ئۊپەراسیۊنوو "پتەوکەرڎەی ئاسایش"ـوو هێزەکاو سوریای دیموکراتیک (هەسەدە)ی گوندەواروو دەیرەزۊرینە، ٤ ڕوێن بەرڎەواما. ناوەندوو ئەرەیاونای هەسەدەی واتش، ئۊپەراسیۊنەکە بە پاو پلانەکا ملۊ ڕاوە.  

ئۊپەراسیۊنەکە یەرۍ قۊڵێوە دەسش پەنە کەرد، قۊڵی یوەمین، گوندەواروو سەرنیشتوو باکوری دەیرەزۊروو مەنتێقەو سوورەیۊ تا میاوۊ بە دەرەو فوراتی و هەرێموو ٧ کیلۊی گێرۊ وێش. قۊڵی دووەمین، جە گوندەواروو وەرکەوتوو دەیرەزۊریوە جە مەنتێقەکاو لکەدریاو شارۊچکەو بەسیرەیۊ تا سنوورەکاو سوریا_عێراقی جە شاروو باهۊزی گێرۊ وێش. قۊڵی یەرەم جە گوندەواروو وەرنیشتوو دەیرەزۊرینە جە چوارڕاو مەعاملەیۊ تا هەرێمەکاو سەر بە ڕەقەی گێرۊ وێش.  

ئەوەڵ ڕۊو ئۊپەراسیۊنەکەینە، هێزەکاو هەسەدەی، ئامانجەکێشا قۊڵۍ یەرەمنە ئارڎۍ دی. چا چوارچوەنە، ٥ چەتۍ داعشی و ٨ بازرگانۍ مادەی هۊشبەری گیریۍ، هەرپاسە ٣ هجوومبەرۍ سەر بە هێزەکاو  ئۊپەراسیۊنەکەی کوشیۍ.

دووەم ڕۊنە، هەسەدە زیادتەر تیشکەش وستە سەروو گوندەوارەکاو سەرنیشتی و وەرکەوتوو دەیرەزۊری. ئۊپەراسیۊنەکێش چاگە فراوانتەرۍ کەرڎۍ. بە پاو ئەرەیاونیاو هەسەدەی "هجوومکەراو سەروو هێزەکاو ئۊپەراسیۊنەکەی، بازرگاناو مادەی هۊشبەری، ئاکەسۍ ستەمشا وەنەو خەڵکی مەدەنی کەرڎێنە کریێنۍ ئامانج".

حەر چی چوارچوەنە، بەتایبەت قۊڵی یوەمیننە، "گوندەواروو سەرنیشتوو دەیرەزۊری"، سەروو ڕاو عەزبە_کۊنیکۊیۊ ٣ چەتۍ داعشۍ کە گەرەکشابۍ بڕەما گیریۍ. جە ئۊپەراسیۊنوو ورکوایسەرینە، ٢ بازرگانۍ مادەی هۊشبەری گیریۍ و مادەکێچشا دەسشا ملەرە گیریا.

ڕۊی یەرەمنە، هێزەکۍ جە شارۊچکەو سەعدەینە سەرنیشتوو دەیرەزۊرینە ڕووبەڕووۍ هجوومی  چەکداریی بیێوە. جە ئەنجامنە جەنگەوانێوە هەسەدەی و ژەنێوە گەشمەرڎۍ بیۍ، ژمارێوە هاموەڵاتۍ یاگۍ ڕووەدایەکەینە بریندارۍ بیۍ.

هەسەدە جوابوو هجوومەکەیش داوە و ٣ چەتۍ داعشی گیریۍ، یۊشا سەرچەتە بۍ.

دماو هجووموو سەروو هێزەکاو هەسەدە، وەراوەروو ئا سەروەنەشێویاینە گوندەوارەکاو وەرکەوتی و سەرنیشتوو دەیرەزۊرینە ڕووەش دا، کە بەشێوە جە دامودەزگا سڤیلەکا و ڕاوبانەکا وزیێرە و هانی هجوومەکاو سەروو هەسەدەی دریۍ، ڕاوشۊنە ئەمنییەکۍ زیادتەرۍ کریۍ و مەوداو ئۊپەراسیۊنەکا فراوانتەرۍ کریۍ.

ئۊپەراسیۊنوو "پتەوکەرڎەی ئاسایش"ی ئارۊ جە چوارەمین ڕۊشنە قۊڵۍ یوەمیننە "گوندەواروو سەرنیشتوو دەیرەزۊر"ی و بڕۍ بەشاو قۊڵی دوەمینی "گوندەواروو وەرکەوتی" بەرڎەواما. ئا جەنگەوانۍ بەشدارییشا ئۊپەراسیۊنەکەنە کەرڎەن، بە ئاژانسەکەیما واتشا، ئۊپەراسیۊنەکە خاس ملۊ ڕاوە، چوارچوەو ئامانجەکاش فراوانتەر کریان.

بەگردی جە چوارچوەو ئۊپەراسیۊنەکەینە ١١ چەتۍ داعشی و ١٠ بازرگانۍ مادەی هۊشبەری گیرایێنۍ، هەرپاسە ٣ هجووومکەرێچ کوشیێنۍ. جگە چانەیجە جە هجووموو چەکدارەکانە و چەتەکاو داعشینە پەی سەروو هێزەکاو ئۊپەراسیۊنەکەی، جەنگەوانێوە هەسەدەی و ژەنێوە گەشمەرڎۍ بیۍ و بڕۍ هاموەڵاتێچ بریندارۍ بیۍ.

جە گوندەواروو وەرنیشتوو دەیرەزۊرینە ڕووبەڕێوە فرەو گوندەواروو وەرکەوتوو دەیرەزۊرینە، ژیوای ئاسایین.

س.ز