ورسەنگنای ئەنداموو کۊمیتەو ڕاوەبەریی پەکەکەی دوران کاڵکان پێسنەن:

"هەڵمەتەی شۊڕشگێڵنییەو ١٥و ئابوو ١٩٨٤ کە تارێخوو ئازاڎییش دەس پەنە کەرد، ٣٩ ساڵێش ویەرنا و پا منیۊ ساڵەو ٤٠ەمینیوە. پێسە ٤٠ەمین ساڵەو مدرامانی و ئازاڎیی کورڎا دەس پەنە کەرۊ. جە چوارلاو کوردستانی و بەروو وەڵاتیوە  ئا ساڵیادەو پەیدابییەی ئازاڎییە بە چالاکیی فرەڕەنگ و جیاجیا مەبارەک کریۊ. بەتایبەتی زاپ، ئاڤاشین و مەتینانە گرڎوو مەیدانەکانە کوردستاننە گەریلا بە چالاکیی سەرکەوتانە ئا هەڵمەتە گەورۍ مەبارەک کەرا.  

ئێمە جەژنەو گەریلای و ژیوایۊ ١٥و ئابی سەرەتا جە رابەر ئاپۊی، گرڎوو هامڕایا پارتیما، گەلەکەیما و دۊساما مەبارەک کەرمۍ. بەتایبەتی مدرامان و هەڵوێستی قارەمانانەو گەریلاکاو هەپەگەی و یەژاستاری سڵامشا وەنە کەرمۍ، کە دژوو ئەرەگیری قڕکەری وێگێری کەرا و ڕا بە فاشیزمۍ گێرا. جە کەسایەتیی هامڕایا عەگیدی و زیلانێنە گەشمەرڎاو هەڵمەتەی قارەمانانۍ کورڎاوە بە ڕێز، وەشەسیایی و پەنەزانایۊ یاد کەرمێوە. جە ساڵەو ٤٠ەمینە سەرکەوتەی پەی گرڎوو ئانیشا موازمۍ، کە کۊشیای دیموکراسی و ئازاڎیی بەرا ڕاوە.

بێگومان مشۊم سەرەتا باس جە هەلومەرجە سیاسییەکاو پێکئامای هەڵمەتەی شۊڕشگێڵنییەو ١٥و ئابی کریۊ، پێسە ئەنجام و کاریگەریی هەڵمەتەکۍ متاویۊ خاستەر ورسەنگنیۊ.

وەختۍ پەدەکە کوردستانش جیا ئاست

مزانمۍ کە جە ئاخروو ساڵاو ١٩٧٠ و سەرەتاو ١٩٨٠ ناکۊکی و جەنگ بەینوو هێزەکاو ئەمریکای و یۊبییەی سۊڤیەتینە دماییش ئامابۍ. لایەنەکۍ پەی دلێنەبەرڎەی وەراوەرەکاشا و بەرهەمئارڎەی چەکی کیمیاییچ بەینشانە، دەسشا بە پەرەپەنەدای بە گرڎ نۊعە چەکێوە کەرد. ئیدارەو ئەمریکای چا وەختانە بە پلانەو 'جەنگوو هەسارەکا' هەوڵێش دۍ باڵادەس بۊ. یۊبییەی سۊڤیەتی کە وێش پێسە سۊیالیست نامۍ نیابۍ و جە هجووم  و لوای دلۍ ئەڤغانستانیوە سەرکەوتە نەبۍ. نەبوو، خەریکوو بڕۍ فاڕیایا بۍ، کە جە ئیدارەو سەرڎەموو میخائیل گورباچۊفینە بەرجەسە بی.

جە وەرکەوتوو دلێڕاسەینە کاریگەرتەرین ڕووەدایۍ بێگومان جەنگوو بەینووعەرەبی و ئیسرائیلی بۍ، مدرامانوو فەلەستینییەکا بۍ. ئاڵۊزی و جەنگوو بەینوو ئێرانی وعێراقی جە ڕاو پەیمانەو جەزائیریوە جە ڕوواوە مرڎابۍ. تورکیایچنە بەتایبەتی جە ڕووەو ئابووری و سیاسییوە جە گرڎوو بوارەکانە تەنگەژە و گێچەڵە ئارانە بۍ، سیستموو دەوڵەتی، کە جە ٢٩و تشرینوو یوەموو١٩٢٣ ئەرەمەرزیابۍ، ئیتر دەرڎە نەوەرۍ و کارامەییش نەمەنەبۍ. پەیماننامەو جەزائیروو ساڵەو ١٩٧٥ کاریگەریی قورسش سەروو کورڎا نیارە، پەدەکە و بارزانی شکسشا قبووڵ کەرد و ورێشنیێوە و کوردسانشا جیا ئاستەبۍ.

ناتۊ و دماکەوتەیی مەنتێقەکەنە، ١٢و ئەیلوولیش چەنی وێش ئارد

دلۍ ئی هەلومەرجەینە، دووۍ ڕووەدایۍ گرنگۍ کوردستاننە و وەرکەوتوو دلێڕاسەینە ڕووەشا دا. یوەم، ڕابەروو گەلوو کوردی، عەبدوڵڵا ئۊجەلان، کە جە ساڵەو ١٩٧٣ەوە هەوڵۍ وەشکەرڎەی پارتێوەش دا و مدرامانێوە تازەی کوردییش دەس پەنە کەرد، ئاخروو ساڵەو ١٩٧٨ینە پەکەکەش مەرزنارە. بە مدرامانوو حیلوانی و سێوەرەگی قۊناغێوە کۊشیایش دەس پەنە کەرد و کاریگەریێوە فرەش سەروو تورکیایۊ نیارە. دووەمیچ، هامپەیمانیی ئێرانی، کە فرەش ئیسلامیۍ بێنۍ، مانگەو شوباتوو ١٩٧٩ینە سیستموو پاشایەتیی ئێرانیش وڕنا. شۊڕشوو ئێرانی کە ورڎە ورڎە دلۍ وێشنە تووشوو دایپێوەرەی بی، کاریگەریی فرەش پەی سەروو وەرکەوتوو دلێڕاسەیچ بۍ.

وەراوەروو ئی دووە ڕووەدایانە و دژوو دۊخی کاریگەروو مدرامانوو فەلەستینی، هجوومێوە تازە بە سەرکرڎایەتیی ناتۊی و دماکەوتەیی مەنتێقەکەنە دەسش پەنە کەرد. بە سەرکرڎایەتیی کەنان ئەڤرەنی، سەرۊکئەرکانوو سوپاو تورکی، کە پەیوەندییش بە ناتۊیۊ کەرد، جە ١٢و ئەیلوولوو ١٩٨٠ینە، بە ڕژێمێوە سەروازیی کودەتای سەروازییش کەرد و دەسش سەروو حوکمەتیرە گێرت. جە ٢٠وو ئەیلوولوو ١٩٨٠ینە بە هەوڵۍ و ھانداێوە شاریاوەو ئەمریکای، حوکمەتوو عێراقی پەی دەسوستەیۊ ئا چێوا جە ڕێککەوتەینامەو ساڵەو ١٩٧٥ جەدەسش دێبێنۍ، جەنگش دژوو ئێرانی دەس پەنە کەرد. پاسە گەرەکشابۍ ئا هەوا شۊڕشوو ئێرانیوە ورشکەرڎەبۍ جە ڕاو جەنگوو عێراقیوە دماییش پەنە بارا و مدرامانوو ئازاڎیی تازەیچ، کە کوردستاننە دەسش پەنە کەرد، بە هجوومەکاو ڕژێموو سەروازیی فاشیستی ١٢و ئەیلوولیوە سەرکوت کەرا.  

چا چوارچوەیچەنە ڕژێموو کەنان ئەڤرەنی، وەروو ئانەیە هێزە دیموکراتیکەکا تورکیانە بێکاریگەر کەرۊ و بەتەمامەتی مدرامانوو کورڎە ئاپۊییا سەرکوت کەرۊ، دەسش بە هجوومی دژواری فاشیستی کەرد. حەرچێوۍ کە نامۍ کوردیش پۊوە بیۍ، قەدەغەش کەرد و پەی سەرجەنۊ ئەرەگیرکەرڎەی کوردستانی و دلێنەبەرڎەی بییەی کورڎە وەڵاتپارێزنەکا دەسش بە ھجوومە دلێنەبەرەکاش کەرد. سەدان جەنگاوەرۍ پەکەکەی و دەیان هەزار وەڵاتپارێزنۍ کورڎۍ گیریۍ. دژشا سیستمێوە ئەشکەنجەدای نائینسانانەش وستۊ گەرەکش بۍ هۊشمەندیی بییەی و ئازاڎیی کوردی سەرەتا جە زینڎانەکانە دلێنە بەرۊ.

زینڎان پەی جەنگاوەراو ئازاڎی جبەرۊ بی بە بانگەوازوو مدرامانی

کادرۍ و ھەوادارۍ پەکەکەی، کە ڕووبەڕووۍ دژوارتەرین فشاری و ئەشکەنجەی تارێخی بیێوە،  جە ٢١و ئاداروو ١٩٨٢ بەدماوە بە سەرمەشقایەتیی مەزڵوم دۊغان، فەرهاد کورتای، کەمال پیر و خەیری دورموش، دەسشا کەرد بە مدرامان، بە گێرتەی ڕۊچۍ مەرڎەی ١٤و تەمووزی، سیستموو دەوڵەتوو تورکیایشا جە ڕووە ئایدیۊلۊژییەکێوە شکس پەنە ئارد. پێسەیچە ھێزێوە تازەو قەرارڎایشا پەی مدرامانوو ئازاڎیی خولقنا، نیشانەشا دا کە جە گرڎ بارودۊخێوەنە کریۊ پەی بییەی و ئازاڎی مدرامان کریۊ. ئا دۊخە پەی جمیەروو ئازاڎیی کوردستانی بە سەرمەشقایەتیی ڕابەر ئاپۊی باڵادەسیێوە قەوەتی ئایدیۊلۊژی و دەروونییش خوڵقنا و پەی جەنگاوەراو ئازاڎی جبەرۊ بی بە بانگەوازوو مدرامانی.

مدرامانی تازەو کوردی دەسش پەنە کەرد

هەڵمەتەو گەریلای بە چالاکییەکاو دیھۍ و شەمزینانی، کە ١٥و ئابوو١٩٨٤ بە سەرمەشقایەتیی فەرماندەی نەمر مەعسوم کۊرکمازی دەسش پەنە کەرد، جوابێوە سەرکەوتە بۍ پەی ئی بانگەوازە گەورەیە. گەریلاکاو پەکەکەی کە جە ڕووەو ئایدۊلۊژی و سەروازییوە جە لوبنان-فەلەستیننە ئەرەئارڎەی و ئامادەکاری کەرێنۍ، ئیسفادەشا جە بارودۊخی کرڎەیی و سیاسیی شۊڕشوو ئێرانی و جەنگوو عێراق-ئێرانی ورگێرت و جە ١٥و ئابوو ١٩٨٤ بە دماوە دەسشا کەرد بە مدرامانێوە تازەی کوردی.

 بەدڵنیاییوە گەریلاکاو پەکەکە بە بڕوابییەی بە هێز، هۊشیاری و باوەڕیشاوە خەباتشا دژوو سوپاو تورکی سەر بە  ناتۊی دەس پەنە کەرد و بەردشا ڕاوە. جەنگوو ئێرانی و عێراقی بی بایسوو ئانەیە کە  سنووروو دەوڵەتوو تورکیای چەنی عێراقی و ئێرانی تا ڕادێوە دیاریکریا بێکۊنتڕۊڵ مەنۊوە و ئی جەنگە  سیستەموو ڕاوەبەرڎەی کورڎەکاش بەهامبەشی کە جە ڕاو پەیمانەو لۊزانیوە ساز کریابۍ بێکاریگەر کەرد و گەریلاکێچ ئیسفادەشا چینەیە کەرد. ڕابەر ئاپۊ سات بە سات ڕووداوە سیاسی و سەروازییەکێش بەدروسی ورسەنگنا و بە هەوڵێوە فرەوە پارتەکەش یۊ وست و بەروو وەڵاتیوە ئارڎێشرە و ئامادێش کەرڎۍ. ڕابەر ئاپۊ ئا هێزە هەقەتینە بۍ، کە گرڎوو ئی وەڵێکەوتەیاشە خولقنۍ. پێسە جە کەسایەتیی زینڎانییاو ئازاڎی، کە وەرەنگارۍ ئەشکەنجەی بیێبێنێوە و مدرامانشا کەرد، ڕژێمی سەروازیی فاشیستیی ١٢و ئەیلوولی، چەنی شکسوو ئایدیۊلۊژی تارێخیی جە زینڎاننە، نەتاواش وەربەسێوە بۊ وەرڎەموو بەئەنجامیاونای هەڵمەتەو شۊڕشگێڵنیی ١٥و ئابی و کەوتەی دلۍ پڕۊسەو شکسی تارێخیوە.

هەڵمەتەی شۊڕشگێڵنیی ١٥و ئابوو گەریلای بەرش وست، کە دژوو سوپای دڕندۍ تورکیای، کە پەشتی بە ناتۊی بەسۊ و سوپای دووەمەو ناتۊینە، متاویۊ بە ڕێبازوو گەریلای جەنگ کریۊ، ئینەیچە هەنگام بە هەنگام سەلەمییا.

 ئیدارەو ئەڤرەن- ئۊزالی، کە ساڵەو ١٩٨٤ بێدەسەڵات بی وەراوەروو گەریلاکاوە، ساڵەو ١٩٨٥ بەدماوە ئی دۊخەشە بەرڎە ناتۊ و جەنگوو گەریلاکاو کوردی لاو ناتۊیۊ لوا ڕاوە، وەلۍ هەرگیز نەتاواشا بە ئامانجەکاشا بیاوا، کە دلێنەبەرڎەی گەریلاین. هەم ڕژێمی سەروازیی کەنعان ئەڤرەنی و ئیدارەکاو دماتەری، بەتایبەتی هامپەیمانیی فاشیستیی ئاکەپە-مەهەپەی، بە فاڕیایەکاو دلۍ دەوڵەتوو تورکی بەرڎەوام پەشتیشا پی دۊخەیە بەستێنە.

پەدەکە ئا وەختیچە چەنی سوپاو تورکی هجوومش کەرد

هەنگامەی شۊڕشگێڵنانۍ ١٥و ئابی، کە جە ڕووەو تاکتیکی و ستراتیژییوە پەکەکەش کەرد بە هێزێوە کرڎاری، هێزوو گەلوو کوردی جە تارێخۊ مۍ و قارەمانیەتیی ئینسانوو کوردیش سەرجەنۊ نیشانە دا. ژەنا و گەنجاو کوردی کە بە ئازایەتی و قوربانیدای وێشا بە فکری ئازاڎیی ڕابەر ئاپۊی وێشا ڕازناوە، بە گرڎوو لاێوە نیشانە دا کە هێزێوە نەبەزیان. سەرەتا لە بۊتاننە،  فرەو مەنتێقاو سەرنیشتوو کوردستانینە، جە وەرنیشتوو کوردستانی و بەروو وەڵاتیوە، ژەنی و گەنجاو کوردی جە ١٥و ئابینە بەجۊشوخرۊشەوە خێرامایشا جە هەڵمەتەو گەریلاینە کەرد و سەروو بنەماو پەشتیوانیی گەریلای جە بەرەکاو مدرامانینە کوۍ بیێوە و پێسە بناغەکاو نەتەوەی دیموکراتیکی و نەتەوەبییەیشا ئەرەمەرزیۍ. هەر پێسە ئیساتۍ تەنیا ئیدارەو پەدەکەی وەراوەروو ئی   وەڵیکەوتەیۍ مرڎێوە و چەنی سوپاو تورکی هامپەیمانییش کەرد و هجوومی سەروازییش پەی سەروو گەریلاکاو پەکەکەی دەس پەنە کەرد.

مدرامانوو ئازاڎیی تازەو کورڎی کە سەرو ئەساسو هەڵمەتەو ١٥ و ئابی دەسش پنەکەرڎ، کاریگەریۍ فرەش سەرو مەنتیقەو ۋەرکەوتو و میامینی بۍ، بە خێرایی فاڕیایش سەروو هامپەیمانی و پەیوەنڎییە سەروازی و سیاسییەکا مەنتیقەکەیرە ئارڎ. سەرەتا چارەسەری قۊرتە و کورڎیش سەرو گرڎوو مەنتیقەکەیرە سەپنا و هانەو دەوڵەتەکاش دا پۍ ئانەی هەڵوێسی سیاسی تازە نیشانە بڎا. چا سەردەمەنە تەنیا قۊرتە و جەنگ و مەنتیقەکەی ملەملانۍ بەینوو عەرەبی و ئیسرائیلی بۍ. چنی ئی ملەملانۍ، قۊرتەو کورڎی پېسە قۊرتېوە تازۍ و ۋەرفراوانتەر، وست دلۍ رۆژەڤی سیاسی مەنتیقەکەی. ملەملانۍ و جەنگەکۍ تەرۍ وردە وردە سەرو ئاستی لاوەکی مەنۊ. قۊرتەو کورڎی ئا قۊرتۍ بۍ کە پەیوەنڎییە سەروازی و سیاسییەکۍ مەنتیقەکەیش دیاری کەرڎ. پاسەش سەر ئاما جەنگوو عێراقی و ئێرانی کە چنەشەنە حەردووەلا نەتاۋاشا شکس بە یۊترینی بارا و نەتاۋاشا ڕێکۍ گنا، جە وەهاروو ساڵەو ١٩٨٨ ی بە ئیسفاڎە هۊرگېرتەی جە کەشوو کردەیی و سیاسی جەنگ و پەکەکە' ی دمایش  پنەئاما.

کاریگەرییەکۍ چالاکیی ١٥و ئابی جە جەهانەنە هەڵای ڕۊشن و ماناڎارا. ئا هێزۍ گرەو سەرو ئانەی کەرېنۍ مدرامانوو کورڎی جە دژوو کودەتا و ١٢و ئەیلولی دەس پنە کەرۊ، تا ڕادېوە تەعاجوب کەرېنۍ ۋەختۍ پرۆسېوە پا جۊرە دماکۊت. ۋەردەموو چالاکییەکا دیھۍ و شەمزینانی جە ١٥و ئابو ١٩٨٤ی ۋاچېنۍ "مدرامانی چەمەڕاکریا و کورڎی دەسشپنەکەرڎەن". بەشێوە جە وڵاتە ئەوروپیەکا کە پەی مەسڵەحەتە سیاسی و ئابوورییەکا تورکیای ۋەران ۋەر بە کودەتاکۍ ١٢و ئەیلولی مرڎۍ و جە ئەنجوومەنو ئەوروپای شەکواشا دژوو رژێمی سەروازی کەنعان ئەڤرەنی تۆمارە کەرڎە، دەموودەس دماو ڕووەداکا ١٥و ئابی داواکارییەکېشا کیشنېوە و دەسشا کەرڎ بە پاڵپەشتیکەرڎەی قرکاریەکا دەوڵەتو تورکی. حەر ئا وەختە دیموکراسییە ساختەکەشا ئاشکرا بی.

بە دڵنیاییوە پاڵپەشتی وڵاتا ناتۆ ی پۍ دەوڵەتو تورکی تەنانەڎ چانەیچ زیاتەر بۍ. بە تایبەت جە ٢٨و شوباتو ١٩٨٦ ی جە کوشتەو ئۆلۆف پاڵمەینە، ئا ڕووەدایۍ پېسە پیلانێوە دژ بە پەکەکەی و مدرامانوو ئازاڎیی کورڎی بەکارئاما. دماتەر دۆسیەو دوسێلدۆرفی جە ئەڵمانیا ڕێکوزیا کە درێژتەرین دۆسیەو ئەوروپای بۍ. ئینۍ گرڎ پۍ قەڎەغەکەرڎەی خەباتی پۍ ئازاڎیی و بیەو گەلوو کورڎی و ۋەڵۍ گېرتەی جە پەشتیوانی کورڎی و پەردەپۆشکەرڎەی و پەشتیوانی جە دەوڵەتو فاشیستی تورکی بۍ.

بێگومان مەحاڵ بۍ تەنیا بە یەک چالاکی پەشتیوانی خەڵکو ئەوروپای، جەهانی، ژەنا، گەنجۍ ستەمۋنەکریۍ بەدەس بۍ. ئاژېوە پی جۊرە تەنیا جە ڕاو پەرەپنەداو مدرامانیۊ تاۋیۍ ۋەش بۊ. حەر ۋېش ۋەڵېکۊتەی پی جۊرە بۍ. چېگەنە تاۋیۊ وچیۊ: کورڎ سەروو بنەماو شۆڕشگێڵنی و دیموکراتیکبیەی جە سایەو هەڵمەتەی شۆڕشگێڵنی ١٥و ئابی و جەنگوو گەریلای ۋېش بە گەلا جەهانی، ژەنا و گەنجا ئشناسا و سەرو ئی بنەمۍ عالتەرین پەیوەنڎی و ماناڎارتەرین پەشتیوانی ۋەش بی.

گەلوو کورڎی بە هەڵمەتەو ١٥و ئابی و جەنگ و گەریلای ئیراڎەو ۋېش بەدەست ئارڎ

 جە ئاخرەنە گرنگا کە ئی تایبەتمەنڎیۍ دەسنیشان کریا. چېوەکۍ گرڎ پېسە هوشیاری دروستی ئازاڎیی، ڕێکوستەی، باوەڕ بە ۋۍ بیەی، ئیراڎە جە گلېرگەی کورڎینە جە سایەو هەڵمەتەو ١٥و ئابی و جەنگی سەرەمڕەو گەریلاینە بەدیئامۍ. حەر ۋەرو ئینەیچا پنەش ۋچیۊ 'جەژنەو ژیۋایۊ  کورڎ'ی. جە گرڎ ڕوېوە گوزارشت جە ژیۋایۊ کورڎ بیەو کورڎی کەرۊ. هەڵمەتەو شۆرشگێڵنی گەریلای جە ١٥و ئابی بنەماو گرڎ ۋەڵېکۊتەیۍ ئازاڎیوازەکا ٣٩ ساڵی ۋیەرڎەی کورڎسانین. بەتایبەتی بە هێزو کاریگەر و گرنگ و مدرامانو گەریلاین، ژەنا کورڎی ببیۍ بە خۊتان هوشیاری ئازاڎیی و ڕێکوستەی و ئاخېزوو ئازاڎیی ژەنان.

پەنەوازەن ئی پرسیارۍ کریۊ: ئەگەر هەڵمەتێوە پی جۊرە و خەباتوو گەریلای نەببیۍ، ئاژەو کورڎی چنی بۍ؟ ئایا کورڎ بە شێۋېوە تەرو کۊشیای ئاخۆ کورڎ هوشیارۍ بېنېوە و کاریگەری سەرو مرۆڤایەتی ۋەش کەرۍ؟ سەرو بنەماو ئی پرسیارا متاۋیۊ گفتوگۆ کریۊ. بەڵام جە دماینە تاکە ئەنجامێوە کە متاۋۊ دەورو ئانەینە پنەیاۋۊ، مدرامانو گەریلا'ی بۊ. چونکی رێبازێوە تەرو خەباتی مەتاۋۊ دەوڵەتو تورکی قرکەری و کۆلۆنیالیستی دۆژمنو کورڎی لاواز کەرۊ، مەتاۋۊ گەلوو کورڎی کە کۊتەن ۋەرو گرڎ جۆرە هجومېوە دژ بە مرۆڤایەتی ئاگاڎار کەرۊوە و پەروەردە کەرۊ و کەرۊش بە خۊتان  ئیراڎە و رێکوزیاشا کەرا ئینۍ گرڎ بە جەنگوو گەریلای خوڵقیانە. حەر ۋېش ۋەڵېکۊتەکەی  پی جۊرە بۍ.

ئەگەر چۍ نامەکېچش گەریلا بۊ مەبۊ ئینسان گەریلاکا ئازاڎیی کورڎسانی چنی پراکتیکو گەریلای جە وڵاتا تەرینە تێکەڵ کەرا. گەریلۍ ئازاڎیی کورڎسانی گەریلۍ ئازېنۍ و جە ئاستو باڵاینە پەشتی بەسا بە سەرمەشقی پارتی و ڕابەرایەتی. واتە سەرو خەتەو فیدایی جماوە. چونکی نەکریۍ بە پیمەرەکا تەڤگەری  گەریلاکا وڵاتا تەری جەنگ و سەرکۊتەی دژ بە سیاسەت و عەقڵی قڕکەر-کۆلۆنیالیستی جە کورڎسانەنە بەئەنجام بیاۋۊ. پۊکەی پیمەرەکۍ گەریلاکا ئازاڎیی کورڎسانی بە پاو ۋېشانە، جە فرەو ڕواوە هامشێوە و گەریلاکا یاگەکا تەری نیەنۍ. چونکی قۊرتەو کورڎی جە جەهانەنە هامشێوەش نییا.

 مدرامانو گەریلای کە ماوەو ٣٩ ساڵان وەردەواما و  جە ڕاو ئا ۋەڵېکۊتەی ئازاڎیپارێزنایە جە کورڎسانەنە خوڵقنانش جە دیموکراتیکبیەو تورکیایچەنە دەوری یەکلاکەرەوەش بیەن، جە ١٥و ئابینە پایۍ وزۊ ٤٠ەمین ساڵو مدرامان و ساڵەو سەرکۊتەیۊ. ڕۊشنا کە دەوری تاریخی ٣٩ ساڵەو ۋېش جابەجۍ کەرۊ و جە ساڵەو ٤٠ ەمیچەنە بەیاگېش یاۋنۊ و خوڵقنەرو ئامای وەڵۊو ئازاڎیوازەکا بۊ. چونکی ئیدارەو فاشیستی ئاکەپە – مەهەپەی خەریکا هجومەکا فراوانتەر و چڕتەر کەراوە. جە ۋەران ۋەرو هجومېوە پا جۊرەینە، تەنیا گەریلاکۍ متاۋا مرڎاوە و ۋنەپەرسایۊ جە سیاسەت و عەقڵی فاشیستی قڕکەری کەرا و ڕا  پۍ گرڎ ۋەڵېکۊتەیۍ دیموکراسی کەراوە.

 گەریلاکۍ ئازاڎییی کورڎسانی ئاماڎېنۍ جە ساڵەو ٤٠ەمینە بە شێۋېوە کاریگەرتەر و سەرکۊتانەتەر دەورېوە پا جۊرە ئەنجام بڎا. ئارۊ جە زاپ، ئاڤاشین، مەتینا، خواکورک و گرڎوو کەشەکا کوردسانینە گەریلا گورزەی کۆشندۍ جە چەتە فاشیستەکا ئاکەپە– مەهەپەی مڎا. ئانۍ کە هېزی جە شەنگال، مەخمور، کۆبانۍ و فرەو مەنتیقا تەری جە ۋەران ۋەر بە هجومەکا داعشی مرڎېوە و شکسشا پنە ئارڎۍ، گەریلۍ بېنۍ. ئیسەیچ سەرو خەتەو سەرکۊتەی ۋېڕاگری کەرا.  ئا گەریلۍ بە هەڵمەتەو شۆڕشگێڵنی ١٥و ئابی خوڵقیۍ، مەبەزیا و شکس نمارا.

جارێوە تەر جەژنەو گەریلای و مدرامانو ١٥و ئابی جە گرڎ هێزە دیموکراسی و ئازاڎیوازەکا مبارەک کەرمۍ و ېومېڎەوارېنمۍ  جە چلەمین ساڵەو کۊشیاینە سەرکۊتەی گۊرە بەدەسبارا. سڵام جە مدرامانی قارەمانانەو گەریلاکا هەپەگەی و یەژاستار ی کەرمۍ  کە سەرو خەتەو فیدایی ئاپۆیی جەنگ کەرا".

س . ز / هـ . ش