دەسەو ڕاوەبەریی کەژەکەی، ڕۊو ٩ تەمووزی ئەرەیاوناێوەش وەڵا کەرڎۊ و بۊنەو ساڵڕۊو کۊکوشیی ٣ ئابی و دەسگێرتەی دەسەڵاتوو ئەفغانستانی جە لاو تالیبانیوە جە ١٥ ئابینە، بەینوو ٣ پەی ١٥ ئابی بە دروشموو " دژوو هجوومەکاو پیایە هەژموونوازا، ئێمە ئینایمۍ چەنی ژەناو شەنگالی و ئەفغانستانی" کەمپینێوەش ئەرەیاونا.

دماتەر ڕۊو ٣١ تەمووزی جمیەرۍ و ڕێکوزیایەکاو ژەنا سەرنیشت و وەرکەوتوو سوریاینە ئەرەیاوناش، وەروو ئانەی با بە دەنگوو ژەناو شەنگالی و ئەفغانستانی بەشداریی کەمپینەکەی کەرا. چا چوارچوەنە قەرارا چند چالاکیێوە کریا، کە یۊ چانیشا ڕاوەلوای کۊڕبەنڎێوەن جە ڕۊو ٧ ئابینە، شاروو ڕەقەینە.

قەراراهەریۊ جە کۊنگرەو ستاری، گلێرگەو ژەناو زەنۊبیای، ئەنجوومەنوو ژەناو پارتوو ئایندەو سووریای، ئەکادیمیاو ژنۊلۊژی، ئەنجوومەنوو ژەناو پارتوو یۊبییەی دیموکراتیک (پەیەدە)ی، یۊبییەی ژەناو ئێزدی، یۊبییەی ژەناو ئەرمەنی و ڕێکوزیایەکاو وەڵاتاو وەرکەوتوو دلێڕاسەی بەشداری چا کۊڕبەنڎەنە کەرا.

چا بارەوە نەسرین حەسەنە، ئەندامەو دەسەو گلێرگەو ژەناو زەنۊبیای و پەنجەوین عەلییە، ئەندامەو یۊبییەی سیاسەتی دیموکراتیکی و پەیوەندییەکاو کۊنگرەو ستاری، چند ورسەنگناێشا کەرڎی.

پەشتیوانی جە هەڵمەتەکۍ کەژەکەی

  پەنجەوین عەلییە واتش، ئادۍ پەشتیوانی چا هەڵمەتۍ کەرا، کە کەژەکە دەسش پەنە کەرڎینە و ئەرەیاوناش، "ھەڵمەتەو پەشتیوانی جە ژەناو شەنگالی و ئەفغانستانی، کە بە سەرمەشقایەتیی کەژەکەی دەسش پەنە کەرڎەن، جە قۊناغێوە گرنگنە ئەرەیاونیا. جە شەنگالنە هەزاران ژەنی کوشیۍ و تا ئیساتێچ ئەفغانستاننە و جیهانیچنە کوشتەی ژەنا بەرڎەواما. کۊکوشی و دەسدرێژی بییەن چێوێوە سیستماتیک. جە کۊکوشیی شەنگالینە فرەتەرین زەرەر وەروو زارۊڵا و ژەنا کەوت. ھەڵای چارەنویسوو فرەو ئا ژەنا نادیارا. ئەفغانستانیچنە هەمان چێو ڕووە مدۊ. جە ساڵەو ٢٠٢١ وەختۍ تاڵیبان دەس ملوو ئەفغانستانیرە گێرت، تندوتیژی دژوو ژەنا زیادتەر بی، ژەنی کوشیا، مافەکێشا وریا. کەژەکە سەروو ئا بنەمۍ ھەڵمەتێوەش دەس پەنە کەرڎە، ئێمەیچ ٣١ تەمووزینە پەشتیوانیی وێما پەی ھەڵمەتەکۍ بەروست.

واتیچش: حەر ئانە کە کۊڕبەنڎەکە ئینا ڕەقەنە، مانێوە جیاوازەش هەنە. ڕەقە کە پایتەختوو داعشی بۍ، بە ئیرادە، کۊشیای و مدرامانوو ژەنا ڕزگار کریا. چا شارەنە کە وەڵتەرۍ ناوەندوو ئەشکەنجەی، تاڵانی، دەسدرێژی و کۊکوشییەکاو داعشی بۍ، ئارۊ ژەنی دلێشنە کوۍ باوە. سەرنجە پەی دەوروو ژەنا جە بنیاتنیای ژیواێوە ئازاڎی مڎا. جە تاریخوو ژەنانە هەم مدرامان هەن و هەم کۊکوشی. وەروو ئانەی کۊکوشی و بەئامانجگێرتەی ژەنا دووبارە نەبۊوە، بە بەشداریی ١٢٩ ژەنا قسەوباس کریۊ و هجوومەکاو ئەقڵیەتوو پیاسالاری پووچەڵۍ کریاوە.

"پێویسا کۊشیای ھامبەش گەشتەر کریۊ"

  لاو وێشۊ نەسرین حەسەنە، سەرنجەش پەی هەرمانە و وەرپەرسبییەی ڕێکوزیایەکاو ژەنا سەرنیشت و وەرکەوتوو سوریاینە کێشتە و واتش: "چێوۍ تەر کە بەهەرمانەو وێماش مزانمۍ، زیندەئاستەیۊ یادوو ئا ژەنانە، کە کوشیێنۍ. بەتایبەتی ئا ژەنۍ کە جە هجووموو چەتەکاو داعشینە کوشیێنۍ، ھەرپاسە کۊڵیایۊ و شۊنیرەلوای پەی ئا ژەنا، کە چارەنویسشا نادیارا، پێسە هەرمانە و وەرپەرسبییەی سەرەکیما وینمێش. ھاموەخت جە کۊڕبەنڎەکەنە دۊخوو ژەنا ئەفغانستاننە و گرڎوو شێوازەکاو تندوتیژی دژوو ژەنا وەرەچەم گێریا. وەرپەرسبییەی سەرەکیی ئێمەن، سەرنجە پەی تندوتیژیی دژوو ژەنا کێشمۍ و ڕاگێرییش وەنە کەرمۍ. ئەگەر ئارۊیچەنە تندوتیژی پێسە وەروەڵان، یانۍ هەڵای نەیاوێنمۍ گرڎوو گلێرگەکا و دژوو ئەقڵیەتوو پیاسالاری، لایەنی لاوازما پەی کۊشیای هامبەشی هەن، ئینەیچ یاگۍ ڕەخنەین.

نەسرین حەسەنە واتیچش: گەرەکمانە بە دنیێش ئەرەیاونمۍ، وەراوەروو هێزە ئەرەگیرەکا و شانە شاریاوەکاو مەنتێقەکەیما، کە دژوو ژەنانۍ، مردمێوە. گەرەکمانە نیشانەش دەیمۍ، ژەنی چی مەنتێقانە ڕێکۍ وزیێنۍ و وێشا ڕێک وستەن.  ژەنی چەنی شۊڕشوو مەنتێقەکەی سەلەمناشا، کە گرڎوو مەیدانەکانە ئینۍ وەڵێوە. گرڎوو دنیۍ دیشا، کە ژەنی دەورێوە گەورەشا بییەن، جە ڕزگارکەرڎەی ئا مەنتێقانە، کە چێروو داگیرکاریی داعشینە بێنۍ. پەوکای گەرەکمانە ژەناو دنیۍ زنجیروو کۊیلایەتی ماڕا و ڕاو ئازاڎیی دەس پەنە کەرا.".

س.ز