کۊدار ئەرەیاوناش: کوشتەی ژەنێوە، کوشتەی گەلێوەن؛ ئازاڎیی ژنێوە، ئازاڎیی گەلێوەن و ئازاڎیی ڕابەر ئاپۊی، ئازاڎیی ژەنا و گەلان، داوایچش کەرڎە، ھاموەخت چەنی ٩و تشرینوو یوەمی بە شێوێوە قەوەت درێژە بە جمیەری شۊڕشگێڵنیی 'ژەنی، ژیوای، ئازاڎی' بدریۊ.
گلێرگەی دیموکراتیک و ئازاڎوو وەرکەوتوو کوردستانی (کۊدار)، ئەرەیاوناێوەنە بە ناموونیشانوو "کوشتەی ژنێوە، کوشتەی گەلێوەن؛ ئازاڎیی ژنێوە، ئازاڎیی گەلێوەن و ئازاڎیی ڕابەر ئاپۊی، ئازاڎیی ژەنا و گەلان"، جگە جە ڕۊشناییوستەی سەروو دۊخی قەیراناویی ژەنا جە گلێرگەی گیرۊدەو دیکتاتۊریەتوو ئێرانی و ئیدانەکەرڎەی و چەوسنایۊ سیستماتیکوو ژەنا و زیادبییەی حاڵەتەکاو کوشتەی ژەنان جە چند مانگی ویەرڎەنە بە نامۍ شەرەفیوە.
کۊدار داوایچش کەرڎەن، ھاموەخت چەنی ٩و تشرینوو یوەمی، ساڵڕۊو پیلانگێڵنیی میاننەتەوەی دژوو وەشکەروو ئەندێشە و دروشموو "ژەنی، ژیوای، ئازاڎی"، فرە بە قەوەتانە بەرڎەوامی بە جمیەری شۊڕشگێڵنیی 'ژەنی، ژیوای، ئازاڎی' بدریۊ.
حەر جە ئەرەیاونایەکەنە "زاڵبییەی نەریتی پیاسالارانەی گلێرگەنە، کە بەتندی دژە ژەنا و لاو دەسەڵاتیوە برەوش پەنە دریۊ و بەرھەم ماریۊوە، چەنی فشارە ئابووری-بژێوی و سیاسییەکا"، پێسە هۊکارە سەرەکییەکانی ورکێشیای حاڵەتەکاو کوشتەی بە نامۍ شەرەفیوە ئێران و وەرکەوتوو کوردستانینە نامۍ بریان و کۊدار پەیدماییئارڎەی بە هەژموون و دەسەڵاتوو سیستمی دژەژەنی باڵادەسی ئێراننە داواو کۊشیای سەرتاسەرییش کەرڎێنە.
ئانەیچ وزیان ڕوو، "دۊخوو ژەنا گلێرگەو ئێرانینە، کە دەسوو فشاروو ئەقڵیەتیی پیاسالاری و سیاسەتی قڕکەرانەو ڕژێمی دەسەڵاتداری دژ بە ژەنیوە مناڵنۊ، فرەخراپتەر بییەن. ڕژێمی دیکتاتۊر و سەرەڕۊ ئێراننە بەسیستماتیک پەرە بە کولتوورێوە ژەنکوشی پەشتبەستە بە سیستمێوە تیۊکراتیکی تەمامەتیی سیاسی مدۊ. ئا سیاسەتە دژەژەنە بییەن بایسوو وەشبییەی نۊعۍ ئەقڵیەتی دژەژەنی گلێرگەنە، کە ڕوانە دەیان ژەنۍ شارە جیاجیاکانە با بە قوربانیی ئا ئەقڵییەتەیە و بە نامۍ شەرەفیوە کوشییا. ماوەو مانگی ویەرڎەینە، یانۍ خەرماناننە زیاتەر جە ٥٠ ژەنا و کناچە گەنجا بۊنەو ئەقڵیەتی پیاسالارانەیۊ کوشییێنۍ و پێویسا جگە جە بەتندی ئیدانەکەرڎەی، بە کرڎار پەی فاڕای عەقڵییەتوو پیاسالاری گلێرگەنە و دماییئارڎەی بە ڕژێمی سیاسی دژ بە ژەنی ئێراننە، گوڕ بە کۊشیای بدریۊ".
کۊدار وستەنیچش ڕووە، حەر جە کوشتەی ژینا ئەمینی-ێوە بە دەسوو دەوڵەتی تا میاوۊ بە کوشتەی کناچە گەنجا و ژەنا بە نامۍ شەرەفیوە دلۍ بنەیانەکانە مەنتێقە جیاجیایەکاو ئێرانی و وەرکەوتوو کوردستانینە، کە ماوەو ئێساڵینە ڕووەش دا و مانگەو خەرمانانی چند حاڵەتێوە میدیاکانە وەڵا کریاوە، گردشا بۊنەو بییەی سیستمی باڵادەسوو پیاسالاری و ھەرپاسە وەنەکەوتەیۊکاو ئەقڵیەتوو پیاسالاریوە ڕووەشا دێنە، کە ڕۊ بە ڕۊ بەتندڕەوانە زیاد کەرۊ. ئارۊ ژەنی یان سەروو داواکەرڎەی ئازاڎی و مافەکاشا زیندانی کریا، یا چا بنەیانانە، کە دژەژەنێنی بە بەهانۍ شەرەفیوە کوشییا. بێگومان ڕێژێوە جە ئاماروو کوشتەیەکا بۊنەو تایبەتمەندیی شارتەیۊنە گلێرگەی پیاسالارنە میدیاکاوە وەڵۍ نەکریێنێوە".
درێژەو ئەرەیاوناکەو کۊدارینە ئاماژە پانەیە کریان، "بەدڵنیاییوە جمیەری شۊڕشگێڵنانەو "ژەنی، ژیوای، ئازاڎی" خاستەرین فرسەتی تارێخین پەی بنەبڕکەرڎەی ئەقڵیەت، کولتوور، سیاسەت و سیستەمە باڵادەستە دژەژنییەکەو ئێرانی. ڕابەر ئاپۊ فەلسەفەو ژەنی، ژیوای، ئازاڎی-یش بە ئامانجوو ئازاڎیی تەمامەتیی ژەنان جە کۊتوبەندوو گیریای لاو سیستمی پیاسالارییوە، بەتایبەتی چەسپنای دادپەروەریی کۊمەڵایەتی، متەنەرە. بە قسۍ ڕابەر ئاپۊی "کوشتەی ژنێوە بە ماناو گەلێوەن". ئانە کە ئارۊ سەرەمڕکەروو جمیەری شۊڕشگێڵنیی ژەنی، ژیوای، ئازاڎیین، ئاماژەن بە ڕووەبەڕووبییەیۊ نەوەی ھۊشمەندی سەروو بنەماو ئازاڎیوە وەراوەروو ئەقڵیەتی سوویاو پیاسالاریوە. ئارۊنە حەرچند فرەو ژیناکا بیێنۍ قوربانیی ئا ئەقڵیەتەیە، وەلۍ کۊشیای گلێرگاکا و گەلا بەتایبەتی ئێراننە و وەرکەوتوو کوردستانینە بە سەرمەشقایەتیی ژەنا، ھومێدبەخشا. پەوکای پێویسا ژەنی بە ئاڕاسەو رێکوستەی و ئەرەمتەیۊ"ڕێککەوتەێوە کۊمەڵایەتیی سەرڎەمییانەی سەروو بنەماو ئازاڎیی ژەنێوە" کوۍ باوە و پەرە بە کۊشیایشا بدا".
ئانەیچ ئەرەیاونییان، " ئێمە جە گلێرگەی دیموکراتیک و ئازاڎوو وەرکەوتوو کوردستانینە جگە جە شەرمەزارکەرڎەی ئەقڵیەت و کولتوور و سیستمی سیاسیی ژەنکوشی، بەرڎەوامیی بەقوەتوو جمیەری شۊڕشگێڵنانەو ژەنی، ژیوای، ئازاڎی پێسە تاکە ڕاو ڕزگاریی ئێرانی وەرکەوتوو کوردستانی جە گردوو بنبەسە ئەقڵی، کولتووری، سیاسی، ئابووری و کۊمەڵایەتییەکا مزانمۍ. ئارۊنە ژمارێوە فرە جە ژەنە کۊشەرا وزیێنۍ زیندان و فرێچشا قوربانیی ئا ئەقڵیەتە پیاسالارانەیە و سیستموو دینسالاریینێ".
ئاخرۊ کۊدار وستەنیچش ڕووە: "خولقنەری سەرەکیی فەلسەفەو ژەنی، ژیوا، ئازاڎی، یانۍ ڕابەر ئاپۊ ماوەو ٢٥ ساڵان ئینا زینداننە، کۊشیای ئازاڎیوازانەو ژەنا، کە لاو ئەندازیاروو ئەندێشەو ئازاڎیی ژەنا یانۍ ڕابەر ئاپۊیۊ قەلاپۊپەوە بەرڎەواما" و بە ئاماژەدای بە ویەرڎەی ٢٥ ساڵا ملوو گیسنانینەی پیلانگێڵنیی میاننەتەوەیی دژوو ڕابەروو گەلوو کوردی عەبدوڵڵا ئۊجالانیرە جە ٩و تشرینوو یوەمینە، داواش وەنەو "ژەنا، گەلە چەوسیاوا، بەتایبەتی ژەناو کوردی و ژەناو ئێرانی کەرڎێنە، کە فرسەتی تارێخیی ئارۊیی یانۍ جەقەڵاپۊپەبییەی جمیەری شۊڕشگێڵنینە بە سەرمەشقایەتیی ژەنا، پەی ئارڎەیدیی ئازاڎی و دیموکراسی قۊزاوە. واتەنیچش "کوشتەی ژەنێوە، کوشتەی گەلێوەن، ئازاڎیی ژەنێوە، ئازاڎیی گەلێوەن و ئازاڎیی ڕابەر ئاپۊی، ئازاڎیی ژەنا و گەلان". پەوکایچ جەختش کەرڎەنۊ، بە ئامادەبییەی سەرجەموو ئازاڎیخوازا و دیموکراسیوازا مەیدانەکانە " سەروبەندوو ساڵیادوو پیلانگێڵنیی میاننەتەوەیی ٩و ئۊکتۊبەرینە، کە دژ بە خولقنەروو فەلسەفەو ژەنی، ژیوای، ئازاڎی یانۍ ڕابەر ئاپۊی کریان، کۊشیای بیاونا قەلاپۊپە".
س.ز
