرېنۍ و خەباتوو بانگەشەی بە تاوان نیېنېرە. جە ڕادەبەدەر دژوو فکروو پەکەکەی بېنۍ. دژوو ئازاڎیی، یەکسانی و دیموکراسی بېنۍ. دژوو ئازاڎیی کورڎی بېنۍ. پېسە ئانەی جە تاعونی تەرسا، چانەی تەرسېنۍ و بڕەمېنۍ. سەروو ئا ئەساسیچە گەرەکشابۍ ڕاگیری کەرا. بەڵام ئېمە وەڵېکۊتەیما بەدەس ئاردەبۍ. نەتاواشا ڕاگری جە ئاماڎەکاریەکاما گېرا. ساڵەو ١٩٨٩ی یۋەمین خەباتی یاۋنەریما جە ئیستەنبووڵ بە گۊڤاروو"ڤەژین جڤاکی"شا چاپ و وەڵاکەرڎۊ. هەڵبەت ئا گۊڤارە بەشېۋېوە یاسایی وەڵا کریاوە، هەرمانۍ نایاساییە نەبۍ، بەڵام تەنیا ٥-٦ ژماراش وەڵا کریاوە. دماتەر وزیارە. وەختۍ ئاڎۍ وەڵا کریاکۍ ئېمەشا قەڎەغەکەرڎۍ، جە جزیرە و نسېبین سەرهۊردای دەسش پنەکەرڎ. گلېرگە جە سیستموو ئەرەگیری و قڕکەری بڕیارە. بەرە ڕووەو سیاسەتی دیموکراتیکیرە کریاوە. پی جۊرە پۍ یاۋنەری ئازاڎیی دەرفەتوو هەلوومەرجەکۍ ڕاوەبەردەی خەباتی ڕەخسیا. فرېوە جە شۊڕشگېڵنا، وڵاتپارېزا، ئینسانە بەنرخەکۍ، ژەنی و پیۍ،سەروو ئا ئەساسیە چېروو نامۍ جیاجیاینە هەرمانەو خەباتوو یاونەریشا وەڵۍ وست، کە کاریگەری ۋېس سەروو کۊشیای ئازاڎیی کە کورڎسان، دیموکراسی و ڕۊشنگەری تورکیای نیارە و  فرە زیاتەر هجوومە پیلانگېڵیەکۍ و جەنگی تایبەت شەرمەسار کریۍ. پېسە ئۊزکور گوندەم، ئۊزگوور هالک، یەنی ئولکە فرېوە چانیشا. بڕېشا دماو چن مانگۍ قەڎەغەکریۍ. بڕېسا دماو چن ساڵۍ وزیېرە. بەڵام یاۋنەری ئازاڎ فرە زیاتەر خەباتەکېش زیاتەر کەرڎۍ و پەرەش پنەدۍ. ئانڎەی تەر گۊرەتەرش کەرڎ.

جە ڕاسینە پېسە مېڎانۍ جەنگی پاسەبۍ. نۋیسینگەکېشا بە بۊمب تەقنېوە. ئا کەسۍ کە ڕۊنامەو گۊڤارەکا وەڵا کەرېنېوە تیرۊر کریۍ، پەیامنېرەکۍ گیریۍ. بەشېۋېوە، کە ئا مېڎانە گۊرەو خەباتی کە غوربەتلی ئەرسۊزەکا و ئەڤرانەکاو کۊچگیریەکا بنیاڎشا نیا، تەنانەڎ ئاپۍ موساکا قوەتېوە فرەشا وس گەڕ و ئاخېزۍ ڕۊشنگەریشا زینڎە کەرڎۊ.  

کەس مەتاوۊ ڕا چی کۊشیایە گېرۊ

حەرچنە ڕووانە چېروو فشارینە بۍ گرڎ وەختۍ گەشمەرڎەیچ دریۍ، ئا کۊشیایە لووا ڕاوە. سەڎان و هەزاران جەنگەوانۍ ئازاڎیی سەروو ئا بنەمۍ ۋېشا پەروەردەکەرڎ. سەروو ئا ئەساسیە پەروەردۍ کریۍ و بەشڎارۍ دلۍ ڕیزەکا ئازاڎیی بیۍ. بیۍ بە ئازاتەرین و فیداکارتەین جەنگاوەرۍ کۊشیای ئازاڎیی کورڎسانی و دیموکراتبیەو تورکیای. ئا نەریتە تا ئیسەیچ وەردەواما. پېسە هەڤاڵ سەیدی وات، کۊشیای بەردەواما سەرگزشتە بەردەواما. تا ئا وەختەی گلېرگە حزورش بۊ، ئا خەباتوو کۊشیایە بەردەوام بۊ. کەس مەتاوۊ ڕا چی کۊشیایە گېرۊ.

مشۊم خەتەی کرداریە بە شېوەو مەزڵووم دۊغانی بۊ

چنی هامڕا مەزڵومی فرە خەباتم کەرڎەن. جە دەسەو چاپی و وەڵاکەردەیۊینە چنیش هەرمانەم کەرڎېنە. هەڤاڵ مەزڵوم چېش بۍ؟ ڕابەر ئاپۊ ۋاتش،"ئامیان و هۊشمەنڎی پارتەکەیما بۍ". ڕووانە لویۊپۊرە پۍ ٥٠٠ پەڕا کەرۍ . بەڕاسی مامۊسېوە گۊرەبۍ. جە کۊشیای ئایدۊلۊژینە پېسە کاردۍ تیژۍ بۍ. مامۊسابۍ، پەیوەنڎیش چنی خەڵکی خاس بۍ. هۊشمەنڎی ئاڎی جەبارەو چالاکبیەی سیاسیۊ فرە بەرفراوان بۍ. خەباتوو بانگەشەیش حەجگیز جە خەباتوو ڕېکوستەی و چالاکی نەبڕیەرە. نەتەنیا مامۊسابۍ، جە هەمان وەختەنە جە بەرزتەرین ئاستەنە ۋەرپرسیاری ڕېکوستەیش جە ئەستۊ گېرتەبۍ. هەرمانەو ڕېکوستەی کەرۍ و چالاک بۍ. مدرامانوو زینڎانەکا دەسش پنەکەرڎ.ئانە وەسېن پۍ ئانەی ڕاسیەکا ۋیندۍ و درکشا پنەکەردۍ. ڕابەر ئاپۊ بە کاوەی هەمچەرخ نامېش بەرت.ئەرەیاۋناش مشۊم پڕاکتیکی حیزبی بە شېوەو مەژڵوم دۊغانی بۊ.خەتەو مەزڵوم دۊغانی پەنەوازش بە خەتۍ چانەین. خەتەی شۊڕشگېڵنی بەتەمامەتی.... پا جۊرە نەبۊ ئینسان خەباتۍ کەرۊ و بەشڎاری ئەوی تەری نەکەرۊ.

عەلیشېر کەسېوە ویر تیژ بۍ و قینیش ۋەران ۋەروو دوژمنی فرۍ بۍ

هامڕای تەریچم، عەلیشېر کۊچگریم دەمېوەبۍ ئشناسېناش. پېوەرە هەرمانەما کەرڎە. هامڕا عەلیشېریچ هەمان هەستیاریش بۍ. ئا چوار هامڕۍ جە تایبەتمەنڎیەکانە فرە جە یۊی شېنۍ. عەلیشېر جە ڕوو ویرتیژی و بەبڕوابیەیۊ جە بەرزتەرین ئاستەنەبۍ. قینۍ فرېش جە دووژمنی بۍ. فرە ئارام دیاربۍ. بەڵام دلېنە پېسە گڕکانۍ بۍ. ئانۍ کە بەرۊ وینینېش واچېنۍ فرە ئارام و سەروو وېن. بەڵام ئانۍ جە نزیکۊ ئشناسېنېش، زانېنۍ کا پا جۊرە نیا. هامڕا عەلیشېر ۋەرپرسیاری ڕېکوستەیش جە ئەستۊ گېرت. بی بە فەرمانڎەو جەنگش کەرڎ. جە کۊچگیریوە تا پانیشت، جە فرەو مېڎانەکانە ئەرکوو ۋەرپرسایاریش جا بەجۍ کەرڎ.

غوربەتلی قورستەرین قۊرتەکېش چارەسەر کەرڎۍ

ئینسان متاوۊ جە بارەو زەینەبېوە چېوی سەرنجڕاکېشتەر واچۊ. پېسە ژەنېوە شۊڕسگېڵنۍ و وڵاتپارېزۍ جە خەباتوو یاۋنەرینە جە وەڵۍ وەڵېوە ئەرک و ۋەرپرسیاری ۋېش جابەجۍ کەرد و هەمیچ دلۍ گەریلاینە. جە دژوارتەرین ئاژەکانە سەرمەشقیش کەرد و پۍ ڕېکوستەیکەرڎەی یاۋنەری ئازاڎیی، بیە بە وەرپرسیارە، قورسی و لەمپەڕەکېش ناستۍ. قورستەرین قۊرتەکېش چارەسەر کەرڎۍ. ئانەما جە هەڤاڵا ژنی. نۋیستەکېشما وەنېوە. بەڵام ئا کەسایەتیېما سەروو کەشەکاوەو دلۍ کۊشیاینە ئشناسا.

هامڕا زەینەبە فرە زوو ۋېش چنی گرڎ خەباتېوە گەریلای ڕائارڎ، جە شارۊ زوو بەرەو کەش پڕاوە. ئینسان پاسە زانۍ کە چنڎین ساڵۍ پەروەردەی گەریلایش دیەن، ڕووبەڕوو قۊرتەکا گەریلای بیېنۊ. وەختۍ جە شار، جە خەباتوو پڕوپاگەنڎەی و بانگەشەیۊ ئۍ پۍ هەرېمەکا پارېزنای مەدیای، زاپ ئاڤاشین و مەتینای بەشڎاری جە خەباتوو قەرارگەی ناوەنڎینە کەرۍ، ئینسان ئەجېش دەیان ساڵېن چا مەنېنۊ. فرە بە تەجرووبۍ بۍ.

هەم ۋېش پەروەردەکەرڎ و چنی ئینسانەکا گونجیۍ، هەمیچ پېسە پەروەردەکارېوە پەروەردە دۍ، قۊرتەکا چارەسەر کەرۍ، بەگرڎ جۊرۍ فەرمانڎەیی گەریلایش کەرڎ.سەرەتاو هامنوو ساڵەو ١٩٩٦ی جە فەرمانڎەیی قەرارگەو ئارگەکەینەبۍ. جە زاپ، مەتینا، گارەنە پېوەرە هەرمانەما کەرڎە. پېوەرە بەشڎاری جە کۊبیەیۊکانە کەرېنمۍ. گفتووگۊ سەروو قۊرتەکا ڕېکوستەی کەرېنمۍ، بە جەنگوو پەروەردۊ سەر حاڵۍ بېنمۍ. جە چارەکەرڎەی قۊرتەکانە رازی کەرڎەی ئینسانەکا و پەروەردەنە، جە سازکەرڎەی پەیوەنڎی چنی ئینسانەکا، وەڵۍ گردیۊ بۍ. وەڵۍ گرڎ کەسینە جە مەنتیقېوە لوۍ پۍ مەنتیقېوەتەری. ۋېش جە ۋېسەنە گەشمەرڎەبیەیچش پی جۊرەبۍ. ۋەروو ئانەی بڕۍ قۊرتۍ چارەسەرۍ نەبېنۍ ۋېش پۍ چارەسەرکەرڎەیشا تەرخان کەرڎوو پا هەستە ۋەرپەرسیۊ زیاتەر رووبەڕوو دژواریەکا بېوە و جە کەمینېوە دوژمنانە بەشېۋېوە دڕنڎانە گەشمەرڎۍ بیە.

مشۊم ئینسان هەڤاڵ زەینەبۍ پی جۊرە بشناسۊ. جە ژەنە یووەمەکا نەبۍ کە بەشڎاری گەریلایش کەردەبۍ، بەڵام فرە زوو ۋېس وەڵۍ وست. خەباتوو گەریلابیەو ژەناش زیاتەر وەڵۍ وست. پۍ بە ڕېکوستەبیەی و ئەرەمەرزناو یاژکی و بەپارتی بیەی پېسە سەرمەشقۍ بەشڎاریش جە هەرمانەکاشەنە کەرڎ.

سەید ئەڤران ئەنجامش دۍ و ویر کەرېوە، ویرکەرېوەو ئەنجامش دۍ  

ئانۍ هامڕا سیدی ئشناسېنۍ فرېنۍ. پۍ ساڵانۍ فرەی چنی گەریلای مەنۊ. سەرەتا جە خەتەو ئامەڎ- دېرسیموو سەرنیشتوو کورڎسانی جە فرەو مېڎانەکانە مەنۊ، کۊشیا، دماو پیلانگېڵی سەرجە نۊ بەشڎاریش جە خەباتوو پڕووپاگەنڎەی و یاۋنەرینە کەرڎۊ، فرە مانیایش چنی کېشت، بەدەیان و سەڎان کادرۍ یاونەریش پەروەردەکەرڎۍ و بەرهەمۍ فرېش خوڵقنۍ. هەڤاڵ سەید وەختۍ چېوېش کەرڎۍ ویر کەرېوە، ویر کەرېوەو ئەنجامش دۍ.

بەشڎاریش جە فرەو خەباتی دژوارینە نەکەرڎ، کتېبۍ فرە گۊرېس نەنویستۍ، ۋنەکۊڵیای تیرۊریک، توېژینەوە و گفتوو گۊی فرە قوڵش نەکەرڎ. یان من نەدیەنم. کەم کەس متاوۊ پېسە ئاڎیی پېناسەو ژیۋای ۋېڕسکی و کوڵی کەرۊ. بڕۍ جار بە کەلیمېوە، بەبزېوە تاوۍ فرەو چېوی باس کەرۊ.

مردایش پنە نەگنۍ، نەسرەوۍ، یاخوڎ پۍ ئانەی کۊشیای ئازاڎیی وەڵېگنۊ، پۍ ئانەی گەلوو مرۊڤایەتی کۊشیای بشناسا. پۍ پەروەردەکەرڎەو گلېرگەی بە شەوو ڕۊ هەرمانە کەرۍ. نەوەشی و مانیایی پۍ ۋیش نەکەرۍ بە لەمپەڕ، جە چوارلاو کورڎسانی سەروو خەتەو ڕوسیا-ئەرمینیای، جە گرڎ یاگېنە توۍ ۋېش بیاونۊ حۊڵی فرە دۍ. زوو ویرکەرېوە و زوو قەراردۍ و پلانە نیېرە. تا دما هەناسەش فرە حۊڵش دا.

بی بە خولقنەروو میراتێوە گەورەی

دما وەسیەت و ئەرەسپارای ئادی... جە دۊخێوە پاسە دژوار و ئەستەمنە ئا گرڎوو ورڎبییەیوە و هەست و ئەندێشە ماوێوە کەمی چانەنە، پێناسەکەرڎەیش ئاسان نییا. هامڕا سەید ڕاسیی وێش خاس نیشانە دا. بە یاواینەی و وەشەسیای پەی ژیوای، بە وەشەسیای، زانای و وێڕێکوستەی کۊشیا. ئانە جەدەسش ئاما کەرڎش، فرە ئەزموونۍ و بەهێش ئارڎۍ کایەوە و وستێش خزمەتوو کۊشیایۊ، گرڎوو کایەکاو کۊشیاینە بەشدار بۍ و بی بە خولقنەروو میراتێوە گەورەی.

بە دژواری و ئاستەنگەکا ئێشش تووش بۍ، وەلۍ حەرگیز جە ئامانجەکەیش نەبڕیۍ. جە دژوارتەرین هەلومەرجنە وەختۍ فرسەتش پەی خزمەت بە کۊشیای و ڕۊشنگەری وینێوە، بۍ گۊشدای بە قۊرت، ئێش و دژوارییەکا پڕوپاگەندە و بانگەشە پەی خەباتی شۊڕشگێڵنی کەرۍ.  

بە هێز و تاسەوە ڕۊنامەوانی و پەروەرڎەکاری و خەباتوو پڕوپاگەندە-بانگەشەی کەرڎۍ، فرە حەوڵۍ دۍ بەکرڎاری کۊشییۊ، دەسکەوتۍ و بەرهەمێش فرۍ بێنۍ.  

پڕوپاگەندە بوار و مەیدانێوە پەروەرڎەیین

خەباتوو ئەرەیاونای و وەڵاکەرڎەیوە، بەتایبەتی جە یەرەم سەرڎەموو پارتیبییەیمانە، مەیدانی سەرەکیی پڕوپاگەندەی و بانگەشەین. مەیدان و بوارێوە پەروەرڎەیین. پڕوپاگەندە- بانگەشە، پەروەرڎەن. پەروەرڎەو پارتی، پەروەرڎەو گەلی وەڵاتپارێزنی، پەروەرڎەو گەنجا و دۊسان، پەروەرڎەو ئینسانیەتی. وەڵتەرۍ پێسە جمیەری پڕوپاگەندە و بانگەشەی زارەکی کەرێنمۍ و سەرکەوتۍ بییەیمۍ. سەروو بنەماو پڕوپاگەندەی چەکدارییچ جە ڕاو گەریلایۊ؛ ئێمە چایچەنە سەرکەوتیمۍ. ئێمە جە ڕاو چاپەمەنی- وەڵاکەرڎەیۊیچۊ سەرکەوتیمۍ، وەلۍ قۊناغەکە هەڵای بەرڎەواما.

مشۊم ئانەیە خاس بزانمێ؛ ئینسان جە چالاکیینە تەنیا بە ڕێکوستەی سەر گنۊ، ڕێکوستەیت بۊ، هێزیچت بۊ، تۊ چالاکیی قەوەت کەری. نۊعی تەر مەبۊ، ڕێکوستەیچ  جە ڕاو پەروەرڎەیۊ ساز کریۊ. بۍ پەروەرڎەی ئینسان مەتاوۊ کەسی ڕێک وزۊ و قایلش کەرۊ. مەتاوۊ شێوە بە هەست و هزریشا بەخشۊ. خەباتوو ڕێکوستەی بنەڕەتنە خەباتی پەروەرڎەیین. پەروەرڎەیچ پڕوپاگەندە و بانگەشەن و ئێمە چی سەرڎەمەنە، سەرڎەموو یەرەمینوو پارتیبییەیەنە جە ڕاو ئامرازوو ئەرەیاونای- وەڵاکەرڎەیۊوە کەرمێش.  

وێش پەی وێش ڕێکوستەی جە ڕاو خەباتو ئەرەیاونای- وەڵاکەرڎەیۊوە، کە بە پەروەرڎەوە ملۊ ڕاوە، هێزوو وەڵێوستەی کۊشیای ئازاڎی و شۊڕشگێڵنیی خەباتوو چاپەمەنی- وەڵاکەرڎەیوە، پڕوپاگەندەی و بانگەشەین. مشۊم ئانەیە جبەروو کۊشیای و پراتیکیوە نەوینمۍ. مەبۊ حەرگیز ویرما بشۊوە، کە خەباتوو ئەرەیاونای-وەڵاکەرڎەیۊ، پڕوپاگەندە، بانگەشە، خەباتوو پەروەرڎەکەرڎەین. مشۊم ئینسان پەروەرڎەی جە ڕێکوستەی و چالاکی نەبڕۊرە. 

مەزڵوم دۊغان ئانەشە بەتەمامەتی کەرڎ. عەلیشێر کۊچگری، غوربەتلی ئەرسۊز، سەید ئەڤران ئانەشا بەتەمامەتی کەرڎ، خەتەی دروسە و ڕاسە ئانۍ بۍ. پڕوپاگەندە و بانگەشە جە ڕێکوستەی و چالاکی بڕیۊرە، بێدلێنە و بێمانا. حیچ ئامانجێوەش نییا. حیچ مانا و بەهێوەیچ پەی خەباتی بەبۍ ئامانج نییا..

ئینجا بە ڕێکوستەی  کە پێویسیش بە چالاکی نەوینۊ و بە پاو تایبەتمەندیی ئانەیە شێوە نەگێرۊ، خەباتوو پڕوپاگەندە- بانگەشەی پا دەورەیە کە وازییۊ مەیاوۊ بە ئەنجام. مشۊم ئێمە ئا هەرمانۍ بە پاو ئامانجەکا کەرمۍ. چەنییبییەی ئا هەرمانۍ کە کەرمێش، مشۊم بە پاو ئا جەوهەرەیە بۊ. واتە، نویستەی، شێوازوو بەروستەیما، جموجووڵ، جلوبەرگ، گرڎ چێوێما بە پاو ئامانجەکەیما بۊ. ئا ئامانجەو ئێمە گنۊ خزمەتوو سەرکەوتەیما. ئانە چەنی کرییۊ؟ دەوروو پەروەرڎەکەرڎەی ئەرەپڕنۊ. ئانەیچ پەی وەڵێوەبەرڎەی ڕێکوستەی و چالاکی پەی ئازاڎی بۊ.  

پەشتیبەستەی بە گلێڕگەی لاوازا

چی ڕووەوە کەموکوڵیۍ ولاوازیۍ هەنێ؟ بە ڕاو منئێمە گفتوگۊ کەرمۍ، ڕەخنە و ڕەخنەدای کەرمۍ، وەلۍ یاواینە جە ئامانج و ئەقڵەیەتوو دوورکەوتەیۊ جە ئامانجی هەن. هەڵوێستوو بەئامانجنەگێرتەی سەرکەوتەی هەن، ئێمە چی پڕوپاگەندە- بانگەشە کەرمۍ یا چی خەباتوو ئەرەیاونای-وەڵاکەرڎەیۊ کەرمۍ، ئانێچ هەنۍ، کە مەتاوا جواب بداوە، چی ڕووەوە ناوریایی هەن. هەڵوێست و جموجووڵوو بە بەیاگەنەیاونای هەرمانۍ هەن. 

پەشتیبەستەی بە گلێرگەی لاوازا. ئێمە ئەرەیاونای ئازاڎ، خەباتی پەروەرڎەیی گەلی و گلێرگەی بەرمۍ ڕاوە. ئامانجوو خەباتوو ئەرەیاونایما ئانەنە. مشۊم ئینسان ئا ئامانجەیە  بگێرۊرەوەر و گلێرگەپارێزن و گلێرگەتەوەر بۊ. چەنی گلێرگەی بۊ. پەشتی بە هێزی کۊمەڵایەتی بەسۊ، زیاتەر گلێرگەی گێرۊ وێش، ئانە کەم کریۊ.  

مەیدانەکە فرە وەرتەسک کریانۊ، پێسە هەرمانۍ جیاوازێش پەنە ئامان، وەلۍ ڕاسیینە مەبۊ چانە بۊ، وێش پەی وێش بەفرەیی وچییۊ خەباتی پیشەیی و ناپیشەیی. ئا جیاکەرڎەیۊ غەڵەتا. ڕاسا تایبەتمەندیی پڕوپاگەندە- بانگەشەی هەن، پەی سەرکەوتەی، بەیاگەیاونای دەوری پەروەرڎەیی، مشۊم ئینسان ئا تایبەتمەندییا بزانۊ. وەلۍ بڕۍ کەسۍ ئانەیە کەرا، مشۊم ئێمە نەواچمۍ کە ئانە بە  بڕۍ کەسا کریۊ، تا ئێمە بتاومۍ گەنجا و ژەنا بەشداری پەنە کەرمۍ. مشۊم مەیدانێوە بە ڕێکوستەی چانە بۊ، مەیدانوو  پەروەرڎەی و ڕێکوستەی بۊ، بۊ بە ناوەندێوە سەرنجئەرەکێش. مشۊم بۊ بە ناوەندێوە هاندای گلێرگەی بەرەو کۊشیای.

ئەگەر ئێمە جە مەزڵوم دۊغانیوە تا سەید ئەڤران، جە ڕاسیی گەشمەرڎاو  ئەرەیاونای ئازاڎی، خەتۍ ئاپۊیۍ بەدروسی بیاومێنە، ئا وەختە مشۊم ئێمە پاسە مامەڵە چەنی خەباتوو پڕوپاگەندە- بانگەشەی کەرمۍ. گەر پاسە بۊ سەرۍ گنمۍ..

ئانۍ پەی ئامانجێوە گەورەی هەرمانە کەرا، خاستەرین هەرمانە کەرا

ئینە هەرمانێوە نییەنە کە بە هێز، فرسەت و تەکنیک کریۊنە، تەکنیکەکەیچش گرنگا. چێوەکای تەریچ گرنگێنۍ، ئا وەختە هەڵای ئامراز و کەرەستێوە نویسا نەبۍ، ڕابەر ئاپۊ و ئا کەسۍ کە چەنیش بێنۍ، بە زارەکی ئا هەرمانێشا کەرڎە. ڕۊنامەنویسێوە وەنەو ڕابەر ئاپۊی پەرسۊ؛ گەورەتەرین چەک چێشا؟ بۍ دووەدڵی ماچۊ؛ "زوانوو من". گەورەتەرین ئامراز و چەکا، کە ڕابەر ئاپۊ جا ڕێوە گرڎوو هەرمانەکاشنە سەرکەوتە بی، زوانش بۍ. گەریلا ساڵەکاو هەشتاکا و نەوەدەکا بیۍ بە  پەروەرڎەکارتەرین هێزی کۊمەڵاتی. بە ئەرەیاونای و وەڵاکەرڎەیۊ جە ڕاو ڕۊنامە، گۊڤار، ڕادوێن و تەلەفزیۊن، دیجیتاڵ میدیا، بە گرڎ چێوی ئینسان متاوۊ کەرۊش. ئێمە جە گرڎ کەسێوە خاستەر متاومۍ کەرمێش، چون ئێمە پەی ئامانجێوە کەرمێش، پەی خولقنای ژیواێوە تازەی کەرمێش، پەی دلێنەبەرڎەی ئەقڵیەت و سیاسەتوو فاشیزمی، ئەرەگیری و قڕکاری کەرمێش. پەی دماییئارڎەی بە سیستموو ئەشکەنجە و گۊشەگیریی ئیمراڵی، پەی دەسوستەی ئازاڎیی جەسەیی ڕابەر ئاپۊی کەرمێش، پەی چارەسەروو کێشەو کورڎی، کورڎستانی و تورکیێوە ئازاڎی، دیموکراتیزەکەرڎەی وەرکەوتوو دلێڕاسەی کەرمێش. ئێمە پەی ئانەی ئینسانیەت بتاوۊ بە ئازاڎی بژیوۊ، پەی هەرمانۍ گەورۍ نەک گولان، ئانۍ پەی هەرمانۍ گەورۍ هەرمانە کەرا خاس خاسۍ کەراش. ڕاستتەرین قسۍ کەرا و خاستەرین جووڵە کەرا، خاستەرین هەوالۍ ئامادۍ کەرا و پێشکەش کەرا، قووڵ منویسا و دلێوە باوڕشا پەنەش هەن، چونکوم دووەڕوۍ و ساختەکارۍ نییەنۍ. قسۍ و ژیوایشا یۊن، چەنی منویسا پاسەیچ مژیوا، پەوکای کاریگەری منیارە و قوەو قەناعەتیشا ھەن، مشۊم ئێمە پاسنۍ بیمۍ.

خەتەو ئەرەیاونای ئازاڎی، خەتەو گەشمەرڎاو ئەرەیاونای ئازاڎینە. کۊشیای بنەڕەتیین پەی ئازاڎی، خەتەو گیانبازاو ڕابەر ئاپۊینە. مەبۊ کەس نۊعێوە تەر بوینۊش. ئێمە بڕواما پانەیە هەنە، دژواری و ڕاگیرۍ هەنۍ، ئەگەر ئینسان بتاوۊ بە عەشق و وەشەسیای، بە حەوڵۍ و مانیای، تامەزرۊییوە دەرەقەتوو ئا دژواری و قۊرتا بۊوە، یەکسەر ئامانجەکە میاوۊ یاگۍ، کۊشیای گەورە بە وەشەسیاییوە بەرڎەواما، گلێرگە زیاتەر پێسە پەروەرڎە بۊ، ڕاسیییش بەرگنۊ.

شۊڕشوو ڕۊشنگەری کە جە ڕابەر ئاپۊیۊ، سەروو بنەماو ویەرنای کورڎی و وەڵاکەرڎەیۊ وەرکەوتوو دلێراسەی و گرڎوو ئینسانیەتیوە دەسش پەنە کەرڎ، سەروو بنەماو گێرتەی باوشەو ژەنا و گەنجا بەرڎەواما و گەشەتەر بۊ. جمنەرەکەش، خەباتوو ئەرەیاونای ئازاڎی و وەڵاکەرڎەیۊن. ئا جمنەرە بە دروسی هەرمانە کەرۊ، شۊڕشوو ڕۊشنگەری گەشتەر، قووڵتەر و وەرفراوانتەر بۊ و ملۊیچ وەڵێوە. من قەناعەتم چانەن سەروو ئا بنەمێوە، جە کەسایەتیی مەزڵوم، عەلیشێر، زەینەب و سەیدینە یادوو گرڎوو گەشمەرڎاو ئەرەیاونای ئازاڎی و کۊشیای ئازاڎی، بە ڕێز و وەشەسیای و پەنەزانایۊ کەرووە، ھومێدوو سەرکەوتەی پەی گرڎوو ئا هامڕایا موازوو، کە سەروو ڕاو گەشمەرڎاوە بە تامەزرۊییوە خەباتوو بانگەشەی و پڕوپاگەندەی کەرا.