ئەرەنیشتۍ عامودێ جەنازەو ئەنڎاما هێزەکا ئاسایش و دلېینەی گەشمەرڎە یونس محەمەد، سەلاحەدین حسێن، بەشار عەلی و محەمەڎ جەلۆیان جە چوارڕیان و دربێسیوە بە ۋاتەیۊ دروشمەو دڵسۆزی پۍ گەشمەرڎا، فاڕېوە پۍ قەبرسان و گەشمەرڎە ئیسماعیل هۆگری.

جە قەبرسانەنە دەیەقېوە ڕێزگېرتەی لوواڕاوە، دماتەر ئەنڎاموو مەجلیسی خانەواڎەو گەشمەرڎا عامودێ محەمەڎ ئەحمەڎ قسېش کەرڎۍ و سەرەوەشیش جە کەسوکاروو گەشمەرڎا کەرڎ.

ئەحمەڎ بێدەنگی ڕووسیا و ئەمریکایش جە ۋەران ۋەروو هجومەکانە شەرمەزار کەرڎ و جە درێژەو قسەکاشەنە ۋاتش: ئێمە جە ۋەران ۋەروو ئا هجومانە بێدەنگۍ مەبیمۍ و پەشتیوانۍ جەنگەوانەکامانمۍ، حەرپاسە وەعدوو بەردەوام دایش بە ڕێبازوو گەشمەرڎا دا.

نوێنەرو هێزوو ئاسایش و دلېینەی حسێن سادە سەرەنجش وست سەروو فیداکاری گەشمەرڎا و ۋاتش:"ئی قارەمانۍ گیان و ۋېشا فیداو وڵاتەکەیشا کەرڎ، ئی گەشمەرڎۍ جە لاو خوڎایۊ زینڎېنۍ".

سادە ئانەیچش وست ڕووە، کە دەوڵەتوو تورکی ئەرەگیری مەتاوۊ گەلا هەرێمەکەی جە هەنترینی بڕۊرە پی جۊرە بەردەوام بۍ:"ئێمە بە تورکی ئەرەگیری ماچمۍ؛ ئێمە سەروو ئی خاکیۊ مژیومۍ، شمە کاولیچش کەرڎۍ دیسان ئاوەڎانش کەرمۍ، تۆ مەتاوی گەلوو قارەمانوو کورڎی، عەرەب، سوریان، تورکمان و چەرکەسی جە هەنترینی بڕیرە. ئێمە سەروو ئی خاکیۊ مژیومۍ، مرمېچ مەردەیما سەروو ئی خاکیۊ بۊ."

دماو قسەکا بڕوانامەو گەشمەرڎا ونیاوە و دریا دەسوو خانەواڎەکاشاوە.

جە ئاخرەنە جەنازەو گەشمەرڎا بەدروشمە و هەلهەلەو ئەڎایا بەخاکی سپاریۍ.