کۆمیتەو ئایینی و گەلا کەجەکەی داواش کەرڎ، دووڕوویی دەسەڵاڎداری تورکی بە سەردەستەیی ئەردۆغانی ۋینیۊ، کە پۍ فەلەستینی داواو "دڎانگېرتەی وېشەرە"یش کەرڎەبۍ. کەجەکە داواش جە گرڎ لېوە کەرڎ، کە دژوو ئا ستەمکاریا مرداوە، کە سەروو کورڎی ملۊڕاوە.
کۆمیتەو ئایینی و گەلا کەجەکەی ئەرەیاۋناش، کە دەوڵەتوو تورکی گەرەکش نیا کورڎ بۊ بە خۊتان قەوارېوە؛ قبوڵ مەکەرۊ کە کورڎ بە زۋان و کولتۆروو ۋېش سەروو خاکوو ۋېش، ۋېش ڕاوەبەر کەرۊ، تەنانەت وەرگەو بیەو کورڎیچ مەگېرۊ، و ۋاتش، " ئێمە داوا جە موسڵمانا گرڎوو نەتەوەکا و بەتایبەتی کورڎی کەرمۍ، کە بە شێۋېوە بەقوەتتەر و رێکوزیاتەر ناڕەزایەتی ۋېشا بەربڕا، دژوو ئا دوژمنایەتییەی ۋەران ۋەر بە ئایینی، مرۆڤایەتی و ئەخلاقینە کریۊ.
ئەرەیاۋناکە پی جۊرەنە:
“ دەوڵەتوو تورکی جە ٧و تشرینوو یۋەمینە هجومش کەرڎ سەروو مزگیېوە کەمپوو پەنابەرا مەخموری، ئێمە ئی هەرمانۍ شەرمەزار کەرمۍ. گەلوو مەخموری جە ساڵەکا ١٩٩٠یۊ تا ئیسە دژوو فاشیزموو دەولەتوو تورکی و هجومە تاڵانکاریەکا و ئەرەگیری هێزەکا پەدەکەی و ئانۍ کە هامپەیمانېنۍ چنیش، کۊشیا. سڵام چا کۊشیا گۊرەیە و ئا هەلوێستە ۋېڕاگرانەو گەلوو مەخموری کەرمۍ.
هجوومە قڕکاریەکۍ بەردەوامېنۍ
دەوڵەتوو تورکی فاشیست و ئەرەگیری، بە کەڵک هۊرگېرتەی جە هەستوو ئایینی خەڵکی، هجومە قڕکاریەکۍ ۋېش جە کوردسان چڕتەر کەرڎېنۍ، بەردەواما. دماو ئا چالاکییە فیداییەی کە جە ناوەنڎوو ئەنقەرەی ئەنجام دریا، پۍ شارتەیۊ ئا گورزۍ کە ۋەرشا کۊت، پۍ وەشکەرڎەی ۋێنېوە بەقوەتوو دەوڵەتی و پۍ ۋیەرناو ئا شۆکە گۊرەیە کە چنەشەنە ژیۋېنۍ، سەروو ۋەرنیشتی و شەنگالی هجومی قرکاریشا ئەنجامدا. بە بەرزتەرین ئاست تاوانی جەنگی بەردەوامۍ بېنۍ جە ئۆپەراسیۆن و هجومەکاشانە سەروو هەرێمەکا پارېزنای مەدیای و هەرەشېشا جە فرېوە جە شارەکا پېسە سلێمانی کەرڎ، پا شێوازە واتشا کە جە ڕیزوو ئامانجەکاشانۍ. ئی هجومە قرکارییە درێژەپنەدەروو ئا پلانېنە پۍ قووڵکەرڎەیۊ زیاتەروو پیلانگێڵی دژوو ڕابەریما.
بۍ ئانەی شەرم کەرۊ پۍ غەززەی داواو' ۋن سەردی و دڎان گېرتەی ۋېرە' کەرۊ
دەوڵەتوو تورکی و هامبەشەکاش کە زۋانی کورڎی قەڎەغە کەرا، ۋەرگەو ۋېڕاوەبەری گەلوو ئێمە مەگېرا و پی جۊرە داواکاری هەرە مرۆڤ دۆسا بە 'تیرۆر' پێناسە کەرا، قسۍ ئیسلامیۍ سەروو دەمیشاوە لا مەشا کەچی کورڎی کوشا و نکوڵی جە بیەیشا کەرا. حەرپاسە بێ شەرمانە بانگەوازوو ۋېشا پۍ ' پشوودرێژی' جە جەنگ و غەززەینە وزا ڕووە و ڕەخنە جە کوشتەی خەلکی مەدەنی، زارۊڵا و ژەنا گېرا، پېسە ئانەی کە لاشاوە فرە گرنگا. ۋیروو ئا کەسا وزمېوە کە مەزانا یان ۋیرشا شیەن کە بە پاو پرەنسیپی داڎپەروەری جە ئایینەنە، کوردیچ پېسە موسڵمانا تەری مافوو ۋېشا سەروو نیشتیمانوو ئەڎاو ۋېش و خاکوو باوان و ۋېشۊ بژیۋۊ. بەکارئارڎەی زۋانی جە گرڎ لایەنەکا ژیۋاینە شەرتا پۍ ئینسانی. پېسە گرڎوو گەلا، سروشتیتەرین مافوو ۋېشانە چا یاگېنە کە چنەشەنە ژیوا ۋېشا بەرا ڕاوە و ڕێکوستەی کۆمەڵایەتی ۋېشا مەرزنارە. داواکەرڎەی مافوو داواکاریېوە مرۆڤانە و سروشتییا. سیاسەت و عەقڵوو دەوڵەتوو تورکی ئیسلامیی دەسەڵاتدار قەبووڵ مەکەرۊ کە کورڎ بۊ بە خۊتان قەوارەو ۋېش، دەرفەتوو ژیۋایۍ مرۆڤانەیشا بۊ، بە زۋان و کولتووروو ۋېش جە نیشتیمانوو ۋېش، ۋېش بەرۊڕاوە. تەنانەت وەرگەو بیەو کوردی سەروو زەمینیۊ مەگېرۊ.
گەلوو مەخموری ۋۍ دای دەسۊیش قبوڵ نەکەرڎ
گەلوو مەخموری گەلێوەن کە بە درێژایی تاریخوو ۋېشا بە مدرامان دژوو چەوەسنایۊ ستەمکارا ئشناسیېنۍ. ساڵانێوەن چېروو هجوموو تورک-ئیسلامییەکا دەوڵەتوو تورکی فاشیستینە دەرفەتەکۍ ژیۋایشا خوڵقنېنۍ حۊڵ مڎا بیەو ۋېشا دەسەبەر کەرا. گەلېوەنۍ کە چۆک پۍ هجومە فاشیستەکا دەوڵەتوو تورکی مەڎارا و ڕووەشا جە جمیەری ئازاڎیی کەرڎ و چېروو سەختتەرین ئاژەینە ناچار بە کۊچی کریۍ، جە نەهدارۊ پۍ بەهرێ، جە ئەتروشیۊ پۍ نەینەوای و دماجاریچ مەخمور. ساڵانێوەن بیېنۍ بە ئامانجوو گرڎ جۆرە جەنگېوە تایبەتی و گڵیاوو پەدەکەی، تەوقدای و گرڎ جۆرە ئەشکەنجە و زۆلمێوەشا ۋنەکریا، بەڵام ۋېشا نەڎا دەسۊ. پا هێزە مەعنەویەی کە جە جمیەری ئازاڎیی وڕابەرایەتی هۊرشا گېرتەن، هەمیشە پەشتیوانیۍ کۊشیای ئازاڎیی بیېنۍ و بە هەڵوێستی ۋېڕاگرانەشا خەباتی ئازاڎییشا ڕاوەبەرکەرڎ. ئاڎۍ گوزارشت جە واقیعوو گەلێوە کەرا کە سەرەڕاو گرڎوو سیاسەتە ئیراڎە ماڕیاکا پەدەکەی و سەپنای تەسلیمبیەی، پۍ ئانەی کە تەسلیمۍ نەبا جە ۋەران ۋەرشەنە مدرامانشا کەرڎەن. ئا خاکە بێ ئاوەو مەخموریشا پا ئیراڎە بەقوەتەیشا کە جە ئازاڎییۊ سەرچەمەش گېرتەن و کەرڎشا بە بەهەشت.
تا تواناتا هەن مزگی مەخموری بۆردومان کەرڎۍ
با گەلەکەما جە مەخمور بزانۊ کە؛ ۋەروو ئانەی ئامانجشا سەروو بنەماو کردەوەی خاسی و پاکین، جە هەر هەلومەرجێوە و جە هەر یاگېنە با عیبادەت و ئەرکەکاشا جە لایەن و خوڎایۊ قبوڵ کریۊ. جە وەختېنە کۊشیای پۍ مافی و داڎپەروەری جە دژوو ناداڎپەروەری ملۊڕاوە، گرڎ یاگۍ یاگۍ خوڎاپەرستیا. کۊشیای دژوو ستەمکارا و منافیقەکا گەورەترین عیبادەتا. گەلەکەما جە مەخمور پانەی مزانا کە ساڵانێوەن چا ئاژەنە مژیوا. کۊشیای ئازاڎیی گەلوو مەخموری، کۊشیایېن پۍ پارېزنای و بەردەوامبیەی بەهاکا ئیسلامېوە دیموکراتیکی. پۊکەی بۆردومان و مزگیەکەیشا تەنیا پېسە هجومېوە پۍ سەروو یاگېوە پیرۆزی عەزیەتشا کەرۊ. ئاڎۍ مزانا کە؛ ئا کەسەی ئی هەرمانا ئەنجام مڎۊ، ئەردۆغان و دەوروبەرەکەشا، کە ۋېشا بە موسڵمان نیشانە مڎا. بە هجومېوە پا جۊرە، ئەردۆغان و هامبەشەکاش دوژمنایەتی ۋېشا ۋەران ۋەر بە ئایینی واوەی کەرڎۊ.
ئانەی نیشانە مڎۊ کە حیچ بەهېوە مەشناسۊ
ئەردۆغان و دەوڵەتە چەتەکەش چنی هامبەشەکاش بە هجومەکاشا سەروو ۋەرنیشتی، مەخموری و پانیشتی سەلمنانشا کە دڎان بە حیچ بەهېوەرە مەنیا. بۊنەو دەسەڵاتیۊ گرڎوو بەها پیرۆزەکا ئیسلامی و مرۆڤایەتی وزا بنەو پەیا. پەرە بە هجومە قڕکاریەکاش مڎۊ دژوو گەلوو کوردی جە مەخمور، ۋەرنیشت و دژوو گرڎوو گەلا مەسیحی، عەلەوی، ئێزیدی و بیروباوەڕەکا تەری کە جە سەرنیشتوو ۋەرکەوتوو سوریای مژیۋا بەتایبەت گەلوو کورڎی و عەرەبی. ئەردۆغان کە حەجگیز ۋېش جە بەکارئارڎەی کەلیمەکا خوڎای، ئیسلام، قورئان، پێغەمبەر(د.خ)، برایەتی موسڵمانا، بەدوور مەگېرۊ، هجوم کەرۊ سەروو خۆسەری دیمۆکراتیکی کە گرڎوو گەلا و بیروباوەڕەکا بە ئازاڎیی چنەشەنە مژیوا، بە سەپنای 'یەک دەوڵەت، یەک نەتەوە، یەک زۋان' زۋانەکا، کولتورەکا، نەتەوەکا کە خوڎای وەش کەرڎېنۍ ، نکۆڵییشا ۋنەکەرۊ. دەوڵەتی تورکی چەتە کە سەروو ڕاو یەزیدی و حەجاجی هەنگامەمنیا، کە بۊنەو دەسەڵاتی و سوڵتانییەتینە گرڎ جۆرە خراپېوە کەرا، بە هجوم کەرڎەی سەروو ژەنا و زارۊڵا، حەرپاسە هجومکەرڎەی سەروو یاگە پیرۆزەکا، زۆلمێوە گەورەشا کەرڎەن. داوا جە موسڵمانا گرڎوو نەتەوەکا و بەتایبەت کوردی کەرمۍ هەلویستوو ۋېشا ۋەران ۋەر پی دوژمنایەتییە کە ۋەران ۋەروو ئایینی، مرۆڤایەتی و ئەخلاقی ملۊڕاوە بە شێۋېوە ڕێکوستەی تەر و قوەتتەر بەربڕدۍ.
مشۊم موسڵمانۍ ڕاستەقینۍ ۋەران ۋەروو ئینەینە هەڵوێست نیشانە بڎا
ۋەروو ئانەی کەسانۍ ئاینیۍ بێ هەڵوێستېنۍ، ئاکەپە و هامبەشەکېش ئایینی شېونا، کەلیمەکۍ دینی، خوڎای، پێغەمبەری(د.خ) و قورئانی بەکارمارا و هجومی قڕکاری ئەنجام مڎا. ۋەروو ئی مەڵامەتیە، داوا جە موسڵمانا کورڎی و عەرەبی و گەلا تەری کەرمۍ، گرڎوو موسڵمانا بە هەستێوە پاک و بېگەرڎ، گرڎوو زانا بە ویژدان و بەئەخلاقەکا، هەڵوێست نیشانە بڎا ۋەران ۋەر بە هجومە قرکارییەکا. داوا جە گەنجا و ژەنا موسڵمان، عەلەوی، ئێزیدی و ئایینەکا تەری کەرمۍ کە چالاکانەتەر بەشداری کۊشیای ئازاڎیی جەستەیی ڕابەروو گەلوو کورڎی با. داوا جە گرڎ لېوە کەرمۍ کە پۍ پیلانگێڵی، وەشکەرڎەی ژیۋایۍ دیموکراتیکی و ئازاڎی پۍ گەلا مەنتیقەکەی مشۊم گرڎ کەسێ ۋەرپرسیاری ۋېش جابەجۍ کەرۊ. "داوا جە گەلا موسڵمانی کەرمۍ هەڵوێستوو ۋېشا ۋەران ۋەر پی هجومە قرکارییە درندانەیە نیشانە بڎا".
