دەوڵەتوو تورکی بە وەڵاوەپنەکەردەی هێزەکاو پەدەکەی چە مەنتیقانە کە نیەنۍ چێروو کۆنتروڵوو یەکە پاسەوانییەکا سنووروو عێراقینە زنجیرە دیڎارێوەش چنی هێزەکا سەر بە پەدەکەی جە پانیشتوو کوردسانی ئەنجامدان.

بەشێوە چا کەسا کە جە وێنەکا گلێرۊبیەکەینە جە ڕۆنامەکا تورکیاینە وەڵۍ بیێنێوە، ئا کەسێنۍ کە وەڵتەر جە تەرەفوو ئاژانسوو هەواڵوو فوراتی (ANF)یۆ دماو دەسکۊتەی وردەکاری پلانەی تازۍ ئەرەگیری ئەرەیاۋنایش سەر کەردەبۍ. پی داتایا جارێوەتەر سەلەمیا کە یەکینەکۍ پاسەوانوو سنووری عێراقی جە حەقەتینەنە هێزوو زێرەڤانی و گوڵانوو پەدەکەینۍ.

دماو ئی پێشئامایە تەسەور کریۆ جە چوارچێوەو پلانەی تازۍ ئەرەگیری دەوڵەتوو تورکینە جە چن ڕۆی ئاینڎەنە چنی دەسەڵاڎدارا بەغڎای کۊبۆوە.

جە هەواڵوو پەیوەندیداری پی دیڎارەی و بە تایبەت جە ئاژانسوو هەواڵوو فوراتینە، باس چانەی کریان، لیوا مەتین توکال، سەرۆکی دووەموو سوپاو تورکیای و شاندەکە بەنامۍ چنی "یەکەو پاسەوانوو سنووری عێراق"ی کۆبیێنێوە، جە وەختێنە چی گلێرۊبیەینە فرەو پرسا ئامۍ ئاراوە؛ گرڎوو ئا کەسا کە پنەشا وچیۆ "ۋەرپەرسۍ عێراقی" چا وێنانە کە جە گلێرۆبیەکەینە بەرۍ گنا، هێزەکۍ پەدەکەینۍ. جە وێنەکەنە نیشانە و لۆگۆو دووۍ ۋەرپرسا پەدەکەی بە جۆرێ تەڵخ کریابۍ پۍ ئانەی ڕۊشن نەبۆ سەر بەهێزوو پانیشتینۍ.

دیارتەرینشا بەهزاد لوقمان مەلا مسەفان کە ۋەرپەرسوو هێزەکا پەدەکەین.

یۆتەر چا کەسا کە وێنەکانە بەرکۊتەن، دلیر فەرزەندەن، کوڕەزاو هۆشیار زیبارین، ۋەرپرسوو هێزێوەن بە نامۍ یەکینەکاو پاسەوانوو سنووری عێراقی، کە وەڵتەر ئاژانسوو هەواڵوو فوراتی (ANF) ئاشکراش کەردەبۍ و پۍ ڕاو گرڎیی وەڵا کریاوە.

بەپاو ئا زانیارییا دەسکۊتێنۍ، بەپاو پێشئامایەکا مەنتیقەکەی بانگەشەو ئانەی کریان کە یاشار گولەر وەزیروو ورگیری تورکیای و ثابت عەباسی وەزیروو وەرگیری عێراقی جە ١٤و ئادارینە چەمشا بە یۊترینی گنۆ. باس چانەی کریۆ ئۆپراسیۆن دژوو تەڤگەری ئازاڎیی کوردسانی تەوەری سەرەکی ئی گلێرۊبیەینە و هەردووەلا تاوتوێ دەسچنەکا هجومی ئاسمانی سەرانسەری و ئۆپراسیۆنی زەمینی جە بڕۍ یاگێنە کەرا.