بە مەراسمێوە و ڕاپیمێوە گۆرە ڕۆو ٤و ئایاری تەرمو پەڕلەمانتارو دەم پارتی و یاگەگیرو سەرۆکو پەڕلەمانو تورکیای سری سورەیا ئۆندەر جە ئەستەنبوڵەنە ئەسپەردەو خاکی کریا. بە هەزاران کەسێ واتشا 'قەولما پەی سری سورەیا ئۆندەری ئادەیڤدیر ئاشتییا'. هامسەرۆکا دەم پارتی، پەرلەمانتارێ و بنەیانەو ئۆندەریچ هیزی جە مییانو کۆنگرەو جەمال ڕەشتید جە ئەستەنبوڵەنە سەردانو تەعزییەکێشا کەرد و سەروەشیشا قبوڵ کەرد. هەڤاڵێ ئۆندەری پەی ئاژانسو هەواڵو فوراتی (ANF) قسێشا کەردە.

گرڏ هەرمانێوە بە تەمامەتی جابەجێ کریۆنە

هامسەرۆکو هەدەکەی مەراڵ دانش: گرڏ بێتاقەتێنمێ پەی گیان جە دەسدا و ئۆندەری پێسەو ئانەی کەسێوە بنەیانەکەیما جەدەسدابۆ . دڵو گرڏیمانە بێ. بەتایبەت چی چن مانگەو دماییەو پرۆسەکەی، بابەت و ئاشتینە هەوڵی فرەش دا. مەردێوە سەختا. چی پرۆسەنە ئەرکش وستەن  سەرو ئەستۆ گرڏیما چونکە کاتێ لوێ سەرو هەرمانێوە بە تەمامەتی جابەجێش کەرێ.

ئەرکما جابەجێ کەردەو  ئی ڕۆڵەینە

پەرلەمانتارو ئامەدی جەهەپە سەزگین تانرکوولوو: سری بییەبێ یاگێ بڕواو گرڏ لایەنەکا، دەورێش گێڵنا کە ئا موخاتەبە سیاسیێ کە هیزی پێسەو دووژمنی وینریێنێ ئیتر بانە یاگێ بڕواو وەراوەری. ئینەیچ فرە گرنگ و بنەڕەتی بێ پەی پرۆسە و ئاشتی و ئی ڕۆڵەش بە سەرکۆتەی جابەجێ کەرد. ئەرکما جابەجێ کەردەو ئی ئەرکەینە کە ڕادەسش کەردێنمێ.

میراتیێ گۆرەش جیائاست

پەرلەمانتارو رحای دەم پارتی دیلان کوونت: سەرۆک سری میراتیێ گۆرەش وێش جیائاست. پەنەوازا گرڏما ئینەیە وەرچەم گێرمێنە. مشۆم پەرە پی میراتەیە دەیمێنە و یاونمێش بە ئەنجام. بە مانێوە تەر بە ئامانج یاونا و ئی میراتەیە ئاشتییا. پەنەوازا درێژە پی میراتەیە دەیمێ.