تاڵانکەردەی ژیۋگەی ڕۆ بە ڕۆ فراوانتەر بۆ. یۆ چا ناوچا کە فرەتەرین تاڵانکاریی ژیۋگەیش چنەنە کورڎەسانا. جە چوارچێوەو سیاسەتەکا دۆڵەتینە پەی تاڵانکەردەی ژیۋگەی وەشکەرڎەی بەنداوی، وێستگەو کارۆ ئاوی، کارگە و سۆچنای دارسانەکا بەردەوامێنې. ئینە کاریگەریێوە گۊرەش هەن پەی سەرو ئاژەو ئیکۆلۆژی، ئابووری و پێکئامای کۆمەڵایەتیی ناوچەکەی. ئی پڕۆژې تەنیا پەی بەکارئاوردەی سامانی سروشتی نیەنې، بەڵکم جە دژو گەلو کوردیچ، پېسە سیاسەتو جەنگی تایبەتی بەکار مەیا.

چالاکو ئیکۆلۆژی زەکی کانای سەرو ئی مژاریە پەی ئاژانسوو هەواڵو فوراتی (ANF) قسێش کەردې و واتش، "کاپیتاڵیزمی دڕندە جە ساڵانی ۋېیەردەنە جە ڕاو جەنگی تایبەتی ۋێشۆ ئی جوگرافیاشە وست چێرو هەیمەنەو ۋێشۆ. بەردەوام جەنگ جە دژو ئی ناوچەیە کریان. ۋەرو ئانەی ئی ناوچە بەرهەمدارا. خەڵکو ناوچەکەی جە ڕاو کشتوکاڵیوە بەشو ۋێشا بەرهەمو کشتوکاڵی بەرهەم مارانە.

دەگایەکې ئی ناوچا چۆڵې مەکریا. پەی بەرکەردەی ئینسانەکا چی خاکەنە هەوڵێوە فرە دریا. کاتێ بەنداوێوە یاخوڎ وێستگێوە کارەبې وەش مکریۆ، تەنیا دەگانشینې زەرەر مەنڎې نمەبا، بەڵکم ئیکۆسیستەمو گرڎو گیانەوەرایچ جە ناوچەکەنە تێکمشۆ. گەرەکشانە یاڎەوەری هەزاران ساڵەو ئینسانو ئا جوگرافیایە دلېنە بەرا.

جە جوگرافیاو کوردەسانینە تاڵانکەردەی ژیۋگەی بەمەڵامەتو وێستگەکا کارەبې و بەنداویۆ یاوان بە قولەپۆپە. ئیساتې ڕووبەڕوو تەرسې گۊرەتەرې بیمېوە. زەرەرە ژیۋگەییەکې یاوێنې بە ئاستێوە جیاواز، بەتایبەتی بەمەڵامەتوو پڕۆژە کانزایی و نەوتییەکاوە."

کانای جە دما دمایی قسەکاشەنە ئاماژەش پانەیە کەرڎ، "پەنەوازا گرڎما گرڎ شۊنێنە ڕووبەڕوو ئینەی مردمێوە. وەڵې گرڎیۆ ڕێکوزیاکا گلێرگەو مەدەنی، پەنەوازا گرڎ چێرو چەترێوە هامبەشینە گلېرې بیمێوە، ۋێما ڕێکوزمې و ڕووبەڕوو تاڵانکەردەی ژیۋگەی مردمېوە."