پارێزنه‌راو سەرنیشت و وەرکەوتوو سوریای به مه‌به‌سوو لوای پەی ئیمرالی و کەرڎەی دیداری چەنی ڕابەروو گه‌لوو كوردی، عه‌بدوڵا ئۊجالانی داواكاریێوەشا پێشكه‌ش به نه‌ته‌وه یۊگێرتەکا كەرد.
ده‌سوەڵێوزیی پارێزنه‌راو سووریای پەی بۊ وەرگێریكەرڎەی جە ڕابه‌ر عه‌بدوڵا ئۊجالانی و ده‌سوەڵێوزیی ئازادیی ڕابه‌ر عه‌بدوڵا ئۊجالانی سوریانە، به مه‌به‌سوو لوای پەی ئیمراڵی جارێوە تەر داواكارییشا پێشكه‌ش به نه‌ته‌وه یۊگێرتەکا كەرد.
قامیشلۊنە، كۊنفڕانسێوە رۊنامه‌نویسینە وه‌رده‌موو نویسگه‌و ئه‌نجوومه‌نوو باڵاو په‌نابه‌راو سه‌ر به نه‌ته‌وه یۊگێرته‌كاوە، پارێزنه‌را و ئه‌نداماو هه‌ردووە ده‌سوەڵێوزییه‌كەی قامیشلۊ و كۊبانێنە ئەرەیاوناێوەشا واناوە و دلێشنە سه‌رنجەشا پەی سیستموو ئه‌شكه‌نجه‌ی و گۊشه‌گیریی ڕه‌هاو ئیمرالی کێشتە.
جە به‌شێوە تەروو ئەرەیاونیا‌كه‌ینە ئامان، ڕابه‌رعه‌بدوڵا ئۊجالان جە ساڵەو ١٩٩٩، جه ئه‌نجاموو دادگاییكەرڎێوە نادادپه‌روه‌رانەی زیندانوو ئیمرالینە، هه‌لومه‌رجێوە نائینسانانە و نایاسایینە زیندان كریان و ده‌وڵه‌توو توركی مافه سه‌ره‌تاییه‌كاو ئینسانی پاشێلۍ کەرۊ.
ئەرەیاونیاکەینە ئامان، كه ساڵانی ویەرڎەنە سه‌روو ڕابه‌ر ئۊجالانی دژوارتەر كریانۊ و ده‌وڵه‌توو توركی، گوشه‌گیریێوە تندش ملەرە سەپنان. دماین جار ساڵەو ٢٠١٩ چەنی پارێزنه‌راش و ساڵەو ٢٠٢١ چەنی بنه‌یانە‌كه‌یش دیدار کەرڎەن. باره‌و دۊخی ته‌ندروستیشۊ هیچ زانیاریێوە نییا. ده‌وڵه‌توو توركی یاسێکێش و یاسا میاننه‌ته‌وه‌ییه‌كا پاشێلۍ کەرۊ، گۊشه‌گیری بییەن بە ئه‌شكه‌نجێوە ده‌روونی.
باسیچ چا نامه هه‌ڕه‌شاوییا کریان، كه پەی ڕابەروو گه‌لوو كوردی کیانیێنۍ و وچیان، "ئا نۊعە نامۍ و سزێکۍ دیسیپلینوو ده‌وڵه‌توو توركی بەرش وزا، كه ژیوای ڕابه‌رایه‌تی تەرسیش سەرنە. ده‌وڵه‌توو توركی به گردوو نۊعەکا سڕیەیۊ و دلینەبەرڎەی په‌یڕه‌و کەرۊ. جە ١٠٠ ساڵه‌و دووه‌موو په‌یماننامه‌و لۊزانینە، جە كه‌سایه‌تیی ڕێبه‌رایه‌تینە دۊزوو كوردی کەرا ئامانج.
هه‌رپاسە ڕه‌خنه جه بێهه‌ڵوێستیی سی پی تی و ڕێكوزیایه میاننه‌ته‌وه‌ییه په‌وه‌ندیداره‌كا وەراوەروو گۊشه‌گیریی تندوو سه‌روو ڕابه‌ر عه‌بدوڵا ئۊجالانی كریان و وچیان، ئێمه ئیدانه‌و ئا تندوتیژییه دوور جە ئینسانیەتییەی و دژ به یاساكا کەرمۍ."
ئاخیروو ئەرەیاوناکەیۊ ئامان، ئێمه جارێوە تەر نیگه‌رانیی وێما باره‌و دۊخوو ڕابەروو گه‌لوو كوردیوە میاونمۍ ڕای گردینۍ و داواكارێنمۍ دیدار چەنی ڕابه‌رایه‌تیی کەرمۍ. درێژه به كۊشیایما پەی به‌ده‌سئارڎەی ماف پەی ئازادیی ڕێبه‌رایه‌تی مدەیمۍ. داوایچ جە ڕای گردینوو میانده‌وڵه‌تی كەرمۍ پەی ورگێرتەی گۊشه‌گیریی فشار وزۊ سه‌روو توركیای.
دماو وانایۊ ئەرەیاوناکەی ئا پارێزنه‌رۍ به نویسیاێوە، داواكارییه‌كێشا پەی لوای پەی ئیمرالی و هه‌لومه‌رجوو ئیمرالی پێشكه‌ش به نویسگه‌و ئه‌نجوومه‌نوو په‌نابه‌راو سه‌ر به نه‌ته‌وه یۊگێرته‌كا كەرد.
س.ز
