کەجەدەکە-ئە: فاشیستەکێ هجومشا کەرد سەروو ئێشکگیری ئازادیی، خاوەنداری جە چالاکییەکەی بکەردێ
کەجەدەکە-ئە ئەرەیاوناش: " فاشیستەکێ هجومشا کەرد سەروو ئێشکگیری ئازادیی. داوا جە گەلەکەیما مکەرمێ خاوەنداری جە چالاکییەکەی بکەرانێ".
هجووم پەی سەروو ئێشکگیری ئازادیی
چەتە فاشیستەکێ هجومشا کەرد سەروو "ئێشکگیری ئازادیی" کە پەی ئازادیی جەستەیی ڕابەروو گەلو کوردی عەبدوڵا ئۆجالانی و هۆرگێرتەی گۆشەگیری ئیمراڵی جە شارو ستراسبۆرگ و فەرەنساینە ئەنجام مدریۆ.
زانیان ئا وەختەی چالاکا چا ئامادێ نەبیێنێ، هجوومکەرەکە تابلۆکێش ماڕێنێ و بڕەمان.
کۆنگرەو گلێرگەو دیموکراتیکی کوردسانیا جە ئەوروپا (کەجەدەکە-ئە) پەیوەس بە هجوومەکەی ئەرەیاونێوە نویسیاش وەڵا کەردۆ و ماچۆ: "بە سەرمەشقایەتی دەسوەڵێوستەی ئازادیی پەی عەبدوڵا ئۆجالانی بە داواو ئازادیی جەستەیی ڕابەروو گەلو کوردی عەبدوڵا ئۆجالانی و هۆرگێرتەی گۆشەگیری جە ٢٥ و حوزەیرانوو ٢٠١٢ یوە شارو ستراسبۆرگی فەرەنساینە "ئێشکگیری ئازادیی" بە پاگیریوە بەردەواما.
٢٧ و ئایاری گرووپێوە فاشیستی تورکی هجوومش کەرد سەروو ئێشکگیری ئازادیی کە پەی ئازادیی ڕابەر ئاپۆی و دژوو پیلانگێڵنیی میان نەتەوەیی دەسش پنە کەردەن.
هەڵوێسی هجوومکەرانە و سیاسەتوو تاوانبارکەردەی حکومەتوو فەرەنسای دژوو کۆشیای ئازادیی کوردی بەردەواما، ئینەیچ غیرەتش وست وەروو گرووپە فاشیستەکا".
کەجەدەکە-ئە بانگەواز جە حکومەتوو فەرەنسای مکەرۆ هەڵوێس نیشانە بدۆ دژوو هەوڵو ئاژاوەگێڵنی و ماچۆ: "داوا جە گەلەکەیما مکەرمێ بە شێوەی جەماوەری خاوەنداری جە ئێشکگیری ئازادیی بکەرا کە ١٢ ساڵێن بەردەواما و ئی هەوڵو ئاژاوەگێڵنییە پووچ بکەراوە".
