خەڵکوو شارۊچکەو شەدادی سەر بە حەسەکەی، بەشدارۍ بیۍ مەراسیموو بەخاکسپارای جەنازەو جەنگەوانوو هێزەکاو سووریای دیموکراتیکی (هەسەدە)ی نەسار مەعیوف سەلجی، کە ٢ ئابینە، وەختوو پۊڕنای هەرمانەکێشەنە مەنتێقەو سەعدەو شەدادینە گەشمەرڎە بی.

مەراسیمەکەنە، بنەیانەو گەشمەرڎەی و ئەنداماو ئەرەمەرزیا سەروازی و مەدەنییەکا و ڕیشچەرما و خەڵکوو شارۊچکەکەی بەشدارۍ بێنۍ.

مەراسیمەکە بە دەیەقێوە مرڎای پەی گیانی پاکوو گەشمەرڎا دەسش پەنە کەرڎ، چەنی نمایشێوە سەروازیی جەنگەوانانو هەسەدەی، دماتەر ئەنداموو مەجلیسوو بنەیانەو گەشمەرڎا شارۊچکەی سورنە جە دەگاو دەیرەزۊر، غەیس خەڵەف، باسش جە دەوروو گەشمەرڎا کەرڎ، جە پارێزنای ئارامی و ئاسایشوو هەرێمەکەینە و واتش:" ئی گەشمەرڎۍ داستانۍ قارەمانانێشا تۊمارە کەرڎە، جە پارێزنای پڕۊژەی نەتەوەی دیموکراتیکینە، کە هەرێمەکەش جە هجووموو تیرۊریستا پارێزنا".

هەرپاسە ئەوەخوایش کەرڎۊ: "گەشمەرڎۍ سەرمەشقۍ هەقەتینێمانۍ، بە جەستەو وێشا گەورەتەرین داستانەی قارەمانانێشا تۊمارە کەرڎە، وەرموو ئەرەگیراشا نیا قەبرە، کە گەرەکشا بۍ هەرێمەکەیما گێرا و پڕۊژە دیموکراتیکەکەیمان وڕنا".

لاو وێشۊ، فەرماندە جە مەجلیسی سەربازی دەیرەزۊرینە، سەعد غەریب، سەرەوەشییش جە بنەیانەو گەشمەرڎەی کەرڎ، وەعدش دا بە هەقکەرڎەیۊ ونەو گەشمەرڎا و واتش: "ئی گەشمەرڎە بەنرختەرین چێوۊ وێش بەخشا پەی نیشتیمانی و ئازادیی گەلەکەیش و سەرکەوتەی پڕۊژەو نەتەوەی دیموکراتیکی، درێژە بە ڕێباز و ڕێکێش مدەیمۍ و هەقەو ئێدی و گرڎوو گەشمەرڎا کەرمێوە".

دماتەر ئەنداموو مەجلیسوو بنەیانەو گەشمەرڎا شارۊچکەو شەدادینە ئایات ئیبراهیم، شناسنامەو گەشمەرڎەیش واناوە و داش دەسوو بنەیانەکەیشۊ، ڕەفێقەکێش جەنازەکەشا وست سەروو شانەیشا و دلۍ هەلهەلەو ئەدایانە ئسپاراشا بە خاکی.

س.ز