کۆڵبەرێوە گەشمەرڎە بی و ٩ کۆڵبەرۍ تەریچ زامڎارۍ بیۍ
بەمەڵامەتو تەقەو ڕاسەوخۆ هێزەکا دەوڵەتو ئێرانی جە ژمارېوە کۆڵبەرا، جە مەنتیقەو نەوسوڎۍ، کۆڵبەرێوە گەشمەرڎەبی و ٩ کۆڵبەرۍ تەرېچ بەسەختی زامڎارۍ بیۍ.
بە پاو هەواڵێوە ماڵپەرو کۆڵبەرنیوزی، ۋېرەگاو ڕۊو یەکشەممەی ۋیەرڎەی، هێزەکۍ دەوڵەتو ئێرانی جە مەنتیقەو نەوسوڎۍ جە هۊرامانو ۋەرکەوتی، تەقەی ڕاسەوخۆشا جە ژمارېوە کۆڵبەرا کەرڎ و جە ئاکامەنە کۆڵبەرێوە کە خەڵکو شارو پاوەی بۍ، گەشمەرڎەبی و ٩ کۆڵبەرۍ تەرېچ بە سەختی زامڎارۍ بیۍ.
ئا کۆڵبەرە، کە نامېش ئاسۆ کەریمی-ن و عمرش ٣٩ ساڵ بیەن، گولـلۍ ۋەرو سەرەیش کەوتېنە و دماو ١٩ سەعاتا جەنازەکەش ئېزیانۊ.
بە پاو زانیارییەکا ماڵپەڕەکەی، زامڎارەکۍ پۍ نەوەشخانەو قودسی جە شارو پاوەی فاڕیېنێوە و ئاژەو تەندروستی بەشێوە چا کۆڵبەرا خاس نیا.
بە پاو ئامارێوە کۆڵبەر نیوزی، جە شش مانگو یۋەمو ئېساڵینە، لانیکەم ١١ کۆڵبەرۍ جە مەنتیقە سنووریەکا پارێزگاکا ورمۍ، کوردسانی و کرماشانی بە مەڵامەتی جیاجیاوە چانیشایچ تەقەی ڕاسەوخۆ و هێزەکا ئێرانی، هەرەسو ۋەروېوە، کەوتەیرە واری جە کەش و سەختیەکاوە و ئەرەتەقایۊ ئەڵغامی و هتد.. گیانشا جە دەسدان و ٥٠ کۆڵبەرېچ زامڎارۍ بیېنۍ.
هـ . ش
