ئەنداموو دەسەو ڕاوەبەریی کەجەکەی خەبات ئاندۊک، بە بۊنەو ساڵیادوو پیلانگێڵنیی ٩و تشرینوویوەمیوە قسێش کەرڎۍ و واتش، دژوو ئا جینۊسایدا کە ملوو گەلوو کوردیرە کریا، گەورەتەرین وەرپەرسبییەی گنۊ گەرڎەنوو ژەنا و گەنجا".
ئەنداموو دەسەو ڕاوەبەریی کەجەکەی خەبات ئاندۊک سەبارەت بە ساڵیادوو پیلانگێڵنیی ٩و تشرینوو یوەمی، کە دژوو ڕابەروو گەلوو کوردی عەبدوڵڵا ئۊجالانی کریا، قسێش سەروو دەور و وەرپەرسبییەی ژەنان چی سەرڎەمەنە کەرڎۍ.
ئاندۊک یادش وستیمێوە، کە ٢٥ ساڵۍ سەروو پیلانگێڵنیی میاننەتەوەییرە ویەرڎەن، کە ٩و تشرینوو یوەموو ١٩٩٨ دەسش پەنە کەرد و ئانەش وست ڕووە، کە سیستموو ئیمراڵییچ هێزە پیلانگێڵنەکا ئەرەمەرزنان.
ئاندۊک واتش، کە ماوەو ٢٥ ساڵانە دژوو پیلانگێڵنی کۊشیاێوە گەورە کریان و ئا گەشمەرڎۍ دژوو پیلانگێڵنیی میاننەتەوەیی گیانوو وێشا بەخشان، بە ڕێز و پەنەزانایۊ یادێش کەرڎێوە.
ئاندۊک واتش، "تا یاوای بە ئازادی و سەروستەی ئامانجوو گەشمەرڎاما، ئێمە درێژە بە مدرامانی مدەیمۍ. سەروو بنەماو خەتەو سەرکەوتەیۊ کۊشیای و مدرامان درێژە پەنە مدەیمێ".
ئەنداموو دەسەو ڕاوەبەروو کەجەکەی خەبات ئاندۊک درێژەنە واتش، "بێگومان ماوەو ٢٥ ساڵانە ئانۍ فرەتەرین مدرامانشا دژوو پیلانگێڵنی کەرڎەن، بیۍ بە قەڵغان پەی ڕابەرایەتی و سەرکەوتەی مدرامانی، ئانۍ قەوەتتەرین کۊشیای کەرا و ژەنی و گەنجۍ بیێنۍ. وەروو ئانەیە پەیوەندیی ڕابەرایەتی چەنی ژەنا و گەنجا جیاواز بۍ. ئا دووە بەشاو گلێرگەیە لاو ئەرەگیراوە و لاو سەرمایەداریچۊ و لاو گلێرگەیچۊ گیریێنۍ. دلۍ گلێرگەینە ئانە زیادتەر پێویسش بە ئازادی و وێڕاوەبەری هەن ئادێنۍ. ئانەیچ جە خەتەو ڕابەر ئاپۊی و دلۍ کۊشیای ڕابەر ئاپۊینە موینییۊ. هەم ژەنی هەمیچ گەنجۍ دیشا، کە ڕابەرایەتی پەیشا کۊشییۊ، پەیشا هەناسە مدۊ و خەبات کەرۊ. سەروو ئا بنەمۍ بە دڵسۊزیی گەورەوە هاگاداری جە خەتەو ڕابەرایەتی کەرا، بە گیانبازانە کۊشیێنۍ و ئا کۊشییایە هەڵای بەرڎەوامیچا. جە سەرەتاو پارتەکەیماوە تا ئیساتۍ پەیوەندیی فرە قەوەت بەینوو ڕابەرایەتی و گەنجانە هەن، وەروو ئانەیە جمیەروو ئازادی جە کەسایەتیی ڕابەر ئاپۊینە پێسە جمیەرێوی گەنجانەی دەسش پەنە کەرد".
کورڎۍ ئازادۍ وێشا مەدا دەسۊ
خەبات ئاندۊک وستیچش ڕووە، کە پەکەکە و ڕابەروو گەلوو کوردی عەبدوڵڵا ئۊجالان جە سەرڎەموو ئەرەمەرزنای پارتەکەیۊ تا ئیساتۍ چێششا کەرڎەبۊ پەی گەلوو کوردی و بە تایبەتی ژەنا و گەنجاشا کەرڎەن و واتش، " وەروو ئانەیە ڕابەرایەتی گەرەکش بۍ ئایندەو کورڎا و ئی چارەنویسەیە فاڕۊ، گەرەکش بۍ ئانەیە جە کەسیەتیی گەنجانە کەرۊ. بێگومان جە ڕووەو بایۊلۊژییوە ڕابەرایەتی و جمیەروو ئازادییچ گەورۍ بیۍ، وەلۍ کاراکتەر و کەسایەتیی جمیەروو ئازادی جە کەسایەتیی ڕابەرایەتیینە بەرڎەوام بەگەنجی مەنۊ. یانۍ ڕابەرایەتی و جمیەروو ئازادی بەرڎەوام بەگەنجی مەنێوە".
خەبات ئاندۊک واتیچش، کە ئەرگیرۍ بە گردوو هێزوو وێشاوە ئیساتۍ هجووم کەرا سەروو گەلوو کوردی، وەلۍ مەتاوا بیاوا ئەنجام و واتش: "هەرپاسە پەی دلێنەبەرڎەی کورڎە ئازادیوازا، هامکاری چەنی کورڎە نۊکەرا و دارڎەسا کەرا و بە هامکارییشا هجووم کەرا. وەلۍ کوردی ئازادیواز درێژە بە بییەی وێش مدۊ، هاموەخت بە گیانێوە فیداییوە بەرڎەوام بۊ. لاێوە تەرۊ مۊدێرنیتەی سەرمایەداری درێژە بە سیستموو ئیمراڵی مدۊ، هەم جە ئاستوو ئەشکەنجەینە گۊشەگیری سەروو ڕابەر ئاپۊی سەپنۊ و پەی سەروستەی جینۊسایدی دژوو گەلوو کوردی بە گرد نۊعێوە پەشتیوانی وەنەو هێزە ئەرەگیرەکا کەرۊ".
وەلۍ وەختۍ ئینسان سەرنجە مدۊ جە ئەنجامی، موینۊ کە ڕاسییەکە چینەنە ؛ کورڎۍ ئازادۍ هەنۍ، کۊشییا، وێشا مەدا دەسۊ، پەی ژیواێوە ئازادی و یەکسانی چێش پێویس بۊ کەراش. ئانەیچ ئەنجاموو هەڵوێستوو ژەنا و گەنجان".
پیلانگێڵنی پەی دلێنەبەرڎەی جمیەرەکەیما ٢٥ ساڵێن هەن
ئەنداموو دەسەو ڕاوەبەریی کەجەکەی خەبات ئاندۊک ئەرەیاوناش، کە چی سەرڎەمەنە دەور و هەرمانۍ فرە گرنگۍ گنا گەرڎەنوو ژەنا و گەنجا و پێسە درێژەش بە قسەکاش دا: "ئا پیلانگێڵنییە پەی دلێنەبەرڎەی ڕابەرایەتیما، گەلوو کوردی و جمیەرەکەیما ٢٥ ساڵێن هەرمانە کەرۊ. لاێوە تەرۊ ١٠٠ ساڵێن دژوو گەلوو کوردی سیاسەتوو قڕکەرڎەی بریۊ ڕاوە. جە کەسایەتیی ڕابەرایەتینە، جمیەرەکەما و کوردی ئازاد گەرەکشانە هومێدوو ئازادیی ژەنا، گەنجا و تەماموو ئینسانیەتی دلێنە بەرا. وەراوەروو ئینەیچەنە مدرامانێوە گەورە کەرا، وەروو ئانەیە دوژمنوو ئێمە دەس جە مامەڵەی پاکتاوکارانەی ورمەگێرۊ. پەوکای هەرمانە و وەرپەرسبییەی سەرڎەمی فرە فرێنۍ. وەروو ئانەیە ژەنی و گەنجۍ سەرمەشقێنی، چی ڕووەوە گرنگتەرین هەرمانە و وەرپەرسبییەی ئینا سەروو شانەیشاوە.
مشۊم گەنجاو کوردی ژیوای فرە بەخاسی شرۊڤە کەرا. دژوو ئا ژیوا بێشکۊیە کە ملوو گەنجاو کوردیرە سەپییان، مشۊم حەرچی تواناشانە بۊ بە کۊشیای کەراش، مەبۊ چەمەڕاو گەورەکا با، هەرمانەو گەنجا پاریزنای گلێڕگەی و خولقنایشا بە تازەتەر، پەوکای چارەنویسوو کوردی ئینا دەسوو گەنجانە. جە ئایندەو کوردینە ھەڵوێستوو گەنجا یەکلاییکەرەوە بۊ. پەوکای مەبۊ گەنجۍ هەرمانەو وێشا بدا دەسوو کەسیوە، ئی ساتەوەختە تارێخیین و مشۊم بە دروسی هەستش پەنە کریۊ، چونکوم ڕۊحوو حەرسەرڎەمێوە جیاوازا. چی وەختەنە دەسەڵاتوو ئاکەپە-مەهەپەی تا ڕەگ و ڕێخەو کوردی دلێنە بەرۊ، گردوو ئەگەرەکاو جەنگیش وستێنۍ هەرمانە. یانۍ وەختۍ ئینسان بارودۊخوو ئی سەرڎەمەیە ورسەنگنۊ موینۊ، کە پڕۊسەکە ئەوەڵ تا ئاخر جەنگا. دوژمن ڕۊ تا وێرەگا باسوو هجوومی سیاسی، کولتووری، ئابووری و جینۊسایدی جەسەیی کەرۊ.
گردوو ئی هجوومە قڕکارییا بەتەمامەتی چوارچوەو جەنگینە کەرۊ، وەلۍ بڕێشا پێسە نییەنۍ، ئینۍ بەروو جەنگیوە، پێسە ئانەی جەنگ تەنیا دژوو بڕۍ کەسا بۊ. وەلۍ ئینە دیاێوەن دوورا جە ڕاسییوە. دەوڵەتوو تورکی ئەرەگیری، مۊدێرنیتی سەرمایەداری ئا کورڎە دارڎەس و خیانەتکارێشا وستێنۍ وەڵۍ وێشا و بە پەشتیبەستەی بە ھێزوو ئادیشا پەی ڕیشەکێشکەرڎەی کوردی گردوو فرسەتەکا بەکار مارا. نە تەنیا جەنگ کەرا، گرد چێوی چوارچوەو جەنگوو جینۊسایدینە کەرا. پەوکای مشۊم ڕۊحوو ئی سەرڎەمەیە خاس ورسەنگنیۊ بزانی دلێشەنە جەنگ هەن. پەوکای حەرلێوەنە بینمۍ، مشۊم بە ڕۊحێوە فیدایی جووڵییەیمێوە، بە ئامادەباشیێوە گەورەوە حەر مەیدانێوە فاڕمۍ پەی یاگۍ مدرامانی. سەروو ئی بنەمێوە مشۊم پەی ڕابەرایەتی بیمۍ بە هامڕاێوە خاس و پەی دەسوستەی ئازادیی جەسەیی ڕابەرایەتی سەرمەشقانەو کەمپینەکا کەرمۍ. مشۊم هاگاداری جە هەرمانۍ و وەرپەرسبییەی وێما کەرمۍ. جە ٢٦ـەمین ساڵیادوو پیلانگێڵنیی میاننەتەوەیینە مشۊم بەتەمامی پیلانگێڵنییەکەی ماڕمۍ. جارێوە تەر سڵاموو وێما ئاڕاستەو ژەنا، گەنجا و گردوو گەلە وەڵاتپارێزنەکەیما کەرمۍ و هومێدوو سەرکەوتەیشا پەی موازمێ".
س.ز
