ڕاپیمای"گېڵای ئازاڎیی"، کە جە ٤ ئەیلولیۆ جە شاروو دۊرتمۊندوو ئەڵمانیای، بەبەشڎاری نزیکەو ٢٤٠ گەنجا کورڎی و ئینترناسیۊنالیستی دەسشپنەکەرڎ، وېرەگاو هېزی جە شاروو کۊڵنی بە جۊش و خرۊشۆ دمایش پنە ئاما.
ڕاپیمای گەنجا کورڎی و ئینترناسیۊنالیستی پەی ئازاڎیی جەستەیی ڕابەر ئاپۊی جە شاروو دۊرتمۊندوو ئەڵمانیای دەسش پنەکەرڎ، جە پەنجەم ڕۊنە جە کۊڵن مولهەیم دمایش پنە ئاما.
گەنجەکۍ جە ڕۊو دووەشەممەیۆ و دماو بڕیەو نزیکەو ٨٠ کیلۊمەترا یاۋا بە وېستگەی ئاخری. جە ئاخر ڕۊو ڕاپیماکەینە چالاکەکۍ بەین بەین ڕووبەڕوو ئاژاوەگېڵنی فاشیستە ترکەکا و پۊلیسی ئەڵمانی بیېوە، بەڵام ئا کرڎەوە تېکدەرانۍ بە حەکیمانەو بە وریایی گەنجەکاوە پوچۍ کریېوە.
جە دمادمایی ڕاپیماکەینە یۆ جە چالاکەکا بەنامۍ سینان تۊڵهەڵدانی قسېش کەرڎۍ.
"تا بەدەس ئارڎەی ئازاڎیی گرڎ یاگۍ یاگۍ مدرامانیەنە"
سینان ئەرەیاۋناش، کە ئاڎۍ بەڕۊحی سەفەربەری پەی ئازاڎیی جەستەیی ڕابەر ئاپۊی، جە جاڎەکا ئەڵمانیاینە چالاکی ساز کەرا و ۋاتش،"٣٠ مانگېن حیچ هەواڵ و زانیاریېوەما جە ڕابەر ئاپۊیۊ چنگە نەکۊتەن. سەرەڕاو ئانەی گرڎوو دۊڵەتە هەژمونوازەکا ئاگاڎارۍ ئا ئاژەینۍ، تا ئیسە حیچ هەنگامۍ نەنریېنە. ئا بېدەنگیە حیچ لایەنېوە یاسایش نیاو مایۍ قبوڵکەرڎەیچ نیا. ئېمە دلۍ جەرگەو ئا بېدەنگیەینە گرڎ ڕۋۍ جاڎەکانە ۋەردەوامۍ بیمۍ. ڕەنگە ئارۊ "گېڵای ئازاڎیی" بە کۊتا بارمۍ، بەڵام هەڵۋېسوو کۊشیایما ۋەردەوام بەرەو ۋەڵۍ ملۆ. ئېساڵی کە پېسە ساڵەو سەرکۊتەی بەنامۍ کەرمۍ، بە ئازاڎیی جەستەیی ڕابەر ئاپۊی میاۋۊ بە ئەنجام. ئېمە سەروو ئا ئەساسیە ۋەردەم کۊشیاینە بیمۍ.
ۋاتیچش، ئېمە ۋەردەوام پەی ئازاڎیی جەستەیی ڕابەر ئاپۊی کۊشش کەرمۍ. گرڎ گەنجۍ ئاپۊیی کە بەشڎاریش چی چالاکیەنە کەرڎەن، مشۊم سەروو بنەماو پاڕادیگماو ڕابەر ئاپۊی پەی ئازاڎیی ژەنۍ مرڎای سەروو ۋېش کەرۊ، سەروو ئا ئەساسیە جارېوەتەر داوا جە گەنجا ئاپۊیی کەرمۍ، تا مسۊگەرکەرڎەی ئازاڎیی جەستەیی ڕابەر ئاپۊی دلۍ کۊشیاینە ۋەردەوامۍ با.
"گەنجۍ کورڎسانی ئازاڎ کەرا"
حەرپاسە هامسەرۆکوو فەد-مەدی نۆرس راین وێستفالیا، کە دماتەر مافوو قسەکەرڎەیش هۊرگېرت، سڵامش جە ڕاپیمای گەنجا کەرڎوو ۋاتش،" گەنجۍ کورڎی پېسە گرڎ وختۍ پەی ئازاڎیی جەستەیی ڕابەر ئاپۊی گیانبازی کەرا. سوپاسوو گرڎوو گەنجا کورڎی و ئینتەرناسیۊنالیستی کەروو کە بەشڎاریشا چی ڕاپیما درېژمەودا و شکۊمەنڎانەینە کەرڎەن، ئا گرڎ گەنجېما کە بازنېوەشا دەوروو ڕابەر ئاپۊیرە وەش کەرڎەن، ڕابەر ئاپۊی و کورڎسانی ئازاڎ کەرا.
" بەقسۍ نا بەڵکم بە کۊشیای سەلەمنمېش"
لاو ۋېشۆ ئاندریا وۊڵف، بەنامۍ کۊمۊنەکا گەنجا ئینترناسیۊنالیستی مافوو قسەکەرڎەیش هۊرگېرت، ئەرەیاۋناش،" مشۊم ئېمە پۍ ئازاڎیی جەستەیی ڕابەر ئاپۊی درېژە بە کۊشیایما بڎەیمۍ. ۋەران ۋەر بە سیاسەتەکا ئەسڕیەیۊ و دلېنەبەرڎەو کۊماروو تورکیاینە ۋېڕاگری کەرمۍ. حەرپاسە ئینسان مشۊم دوڕوویی گرڎوو دۊڵەتا بەتایبەتی ئەڵمانیای بۋینۊ. بەقسۍ نا بەڵکم بە کۊشیای ئېمە ئانەی سەلەمنمۍ".
دماو قسەکا، گەنجەکۍ بە دروشمەکا"بژیۋۊ سەرۊک ئاپۊ"، "بژیۋۊ مدرامانوو گەریلای"، " بە گەنجی دەسما پنەکەرڎ و بە گەنجی سەرگنمۍ"و " ژەنی، ژیای، ئازاڎیی"یشا ۋاتېوە و هۊڕپرایشا سازکەرڎ.
