بەپاو سەرچەمە هەواڵیەکا ۋەرکەوتوو کورڎسانی، هېزی ٢ۍ مامۊسۍ و چالاکۍ شاروو دېولانی، سیرووس عەباسی و ئازاڎ عەباسی، دماو چڕیەیشا پۍ ئیتڵاعاتوو ئا شارەیە گیریۍ و ڕەونەو زینڎانی کریۍ.

ئینەیچ جە وەختېنە چن ڕووۍ چېوەڵتەر سیرووس عەباسی، ئەنڎاموو دەسەی ڕاوەبەری "پەیمانگای پەروەرڎەیی زانستی کورڎسانی" ئەرەیاۋنابېش، وەزارەتوو پەروەردەی ئیجازەو هەرمانکەرڎەی ئا پەیمانگایشە هۊرشېۋنانۊ.

ئانەیچ وزیان ڕووە، ئیجازەو هەرمانکەرڎەی ئا ئینیستیۊتەیە بەمەڵامەتوو"بەڕەسمیکەرڎەی فېربیەی زۋانی کورڎی جە پەیمانگاکەنە، پەشتیوانی جە مامۊسایا گیریای و پاڵپەشتی کەرڎەی جە ناڕەزاییە سەرانسەریەکا سەرهۊردای ژەنی، ژیای، ئازاڎیی" هۊرشېویانۊ.

ساڵەی ۋیەرڎۍ جە گەرمەو ۋېنیشانداکا سەرهۊردای"ژەنی، ژیای، ئازاڎیی"نە سیرووس عەباسی و ئازاد عەباسی بە مەڵامەتوو پاڵپەشتیکەرڎەیشا جە ۋېنیشانداکا جە لاو هېزەکا دەسەڵاتیۊ جە شاروو دېولانی گیریۍ و دماو ماوېوە بە نیایرەی بارمتەی ئازاڎۍ کریېبێنۍ و دماتەریچ داڎگاو شاروو دېولانی سزاو ٦ ساڵا زینڎانیش سەروو ئا دووە چالاکەی-رە سەپنابۍ.