ئینسان هەستش پنەکەرۊ کە وەردە وردەی مەغزش کریۊوە، تۆزە، دووکەڵ و پیسی گۊرە شارەکاش سەر مڕەواوە.

ئینسان بەراسی درک پانەی کەرۊ کە هزری ئازاڎ بە چ مانېوە مۍ، ۋەرو ئانەی جە کەشەنە حیچ چېۋۍ بیەیش نییا کە کاریگەری خراپ کەرۊ سەرو ئینسانەکا.

جە گۆرانیېوەنە وچیۊ کە حەر وەختۍ ئەندێشە ئازاڎ بی، بە شێۋېوە ئازاڎ و بە بۍ ئانەی چەمیۊوە ۋیەرۊنە و حیج راوکەرۍ مەتاۋۊ کەرۊشا ئامانج.

وەختۍ سەرو کەشېوە نیشتارە و وەروو دەمیمەنە میزۆپۆتامیا بە دیار کۊت، دەنگوو دەرېوە دلۍ چاڵایی دارستانێوەنە بێنە گۊش و هەۋېوە فێنک هۊرکەرۊ، ئا وەختە ئینسان جە کەلیمەکا ئا گۆرانیۍ میاۋۊنە.

حەرپۊکەی کەش ئا ئینسانا ئازاڎ کەرۊ، کە راسی ۋېشا مشناسا. ۋەرو ئانەی چېکە ۋېشا جە دڵەتەپۍ ڕۋانەی بەکۆیلەبیەی زەڕی رزگار کەرا و ۋېشا مشناسا. شمە راسی سیستمی مشناسدۍ، کە یەک دەقەیچتا پۍ ئیسراحەتی نمازۊوە. راسی ئا سیستمەیە کە ڕا و رێبازو ژیۋای ۋېش مسەپنۊ، مشناسدۍ.

کەشەکۍ ئاگەی جە ۋەران ۋەرو هجومەکا سەرمایەدارینە پېسە دیوارێنۍ. بە کەش و شیوەکاشۊ پېسەنە دیوارێوە سروشتی ۋەروودەمو ئا سیستمەینە.

دۊڵەکۍ ئاگەی پۍ گرڎ لېوە با بە پەناگە.

حەرپۊکاتی ئانۍ کە ڕای راسیشا گېرتەن ۋەر، پەی پارېزنای ئازاڎیی ۋېشا ئاماڎېنۍ پۍ جەنگی.

جە مەژگوو ئینسانەکانە جیای لیبڕاڵیزمی و تاکگەرایی، پەی ژیۋایۍ کۆمۆناڵی ئینسان چنی ژیۋگەی، ئاماڎەن پۍ جەنگی.

ئاخېزەکەما پی دیالێکتیکەو  کۊشیای پەیوەنڎییەکا بەینو کەشی و ئینسانەکا بەقوەتتەر کەرۊ.

ئا دیالیکتیکە، دیالیکتیکی کۊشیاین کە جە دماینە دوژمنوو مرۆڤایەتی، دوژمنوو تاریخی شکس پنەمارۊ.

جە کەشەکا کوردسانینە ئا دیالیکتیکەو کۊشیای جە هەمان وەختەنە فاڕیۊ پۍ ۋەشەویسی ژیۋای.

ئا هەستە فاڕیۊ پۍ سەرچەمەو وزەی بێکۆتایی هەستەکېش هامڕېشەنۍ و جە هەمانوەختەنە توڕەیی ۋەران ۋەرو سەرمایەداری فاشیستی.

ئا راسیەی کە ئینسانەکۍ تا دماساتوو کۊشیای ئاماڎېنۍ پۍ بەختکەرڎەو گرڎ چېۋۍ.

ۋەرو ئانەی کەشوو شۆڕشگێڵنان، کەش گەریلاکا سەرجەنۊ کەراوە بە ئینسان.

ئا کەشۍ، کەشە ئازاڎەکۍ کوردسانینۍ.

هـ . ش