سەرسەبای ئارۆی جە شارو هەڵەبجەی، ژەنە کۆشەرە، زەحمەتکێشە و کەسایەتییەی نامیەو تەوێڵۍ و هەورامانی ”غەریبە ئایزە بارام“، جە تەمەنو ٧٨ ساڵیەنە بەنەوەشی کۆچی دماییش کەرد.

غەریبە، جە دمای تێکشییەی شۆڕشو ئەیلولی جە پانیشتو کوردستانی و چەنی دەستپنەکەردەیۆ شۆڕش و کۆشای چەکداری تێکەڵە بە کۆشای ئازادی بیێنە و هەم بە پێشمەرگایەتیی و هەم بە هامکاری پێشمەرگەی و ڕێکوزیاکان جە هەورامان و هەڵەبجە و شارەزوورەنە ڕۆڵی گەورەش جە کۆشای و خەباتیەنە گڵێنان.
کۆچکەردێ سەرەڕاو بەشداری وێش و هامسەرەکەیش بەنامی (حەمەسەعید)ی جە کۆشای و زەحمەتکێشای پەی جەمیەرو ئازادی کوردستانی،  دوێ کۆڕێش بەنامەکێ (مەهدی و کۆسار)ی جە ڕاو ئازادی و ڕزگاریەنە شەهیدێ بیێنێ. نامبرێ، هامکات و هامتەریب چەنی کۆشای، چنڎین کۆڕێ و کناچێ تەرێچش بە فکری شۆڕشگێڵی و ووڵاتپارێزی پەروەردێ کەردێنێ و یاونێنۍ پنە کە نامەکێشان بە ئی جۆرەنێ: حەمەو حەمەسەعیدی، وەزیرو ڕۆشنویری هەرێمو کودستانی، هادی، ئقباڵ، شیروان، ئەدیبە، کوێستانە و چنورە. 

تەرمو ”غەریبە ئایزە بارام“ی، سەرسەبای ئارۆی سەعات ٠٨:٠٠، جە هەڵەبجەوە بە مەراسیم بریاوە هەورامان و جە گۆڕستانو دەگاو دۆڵبیانی پاڵو دووە کۆڕە شەهیدەکەیشەنە ئەسپەردێ کریا.
پاسە کەسوکارەکەیش وەڵاوشان کەردەنەوە، جە هۆڵو (شەهید ئەحمەد گریانەیی) جە گەڕەکو شارەوانی هەڵەبجەی، پەرسەش پەی نریێنەرە.