جە یوەمین ساڵیادوو کوشتەی ژینا ئەمینیێنە بە دەسوو پۊلیسوو ئادابی، کە بی بایسوو سەرەورڎای شۊڕشوو "ژەنی، ژیوای، ئازادی" ڕژێموو ئێرانی فشار و سەرکوتوو سەروو ژەنا تنڎتەر کەرۊوە.

چەنی هەسبییەیۊ سەرکوتکاری و فشارەکاو سەروو ژەنا، ئیساتۍ بۊنەو ڕەتکەرڎەیۊ حیجابی بەزۊریوە جە لایەنوو سەرنشیناو سەیارەکاوە، سزاو پەنەوجارای و دەسگێرتەی ملوو سەیارەکارە، دەسش پەنە کەرڎەن. 

نزیکەو مانگێوەن  "دەوریەو ئیرشادی" جە سەرجەموو شارەکاو وەرکەوتوو کوردستانی و ئێرانینە جموجووڵەکێشا زیاتەرۍ بیێنۍ، چند ڕۊی ویەرڎەنە چندین ژەنۍ، ڕۊنامەنویسۍ و چالاکۍ گیریێنۍ، هاموەخت سزای قورسەیچ سەروو چند ژەنە چالاکە سیاسی و مەدەنییارە سەپێیێنە.

بۊنەو ئانەیۊ ژەنە سایەقەکۍ پابەندۍ حیجابی بەزۊری مەبا، کوڵەنامەشا پەی مۍ و هەڕەشۍ گێرتەی سەیارەکەیشا وەنە کریۊ، چا کوڵەنامانە، ماوەو ٤٨ سەعاتا مدا بە ساعیب سەیارەکا، ئەگەر پەشیمانی و داواوچەنەویەرڎەی بەرنەوزا، سەیارەکاشا گێرا.

بێگومان چەنی دۊخوو گوزەرانی خراپ و بێهەرمانی و ورماسای، ئی سزۍ ژیوای خێزانە ئێرانییەکا شێونا و مەتاوا ئا غرامەیە بدا.

س.ز