مەراسیموو نەورزۆوو ئێساڵی جە ئەڵمانیانە ٢٣ۍ ئاداری جە رەبستۆک پارکەنە جە فرانکفۆرت ئەنجام مڎریۆ.

هامسەرۆکوو کۆمیتەو ئاماڎەکاری نەورۆزوو فرانکفۆرتی، کەریم گۆک ئاماژەش بە ئاماڎەکاری کارەکا نەورۆزی کەرد و داواو بەشداریکەردەی ۋەرفراوانیش جە گرڎ لایۍ کەرد.

گۆک ئانەش دەسنیشانکەرد پێسە پێگەو ئەنجامدای مەراسیموو نەورۆزی فرانکفۆرت گونجیان و ئینا دلێڕاسەو ئەڵمانیاینە و پۍ گرڎ کەسۍ ئاسانا.

گۆک ئەرەیاۋناش نەورۆزوو ئێساڵی نەورۆزێوە جیاوازا و جە چوارچێوەو هەڵمەتەو 'ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کوردی' نە ملۆڕاوە و واتش: جە نەرۆزوو ئێساڵینە داواو ئازاڎیی جەسڎەیی ڕابەروو گەلوو کوردی عەبدوڵا ئۆجالانی کەرمۍ. نەورۆزوو ئێساڵی بە دروشمەو 'نەورۆزوو ئازاڎییا، ئازاڎیی تۆ، ئازاڎیی ئێمەن' ئەنجام مڎریۆ.

نەورۆز بۆنێوە نەتەوەییا، پۊکەی جە وەختوو پلانەکا ئاماڎەکارینە سەروو بنەماو کۆنسێپتێوە نەتەوەیی هورش سەنگنمۍ. هونەرمەنڎا کۊکەرمێوە و پۍ ئانەی ڕەنگێوە کوردسانی بڎەیمۍ بە نەورۆزی."

بە پاو ئا زانیارییا کە گۆکی وەڵۍ کەردێنۍ، جە نەورۆزوو ئێساڵینە کەلوو پەلی  کلتوری و واردە ئاماڎە کریۆ. حەرپاسە پۍ زاوڵا دلۍ پارکەکینە گەمۍ زاوڵاشا ئاماڎۍ کەردێنۍ. وە بە ئاماڎەبیەی نویسەرا کتێبۍ ئاماڎۍ کریا و پۍ ۋەنەرا ئیمزا کریا.

نەورۆزوو مدرامانیا

گۆک ئاماژەش پانەیی کەرد نەورۆز بە تەنیا جەژنێوە ئاساییە نیەنە، بەڵکم جەژنەو بەرکۊتەی و دژایەتیکەردەین ۋەرا ۋەر بە زوڵمی و ستەمی، پۊکەی جەژنەو تازەبیەیۆینە و واتش: "ئا پەیامەی جە نەرۆرزەنە مڎریۆ، جووابێوەن پۍ سیاسەتوو دووەلایەنەو ئەڵمانیای و سیاسەتوو قڕکەردەی دەوڵەتوو تورکی. گەرەکمانە دەوڵەتا ئەوروپای، داخوازییەکا ئازاڎیی و ستاتۆوازی کوردا بوینا. گەرەکمانە ئانەی نیشانە بڎەیمۍ کە سەڎێوەتەریچ چێروو ئەرەگیرینە مەژیومۍ. هەتا ئازاڎیما بەدەسمارمۍ کۊشیایما بەردەوام بۆ، پۊکەی ئی نەورۆزە نەورۆزوو مدرامانیا."

کورد مەبۆ مەسڵەحەتەکاش کەرۆ قوربانی

کەریم گۆک، هامسەرۆکوو کۆن-مەدی، دمادمایی قسەکاشەنە واتش: "وەڵۍ گرڎ چێوێنە پێویسا هەڵوێسوو دەوڵەتوو ئەڵمانیای سەبارەڎ بە پرسوو کوردی فاڕیۆ. کورد مەبۆ بۆ بە قوربانی پەیوەندییەکا بەینوو دەوڵەتەکا، مەبۆ بۆ بە قوربانی مەسڵەحەتوو لایەنەکا. پرسوو کوردی مەبۆ پەیوەندیش پا ئاستەیۆ بۆ کە دەوڵەتوو تورکی دیاریش کەرۆ، پێویسا جە ڕوانگەو چارەسەرییوە بە وینای ڕاسیەکا چنیش مامەڵە کریۆ. ئێمە ڕای گرڎیی دیموکراتیکی ئەڵمانیای پۍ نەورۆزی خوڵقە کەرمۍ. پێویسا ڕێز جە داوا ڕەواکا گەلوو کوردی گیریۆنە. حەرپاسە داوا جە کوردا کەرمۍ دەنگوو ۋێشا دژوو کۆمکوشی کلتووری و فیزیکی جە مێڎانەکانە بەرز کەراوە."