کۆنگرەو جڤاکە دیموکراتیکەکاو کوردستانی ئەورووپانە (کەجەدەکە-ئە) پێوەس بە هجووموو ئەرەگیرکاریی دەوڵەتوو تورکیوە ئەرەیاوناێوی نویسیاش وەڵا کەردۆ. 

ئەرەیاونایەکەینە ماچۆ: " بانگەواز وەنەو گەلەکەیما مکەرمێ دژوو هجوومە ئەرەگیرکارییەکاو دەوڵەتوو قڕکەروو تورکینە پەی سەروو پانیشتوو کوردستانی و شەنگالی و مەیدانەکاو گەریلای سەفەربەرێ با و گرد یاگێوەنە چالاکیی ناڕەزایەتی بکەرا".

"دەسکەوتەکاو گەلوو کوردی مکریانە ئامانج"

ئەرەیاونایەکەینە ئامان: " هامپەیمانیی فاشیستی ئاکەپە-مەهەپەی کە جە هجووموو قڕکەردەینە دژ بە گەلوو کوردی هیچ ئەنجامێو بەدەس نمارۆنە، پا مگێرۆرە سەروو درێژەدای بە جەنگی پەی فۆتنای دەسکەوتەکاو گەلوو کوردستانی.

دەوڵەتی قڕکەروو تورکی بە هامکاریی هێزە هامکارەکا و دەوڵەتاو هەرێمەکەی ئی جەنگەشە بەردەن  قۆناغێوی تازەوە. چی پێناوەنە گرد هەوڵێوی ئاژاوا و فرسەتێوە بەکارمارانە. چا هجوومەنە، کە بە هامکاریی پەدەکەی مکریۆ، دەسکەوتەکێ و ئازادیی گەلوو کوردی مکریۆ ئامانج.

پانیشت و شەنگال ئینێ چێروو هەڕەشێوی جیددینە، دەوڵەتوو تورکی گەرەکشەن  پانیشتی و شەنگالی ئەرەگیر بکەرۆ و هامشێوەو عەفرینی قڕشا بکەرۆ. پەدەکە پیسەو باڵێوی دەوڵەتوو تورکی هەرمانە مکەرۆ، زەمینە پەی ئەرەگیرکاری وەش مکەرۆ و  چێیچۆ گرد دەرفەتێو سەفەربەر مکەرۆ.

ئا لەشکرکێشییە جیددییە پانیشتوو کوردستانینە هەن، بە پەشتگیریی پەدەکەی بەردەواما. پەدەکە ڕای ڕسمییەش پەی سوپای ئەرەگیرکەرەو تورکی کەردێنۆ و گرد کۆنتڕۆڵێوەش وستەن دەسووو سوپاو تورکی. دەوڵەتوو تورکی بە فراوانکەردەی هجوومەکاو ئەرەگیرکاری، گەرەکشەن ئیرادەو پانیشتوو کوردستانی بوزۆنە چێروو ڕکێفوو وێشۆ.

حکومەتوو عێراقی وەروو ئانەیە وەراوەروو سەپنایەکاو دەوڵەتوو تورکیوە هەڵوێست وربگێرۆ، بەشدار مبۆنە جە سیاسەتوو ئەرەگیرکاری و قڕکەردەی دەوڵەتوو تورکینە. ئی هامکارییە هەڕەشێ جە دماڕۆو گەلوو کوردستانی مکەرۆ، هەڕەشێوی جیدییەنە و نمەلۆنە خزمەتوو گەلاو عێراقیوە.

تەڤگەروو ئازادیی کوردی زیاتەر جە ٤٠ ساڵان پەی دماڕوێوی ئازادوو گەلەکەیما کۆشیاێوی ڕەوا مکەرۆ. ئانە کە مکریۆنە ئامانج، دەسکەوتەکاو گەلوو کوردستانی و گردوو بەهاکاو کوردستانینێ. دماڕۆ و خاک و تارێخما مکریۆ ئامانجوو هجوومەکا، جیای دماڕوێوی ئازادی، ئاسیمیلاسیۆن و قڕکەردەی سەروو گەلەکەیماوە میاونا یاگێ.

"خاوەندارێتیێوی قەوەت و ڕۆشن پەنەوازا"

پەی ماڕای ئی هجووما و ژیوای گەلوو کوردی دلێ هەلومەرجێوی ئازادینە، پەنەوازا گردوو گەلی وەڵاتپارێزنوو کوردستانی هەست پی کارەساتەیە بکەرا، بە خاوەندارێتیێوی ڕۆشن و قەوەت دژوو هجوومەکا بمدراوە. تەنیا پێسە هجوومەکاو ئەرەگیرکاری و قڕکەردەی مەڕیا، تەنیا پێسە ئا خاکە مپارێزنیۆ، کە هەزارا کەسێ گیانشا پنە بەخشان".