خۊنکارۍ داوا جە حکومەتی کەرا مەعاش و مامۆسایا بڎا
خۊنکارۍ پۆلوو ١٢ی ئامادەیی، دژوو بێباكی و کەمتەرخەمی حكومەتی جە ئاست داواکاریی مامۆسایا و دماوستەی مەعاشەکەیشا، کە بیەن بە مەڵامەتوو وستەیرەو بەرەو ۋەننگەکا، ۋېنیشاندایشا کەرڎ.
ئارۊ بەشێوە جە خۊنکارا پۆلوو ١٢ی ئاماڎەیی جە باخوو گرڎینەو شاروو هەڵەبجەی، گلېرۊبیەیۍ ناڕەزایشا کەرڎو بەیاننامېوشا ئەرەیاۋنا.
جە گلېرۊبیەکەینە ژیوار ئەنوەرە بەیاننامەو خۊنکاراش ۋناوە و چنەشەنە ئامابۍ: ئێمە بە نوێنەرایەتی ژمارېوە جە خۊنکارا سنووروو پارېزگاو هەڵەبجەی بە پەنەوازما زانا هامسۆزیی و پەشتیوانیی پۍ مامۆساكاما بەربڕمۍ، ئی گلېرۊبیەیە ئەنجام بڎەیمۍ و دەنگوو ۋېما وزمۍ پاڵ و مامۆسایا سەرمەشقی، پۍ ڕووبەڕووبیەیۊ ئا ستەمەی ۋنەشا کریان كە نەڎای پەنەی مەعاشەکاشانە جە وەختوو ۋېشەنە.
واتیچش: پېسە خۊنکارا ئی ڕووا بە ڕۊو تاقیكەرڎەیۊ وەفای مزانمۍ ۋەران ۋەر بە مامۆساكاما، چېگۊ ڕووەو دەمیما کەرمۍ ئا حكومەتە بێباكەیە و پنەشا ماچمۍ، ئەگەر بەردەوامی ۋەنای هەزاران خۊنکارا و کەرڎەیۊ بەرەو ۋەننگەکاش لاوە گرنگا، ئانە با بە ئەركوو ۋېش هۊربېزۊ و شایستە داراییەکا مامۆسایا جە وەختوو ۋېشەنە بڎۊ ، ئەگەر نا، حكومەتی ماوە سەرشیەو هەرێمی مشۊم ۋەرپرسیاری وستەیرەو ۋەننگەکا جە ئەستۆ گېرۊ.
جە دمادمایچەنە ئاماژەش پانەی کەرڎ، مانگێوە ۋەنایما فەوتیان، بەڵام جە ۋەننگە ناحکومییەكانە و شارێوە هەرێمینە ۋەنای بەردەواما، پۊکەی داواكارېنمۍ جە وەزارەتوو پەروەردەی بۍ دەموو داواکاریەکاماوە، یان تاقیكەرڎەیۊ نیشتمانییما پۍ دماوزا یان مەنهەجوو ۋەنای کەم کەراوە.
