شەپۊلەی تازۍ کۊگیریی چالاکا و هاموەڵاتا کوردی وەرکەوتوو کورڎسانینە درێژەش هەن و بڕۍ چالاکۍ تەرۍ و ھامسەرەو یۊ جە گیابەختکەرڎاو سەرەورڎای 'ژەنی، ژیوای، ئازاڎی'، ھێزەکاو سەر بە دەوڵەتوو ئێرانی گێرتۍ.
سەروبەندوو یوەم ساڵیاڎوو سەرەورڎای 'ژەنی،ژیوای، ئازاڎی'ینە، هێزەکاو سەر بە دەسەڵاتی، شەپۊلێوە تازۍ کۊگیرییشا وەرکەوتوو کورڎسانی و ئێراننە دەس پەنە کەرڎێنە و ڕوانە دەیان هاموەڵاتۍ و چالاکۍ بەبۍ وستەیڕووەو حیچ فەرمانێوە گێرتەی، گیریا.
بە پاو ماڵپەڕوو تۊڕەو مافوو ئینسانوو کورڎسانی، ڕواو ٢١ و ٢٢ۍ ئابی، چوار چالاکۍ بە نامەکاو "موبین دەھار"ی ٢٠ ساڵ، خەڵکوو دەگاو سینگانوو سەر بە شاروو شنۊی، "سەمەد شابوویی" خەڵکوو دەگاو شاوانەو شنۊی، "ئەمیر سەیدی" خەڵکوو مەھابادی و "ئەفشین ساعدی"ی خەڵکوو دەگاو خامسانوو کامیارانی لاو ھێزەکاو سەر بە دەوڵەتوو ئێرانیوە گیریۍ و فاڕیێوە پەی یاگێوە نادیاری.
ئانەیچ وزیان ڕووە، ڕۊو ١٦و ئابی، گەنجێوە خەڵکوو دەگاو پسوەو پیرانشاری بە نامۍ "موعین شەریفیان"ی، بۍ وستەیڕووەو ئەمرەو گێرتەی، لاو ھێزە ئەمنییەکاوە گیریا و فاڕیاوە پەی یاگێوە نادیارۍ.
لێوە تەرۊ جە بەرڎەوامیی فشارەکاو دامودەزگا ئەمنییەکانە پەی سەروو بنەیانەو گیانبەختکەرڎاو سەرەورڎای 'ژەنی، ژیوای، ئازاڎی'، ڕۊو یەرە شەممەی ٢٢ۍ ئابی، "شەرمین حەبیبی"ییە ھامسەرەو فەرەیدون مەحموودیی یۊ جە گیانبەختکەرڎاو سەرەورڎاکەی بە تۊمەتەو "پڕوپاگەندەی دژوو سیستمی و لاڕارەبەرڎەی ڕای گردینی"، لاو ھێزە ئەمنییەکاوە شاروو سەقزینە گیریا و فاڕیاوە پەی یاگۍ نادیارۍ.
فەرەیدون مەحموودی، خەڵکوو شاروو سەقزی، ڕۊو ١٩و ئەیلوولوو ٢٠٢٢، گەرمەو ناڕەزایەتییە جەماوەرییەکاو ئا شارەینە بە تەقەو ھێزە سەرکوتکارەکاو دەوڵەتوو ئێرانی گیانش بەخت کەرد.
بە پاو ئامارێوە تۊڕەو مافوو ئینسانوو کورڎسانی، تەنیا ماوەو دووە حەفتەی ویەرڎەینە، لاو کەمیوە ٤٠ چالاکۍ و هاموەڵاتۍ کورڎۍ شارەکاو تاران، پیرانشار، سەقز، جوانرۊ، کامیاران، شنۊ، مەهاباد و سنەینە هێزەکاو سەر بە دەسەڵاتیگێرتێنۍ.
س.ز
