''هەڵمەتەو ١٥ و ئابی بیە بە دەنگوو ژەنا ئازاڎیوازی''
دڵژین ڕوکنە و نودا چەکڎارە، گەریلاکۍ یەژا ستاری مبارەک بایی جەژنەو ژیۋایۊیشا کەرڎ و ئەرەیاۋناشا، گوللۍ یۋەمە کە هەڤاڵ عەگیدی تەقنا، جە ١٥ و ئابو ١٩٨٤، بیە بە دەنگوو ژەنا ئازاڎیوازی.
گەریلاکۍ پەکەکەی بەجۊشو خرۊشېوە فرۊ، یاڎوو ١٥ و ئابی بەرز ڕاگېرا. دڵژین ڕوکنە و نودا چەکڎارە، گەریلاکۍ یەژا ستاری، باسشا جە کاریگەریەکا هەڵمەتەو ١٥ و ئابی کەرڎ.
دڵژین ڕوکنە ئەرەیاۋناش، بە جۊشوخرۊشېوە فرۊ پېشوازی جە جەژنەو ١٥ و ئابی کەرمۍ و ۋاتش،" سەرەتا مبارەک بایی ئی جەژنۍ جە ڕابەرایەتی، گەلی ۋڵات پارېزیما، هەڤاڵا دلۍ زینڎانەکا، هەڤاڵا سەرو کەشەکا کەروو کە پەی ئاخېزی قوربانی مڎا. هەڵمەتەو ١٥ و ئابی پۍ ئېمە جەژنەنە. بە سەرمەشقی هەڤاڵ عگیدی، جە دهۍ یۋەم گوللۍ تەقا و چالاکی یۋەم کریا. ئا گولە یۋەمینۍ کە جەلایەن و گەریلایۊ تەقا، دەنگو هامڕایاما بۍ جە زینڎانەکانە.، دەنگوو مەزڵوم، خەیری، کەمالی بۍ، دەنگوو ژەنا ئازاڎیی وازی بۍ جە کورڎسانەنە. خەڵکو کورڎسانی بۍ تەرس گۊششا چا دەنگەیەبۍ''.
دڵژینە ۋاتیچش،"بەڕۊحو ١٥ و ئابی، پا هېزەی جە ڕابەرایەتی، هامڕایا و گەشمەرڎاوە هورش گېرمۍ، جە زاپ، ئاڤاشین، مەتینا، بە هیواو ۋېڕاگریۍ گۊرۊ، دژ بە سوپاو ترکی فاشیستی گژیەیمۍ. جە فرەو مەنتیقا کورڎسانینە، گەریلا پەی ئازاڎیی ۋەرداواما چا جەنگەنە. گۊرەتەرین ئامانجما بەدیئارڎەی ئازاڎیی جەستەیی ڕابەرەکەیمانە، قەناعەتما بەیاوای بە ئامانجەکەیما هەن. چونکی بڕواو ئیراڎەما گۊرەن، حیچ هېزۍ مەتاۋۊ دژ بەئیراڎەی ئازاڎیی مرڎۊوە. گەریلاکۍ کورڎسانی ڕوانە چالاکیۍ کەرا فرەو جاریچ زانیاری سەبارەڎ بەچالاکیەکا پۍ ڕای گرڎیی ۋەڵا کەراوە. قەرارو پا گیریما فرە گۊرەن، سەروازە تورکە فاشیستیەکۍ کەشەکا کورڎسانینە نەمەنا، یا کیشیاوە، یا مرا، سەرکۊتەی حەرپۍ ئېمەن".
ڕۊحېوە تازە کورڎسانەنە خوڵقیا
نودا چەکڎارە، گەریلۍ یەژاستاری تەئکیدش سەرو گرنگی هەڵمەتەو ١٥ و ئابی کەرڎۊ و ۋاتش،'' ئایدۊلۊجیاو ڕابەریما و هەڵمەتەو ١٥ و ئابی، ڕۊحېوە تازەش کورڎسانەنە خوڵقنا، ئا ڕۊحە نیشانۍ گەشتەرکەرڎەی ئیراڎەی ئازاڎییا. جە ڕاسینە ئاڕۊحە نیشانۍ ڕۊحو ١٤ و تەموزیا. سوپاو ترکی فاشیستی گرڎ وەختۍ بە بەکارئارڎەو جەنگی دەرونی و تەکنیکی، حۊڵو دلېنەبەرڎەو گەریلاکا کورڎسانی مڎۊ، بەڵام بە ئامانجەکاش مەیاۋۊ،چونکی خەڵک و کورڎسانی هەستشا بە هېزوو ئیراڎەو ۋېشا کەرڎەن. حیچ هېزۍ مەتاۋۊ ئا ڕۊحەیە دلېنەبەرۊ. گەریلاکۍ کورڎسانی ڕاسی دەوڵەتو ترکی فاشیستیشا نیشانە دا، دەوڵەتو ترکی کە بەتەمامی ئابوری ۋېش جەنگەنە بەکار ئارڎەن، چی جەنگەنە مەتاۋۊ سەرکۊتەی بەدەس بارۊ. پەکەکە بیەن بەهیواو گەلا چەوسیای جەهانی، گەریلاکۍ ئازاڎیی کورڎسانی بە ئیراڎېوە گۊرۊ جەنگ کەرا. ئېمە قەناعەتما پانەی هەن کە چی جەنگەنە سەرۍ گنم".
هـ . ش
