ئۆسکار وایڵد گەورە نویسەر و هۆنیاری ئیرلەندی جە ئەژناسە کەردٚەی هۆنەریەنە ماچۆ هۆنەر کرێڵوو ئەنەیاوای ژیوایا. یانێو بێ ئەژناسای هۆنەری ژیوایچ فام مەکریۆ.

حەشاش چنە مەکریۆ چی سەردەموو ئاسنی و ئاوەزە ئاسنینانە کە تەنانەت زانست و زاناییچ چڵکئاو وەروو دەسوو قازانجیا ڕەنگوو هۆنەری پێسە سەرچەمەو ژیوەنی کۆمەڵگاکا فرە هاڵ بیەنەوە و بەشەر سەروو وەرێسۆ چەنیەتی ژیوای و تام چەشتەی چنەش وڵاونانش.

شەوژەنوو بەرەو ژیوایش ژنیان و سەرش پەشۆکیان ڤنە،کرێڵەکەش ئینا کۆنجێڵەو دڵیشەنە و گێڵەی گێڵۆ باخەلەکاش!!!.

ئانە ڕاسی بۆ ئەر بەشەر دالێو ویرێ کەرۆوە گنۆوە سارا پەیش بێ بیەی هۆنەری ژیوای سەخڵەتا و مەرارەت کێشتەی بێ ئەوەسیای تەشک ودیامان گێڵنۆش و فرەو یاگانە بێ ئادٚی پەنگ موەرۆوە.هەرچن بوورژوازی ئینا شۆنۆ کلکەنیشان کەردٚەی ژیوەنیێوی بێ سەروبن یەوە کە قازانج تەوەن بنەڕەتشا و هۆنەر چا ژیوەنیەنە گیریان دەزگا!! و ئەنقەسی یاگێ هەرەقەتینۆ وێش مەدٚریۆ پنەش بەڵام هەنێ ئا هۆنەرمەندە ڕۆح سووکێ کە ئی پەڕ تا ئەو پەڕوو دنیا بێ هازەکەو ئارۆیمانە دایمە شۆنۆ هۆنەری ڕەسەنیشا هۆرکەردٚێنە و وەراوەر پی هەراومەزاتیە گۆشێشا ئاخەناینێشا. تەنیا پەی دڵوو وێشا و وەردەنگی هەرەقەتینیشا حەنەروو وێشا ئەرمانانشا،حەنەر و هۆنەرشا پیویانەوە کۆمەڵگای و هەروەرەنە بیێنێ بە گریکوو تەوەن بە تەوەنۆ یانەو فەرهەنگوو وەڵاتیشا.

بەپاو ئانەیە کە هەورامان فرەتەر جە گردٚ یاگێوێ دێرتەر وەراوەر بە هڕووموو شەپۆلۆ بەنامێ جەهانی کەردٚەی کاپیتالیسمی بەزیان،هۆنەریچش تا ڕادێوی فرە پارێزنانش و پارێزنایچش نەک بە دەسوو دەسەڵاتیوی خەمەوەری یامکەتی پێکئامایوی دڵسۆچنی بەڵکوو بە دەسوو هۆنەرمەنداشەوە کریان یۆ چی هۆنەرمەندە گۆرانیەواچا کاک حەمەی نام ئاوەر ئەژناسیا بە حەمە نۆدشیا کە ماوێوی فرەن دەنگە وەش و سۆزدارەکەش مێمانوو دڵوو هەورامی زوانەکان.

حەمەی نام ئاوەر کوڕوو ئەحمەدٚ و شەمسیێ ئەدٚا بیەو مانگۆ ترازیێ ساڵۆ ۱۳۴۹ی کۆچی ڕۆجیاری جە شاروو نۆدشەیا.

ناکڵۆکاری و سۆڵەو چەواشەی چەپگەردٚی تێکەڵ چنی دیمەنی وەش وناریا،وەش پنە کەوتە و پێسە بەهەشتوو نۆدشە و هەورامانی با بە نوونگێ کاریگەرێ و فرە زوو کارش ڤنە کەرا و بنەڕاو هەرزەکاریشەنە پەی بەر وستەی سۆ و سۆزیش هەوازە هۆرمارۆ تا هەروەرەنە مزانۆ بە چریکەیش و هازۆ دەنگیش و بە شێوێوی ڕێکوپێک مەینە دنیا پەڕ ڕەمزوڕازەکەو هۆنەری و تا ئیسە ئەرەنیەروو چن بەزمە گۆرانیا بیەن.جە دلێڕاسەو دەهەو ۶۰کۆچی ڕۆجیاریەنە یەکەم کاسێتش چنی هووشیار نۆدشی مەیوە بەر و گنۆ گۆشوو وەردەنگا بەڵام کریۆ واچی بنەڕەتوو ئەژناسیای ئی هۆنەرمەندیە گێڵۆوە پەی ساڵۆ ۱۳۶۹ کە مانگۆ کۆپڕوو ئا ساڵێنە کاسێتێوش چنی هووشیار نۆدشی گنۆ بازار.کاسێتێو کە هەواو گۆرانیێ هەورامیێ ڤاڕۆ و ئاوازەش تا ژاوەرۆ و شامیانیچ ملۆ.دماو وەڵاوە بیەی ئی بەرهەمیەرە بە نوونگەو ئەژناسیایشا هەروەرەنە ژاوەرۆ و شامیانەنە یاگۆ وێش دلێ دڵوو خەڵکی کەرۆوە و چننها بەرهەمێ هۆنەریێ چنی مامۆسا هووشیاری چاگە تۆمارێ کەرا.

شۆنۆ کپ بیەی دەنگوو مامۆسا عۆسمان هەورامی، بێ هازی،بێ ترۆقی و کەساسی بی بە نەوەشی گۆرانیێ هەورامیێ تا یاگێوە کە دلێبەرەو فەوتیایش ڕەقیا تا هووشیار و حەمە پێسە دوێ هۆنەرمەندێ سەرەشا زنیەوە و بە ئەرەنیای بەزمە تازا و کەڵک گێرتەی جە کەلیمە وێمانا و ئا شێعرا کە وێشا ئەرەنیەرێشا بێنێ هەواو تازەوە بیەیشا کەردٚ خەڵاتوو گۆرانیێ هەورامیێ.

حەمە نۆدشی چی ماوەو نزیک بە چل ساڵا کە پێسە هۆنەرمەندیوی پەی گەشە و ئەوەتەنای هۆنەروو نیشینگەو ژیرلا هەرمانەش کەردٚێنە ئەرەنیەروو چن بەزما بیەن و کریۆ واچی پا بەزماوە دلێ کۆگاکانە مژناسیۆ:

بەزم ساڵۆ واتەی
خەرامان ۱۳۶۹
عەمرم پەلکە شۆڕ ۱۳۷۲
نامەی مەجنوونیم ۱۳۷۳
دڵ هاوارشەن ۱۳۸۲

هۆنەر پەی مامۆسا حەمەی نۆدشی گۆمیوی قووڵ بیەن پەی مەلەوانیش،دایمە حەزش بە ئەنەئاردٚەی و فێربیەی کەردٚەن.بە دڵیوی وەرهەڵا و ئاوەزی ئەوەتەنگیا زانانش چەنی هۆرزەوئەرەنیشتیوی ژیرانە و ئێژاو یاگێش چنی کۆمەڵگاکەیش بۆ،پاڵوو ڕۆح سووکیشەنە نەفس بەرز بیەن و هەرگیزاوهەرگیز پێسە بڕێوی هۆنەرش نەکەردٚەن چڤۆ دەسی پەی ژیوایش بەڵکووم چەپەوانەش هۆنەرش بەرز کەردٚەنەوە نەک سووک و بێ ئێژای.

ئیسەیچشە سەرەوە بۆ ئی هۆنەرمەندە ئازیزە پێسە فرەو هۆنەرمەندەکاو مەحاڵوو هەورامانی بێ تەمەدٚاری و چەمەڕایی خەریکوو خزمەت بە فەرهەنگوو نیشتگاکەیشا هەرچن بەداخەوە ماوێوا وەروو نەوەشی ناکۆکا و پێسە وەڵێ مەتاڤۆ هەوازە هۆربارۆ.

ئاواتوو لەش ساقی،سەرکەوتەی و سەربەرزیم هەن پەی کاک حەمەی و دڵنیانا بە لێریوی پۆڵایین کە هەنش نەوەشیەکەیش بەزنۆ و پێسە جارانی بە چریکە سێحراویەکەیش بۆ بە تەسکینوو دڵوو ئێمەمانا و حەزپنەکەراو فەرهەنگ و هۆنەروو هەورامانی.

ئۆمید حەبیبی، شاروو نۆدشەی ۲۶ڕابڕانوو ۹۹ی
پاوەپرێس