فەد-دەم ئەرەیاۋناش، هامکاری پەدەکەی پۍ ئەرەگیرا پەتەو سەبرو گەلەکەیما پڕچنۊ. ۋاتیچش:"داوا جە گەل و دۊسەکاما کەرمۍ جە ۋەران ۋەرو جموجوڵ و کرڎەوە ئەرەگیری و خیانەتەکانە بېدەنگۍ نەبا. ئېمە بە یەک دەنگی ڕوو بەڕوو دوژمنا کورڎسانی بیمېوە.
فیدراسیۊنوو جەمەو دیموکراتیکەکا کورڎسانیا جە سەرنیشتوو ئەڵمانیای(فەد-دەم)، جەبارەو هامکاریەکا پەدەکەی پۍ سوپاو ترکی ئەرەگیری ئەرەیاۋنېوەش ۋەڵاکەرڎۊ.
جە ئەرەیاۋناکەنە ئامان، "جە ١٠٠مین ساڵیاڎوو پەیماننامەو لۊزانینە، دۊڵەتوو ترکی ئەرەگیری پۍ دلېنەبەرڎەو مافەکا کورڎی چنی هامبەش و هامکارەکاش ڕېککۊتەی تازە دژ بە کورڎی ئەنجام مڎۊ. حەرپاسە، ئەرەگیری سەروو پانیشتوو کورڎسانی قورستەر کەرۊ. حۊڵ مڎۊ جمیەری ئازاڎیی تەوقە بڎۊ و دلېشەنەبەرۊ".
فەد-دەم ئیشارەتش پۍ ئانەیچ کەرڎەن،"جمیەری ئازاڎیی ماوەو ٥٠ ساڵان دژ بە گرڎوو دوژمنا کورڎی و کورڎسانی کۊشیای کەرۊ قوربانی فرۍ مڎۊ. متاومۍ واچمۍ جەنگەوانۍ ئازاڎیی پۍ ئېمە خەتەی سورەنۍ. چنڎین ساڵېن جمیەری ئازاڎیی پۍ ئانەی ڕا جە جەنگی دلېینەی گېرۊ، حۊڵ مڎۊ و کۊبیەیۊ گرنگ ئەنجام مڎۊ. بەڵام بە ئاڕاسەو ناستەی هامکاری چنی دۊڵەتو ترکی، حیچ ئەنجامېوە ئەوتۊ بەدەس نامان".
جەبەشېوەتەرو ئەرەیاۋناکەینە ئامان،"جە دماین نمونەنە، عەلی عەونی، ئەنڎاموو سەرکردایەتی پەدەکەی، جە چەمپنەکۊتەیېنە بە ئاشکرا هامکاری پۍ دۊڵەتوو ترکی ئەرەگیری و دوژمنایەتیش ۋەران ۋەر بە جمیەری ئازاڎیی نیشانەدا. ئا کەسە جە پاکتاوکەرڎەی حیزب و دیموکراتوو کورڎسان و ئېرانی دەورېوە فرەش گېڵنا. ئانە پەسەنڎ کەرڎەی خیانەتیا و سەبرو ئارامی گەلەکەیما پڕچنۊ".
جە دمادمایی ئەرەیاۋناکەینە ئامان،"ئېمە پېسە فەد-دەمی، داوا جە گەلی و دۊساما کەرمۍ، جە ۋەران ۋەروو ئا کرڎەوە ئەرەگیری و خیانەتانە بېدەنگۍ نەبا.ئېمە بەیەک دەنگی ڕووبەڕوو دوژمنا کورڎسانی بیمېوە".
هـ.ش
