بە ئەمرەو وەزیروو دلۍ عێراقی بە درێژایی ٢٥٦ کیلۊمەترا جە شارەدەگاو قۊرەتوویۊ تا مەنتێقەو هەورامانی کامێرۍ چەمڎاری نریارە بەمەبەستوو چەمڎاریکەرڎەی و فاڕایۊ بازرگانی چا مەنتێقانە.
وەزارەتوو دلۍ حوکومەتوو عێراقی بە درێژایی ٢٥٦ کیلۊمەترا ژمارێوە کامێرۍ ی چەمڎاری دەروازە سنورییەکانە منیۊرە بە مەبەستوو چەمڎاریکەرڎەی فاڕایۊ بازرگانی چا سنوورەنە، وەرپرسێوە پاسەوانوو سنووریچ ماچۊ"ڕوانە جە ڕاو تیمێوە پسپۊڕیوە جە فەرماندەیی گردینوو هێزە چەکدارەکاو عێراقینە کامێرەکۍ چەمڎاری کریا".
بە ئەمرەو وەزیروو دلۍ عێراقی بە درێژایی ٢٥٦ کیلۊمەترا جە شارەدەگاو قۊرەتوویۊ تا مەنتێقەو هەورامانی کامێرۍ چەمڎاری نریارە بەمەبەستوو چەمڎاریکەرڎەی و فاڕایۊ بازرگانی چا مەنتێقانە.
عەمید هەورامان محمد حسێن، وەرپەرسوو بەشوو پەیوەندیەکاو لیواو ٢١ـوو پاسەوانوو سنووری جە واتەێوەشنە بە دەنگوو ئەمەریکایش وات، ئا کامێرۍ بە ئەمرەو وەزیروو دلۍ عێراقی نریێنێرە و پەی چەمڎارییکەرڎەی بازرگانی و هاموشۊکەراو سنوورەکا نریێنێرە و تەنیا تیمێوە پسپۊڕ جە فەرماندەیی گردینوو هێزە چەکدارەکا متاوا ڕسمەکا بوینا.
وەرپرسەکەو پاسەوانوو سنووری سەبارەت بە کواڵیتی و ژمارەو کامێرەکا واتش، بە درێژایی ٢٥٦ کیلۊمەترا کامێرەکۍ نریێنێرە ڕسمۍ و ڤیدیۊیچ تۊمار کەرا و حەراریێنۍ، دەورێوە خاسشا هەن جە کەمکەرڎەیۊ قاچاخینە و ئێمەیچ هاگادارۍ نیەنمۍ، ئایا وەزارەتوو دلۍ هەرێمی هاگاداروو ئی هەنگامێنۍ یا نا.
وەرپەرساو خاڵە سنوورییەکان بێئاگایی وێشا چی هەنگامۍ نیشانە مدا و ماچا، ئا کامێرۍ، کە هەنێشا سەر بە حوکمەتوو هەرێموو کورڎسانینۍ و بە سیستمێوە کۊمپیوتەری فاڕایۊ بازرگانی کریۊ و سەرجەم فاڕیایۊکێچ ئینۍ چوارچوەو یاسێنە.
مەریوان کەریم، وەرپەرسوو ئەرەیاونای و پەیوەندییەکاو مەرزی میاندەوڵەتیی باشماخی ماچۊ، تا ئیساتۍ حیچ کامێرێوە چەمڎاریعێراقی دلۍ مەرزەکەینە نەنریانرە و حیچ لایەنێوەیچ بەڕسمی هاگادارێشا نەکەرڎێنمێوە، کە کامێرە نریۊرە، ئا ئاڵووێڵە کە مەرزوو باشماخیوە کریۊ، گردش یاسایین و دوورا جە قاچاخییوە، سیستموو گومرگییەکەیش جە ڕاو ئینتەرنێتیوە بە حوکمەتوو هەرێموو کورڎسانیوە بەسیانۊ و واریاتەکەش ڕاستەوخۊ ملۊ خەزێنەو حوکمەتوو هەرێموو کورڎسانیوە.
نیایرەی کامێرەکاو چەمڎاری لاو حوکمەتوو ناوەندیوە خاڵە سنوورییەکاو حوکمەتوو هەرێموو کورڎسانینە وانایۊ جیاوازش پەی کریۊ و بەشێوە جە چەمڎاراو ئابووری ماچا، ئی هەنگامۍ نیشانێنە پەی کەمیی متمانۍ حوکمەتی ناوەندی بە حوکمەتوو هەرێمی و کەمکەرڎەیۊ دەسەڵاتەکاش جە خاڵە سنوورییەکانە.
جا چوارچوەنە سەرکۊ یونس، چەمڎاری ئابووری ماچۊ، ئی هەنگاماو حوکمەتوو عێراقی دماو گێڵایۊ وەفدوو چەمڎاریی داراییوە حوکمەتوو ناوەندیوە مەیا، کە دماو سەرڎایشا پەی هەرێموو کورڎسانی، حوکومەتوو عێراقی گەرەکشا وێش سەرپەرشتی و چەمڎاریی ڕاستەوخۊو ئا واریاتی کەرۊ، کە مەرزەکانە هەن.
ئا چەمڎارە ماچۊیچ، حوکومەتوو عێراقی گومانیشا جە داتاکاو هەرێموو کورڎسانی هەنە و متمانێشا پەنەش نییەنە، حوکمەتوو فیدڕاڵی گەرەکشا وێش داتاکا و واریاتەکا کوۍ کەرۊوە، ئینەیچ کاریگەرییش سەروو دەسەڵاتوو بەیاگەیاونای حوکمەتووهەرێموو کورڎسانیوە بۊ، کە وەڵتەرۍ وەزارەتوو دارایی حوکمەتوو هەرێموو کورڎسانی سەرپەرشتیی خاڵە سنوورییەکاش کەرڎەن. چی وەختەنە وەروو کەمبییەیۊ داهاتەکاش و ئا فشارەیۊ کە ئینا سەروو حوکمەتوو هەرێمیوە، گێرا حوکمەتوو هەرێموو کورڎسانی نەتاوۊ ڕا چی هەنگامۍ حوکمەتوو ناوەندییە گێرۊ."
