کۆمیتەو پەیوەندییەکاو بەروو کەجەکەی داواش وەنەو هێزەکاو عێراقی و پانیشتوو کوردستانی کەردە، کە نەبا بە هامبەشێ بانگەوازەکاو جینۆسایدوو دەوڵەتی تورکی ئەرەگیرکەری و ئەرەیاوناش، "دەوڵەتوو تورکی بە سەرکێشی سەردەسەی فاشیست ئەردۆغانی، گەورەتەرین هەڕەشێ ئەمنییەنە
کۆمیتەو پەیوەندییەکاو بەروو کەجەکەی سەبارەت بە سەردای کاربەدەساو دەوڵەتوو تورکی ئەرەگیرکەری پەی بەغدای ئەرەیاوناێوەش وەڵا کەردۆ. کەجەکە ئەرەیاوناش، "یەرێ وەزیرێ دەوڵەتوو تورکی ئەرەگیرکەری ئارۆ سەروو پایتەختوو عێراقیشا دان و چەنی کاربەدەساو دەوڵەتوو عێراقی کوێ باوە. کۆدەبنەوە. وەڵێ ئا سەردایەینە سەردەسەی فاشیست ئەردۆغان و کاربەدەسا ی تەروو دەوڵەتوو تورکی دوێنێ و بەپاو ئا دوایایشا، ئا تاوانێ کە سوپاو تورکی ئەرەگیرکەری مانگەی وەڵینێنە وەراوەروو هاموەڵاتاو عێراقینە کەردەنش، ڕۆو کۆبییەیۆکەی دیارا کە چێشا و ئیساتێ و لای چێش کریۆ".
ئەرەیاونایەکەینە ئامان، "دەوڵەتوو تورکی سیاسەتوو دلێ و بەریش سەروو بنەماو جینۆسایدی و قڕکەردەی گەلوو کوردی بەرۆ ڕاوە". ئەرەیاونایەکە پێسە بەردەوام بییەن، "پەی ئانەیچە دلێنە نکۆڵیی جە بییەی گەلوو کوردی کەرۆ، سیاسەتوو قڕکەردەیی کولتوری دژوو کوردەکا کەرۆ، پیمانە ئەخلاقی وئینسانییە بنچینەییە نەتەوەیی، میاننەتەوەیی و گەردوونییەکا پاشێلێ کەرۆ و بە نەبییە منیۆشارە و دژوو ڕابەروو گەلوو کوردی عەبدوڵا ئۆجالانی سیاسەتوو گۆشەگیریی دژواری پەیڕەو کەرۆ. سیاسەتوو بەروو وێچش بە شێوێوە، کە خزمەت پا سیاسەتەو جینۆسایدی دلێنە بکەرۆ ڕێک وزۆ. وەروو ئانەیە حەر یاگێوە جیهانینە بۆ، چەنی کێ کۆ بۆوە و دیدار کەرۆ، ڕۆژەڤ و داواکاریی سەردەستەی فاشیست ئەردۆغانی و کاربەدەسای تەروو دەوڵەتی، ورگێرتەی پەشتیوانیی میاننەتەوەیین پەی جەنگوو قڕکەردەی دژوو کوردی. دیدارەکاو نەتەوەیۆگێرتەکانە تا کۆبییەیۆ باڵاو ناتۆی، داڤۆسۆ تا میونشن تا ئاستانا و سوچی، ڕۆژەڤ و ئەجیندای سەرەکیی ئەردۆغانی وێستەیۆ و بەدەسئاردەی پەشتیوانیین پەی سیاسەتوو قڕکەردەی کوردا و هامبەشیپەنەکەردەی هێز و دەوڵەتا دلێ تاوانوو قڕکەردەینە. سیاسەتوو تورکیای وەرکەوتوو دلێڕاسەینە ئینا هەمان چوارچوەنە. بەتایبەتی چند مانگی ویەردەنە وەراوەروو دەوڵەتوو عێراقینە سیاسەتوو سەرانەسانای و چەمسوورکەردەیوەن و هەڕەشێ پەیڕەو کەرۆ و گەرەکشا دەوڵەتوو عێراقی سیاسەتوو قڕکەردەی وێشنە بەشدارییش پەنە کەرۆ".
ڕژێموو ئەردۆغانی ڕژێموو سەدامی تازەین، هەمان جەوهەر و دلێنەش هەن
ئەرەیاونایەکەو کۆمیتەو پەیوەندییەکاو بەروو کەجەکەینە ئاماژە پی بابەتا کریان:
"دەوڵەتوو عێراقی جە ڕوەو دەستووری بنچینەییوە شناسنامە و مافەکاو کوردی بەڕسمی ئشناسێنێ و پەی چارەسەروو پەرسەو کوردی هەنگامەی گرنگەش نیێنە. دەوڵەتوو ئیساتێ عێراقی سیاسەتوو قڕکەردەی، نکۆڵی و سڕیەیۆ ڕژێمەکاو وەڵێش ویەرنان و بەرەو دیموکراتیکبییەی هەنگامە منیۆ. ئەگەر دەوڵەتوو عێراقی بە ئاراستەو دیموکراتیکبییەی بە شێوەی ئازایانەتەر هەنگامە بنیۆ، وەرکەوتوو دلێڕاسەی بۆ بە سەرمەشق و پەشتیوانوو کوردی و سەرجەموو هێزە دیموکراتیکەکا بەدەس مارۆ. دەوڵەتوو تورکی کە ئینەیە موینۆ، بە پاگێرتەیرەوە گەرەکشا عێراقی جە ڕاو دیموکراتیکبییەیۆ دوور بوزۆوە، جە سیاسەتوو سڕیەیۆ و جینۆسایدوو وێشنە بەشداری بکەرۆ و تلنۆش چۆوە و گێڵنۆشۆ پەی سیاسەتوو سەد ساڵی وەڵینی. پا ئامانجەوە بە گرد جۆرێوە هەڕەشێ مکەرۆ، سەرانەش چەنە مسانۆ. ئیساتێچ یانێ چنی کاربەدەساو عێراقی کۆبییەیۆ ئەمنیی ساز مکەرۆ.
وەڵێ گرد چێوێوەنە ئا ڕاسییە مشۆم دەسنیشان کریۆ، کە گەورەتەرین هەڕەشێ ئەمنییەو سەروو عێراقی دەوڵەتوو تورکی فاشیستین. دەوڵەتوو تورکی بە سەرکێشیی سەردەسەی فاشیست ئەردۆغانی پەی عێراقی گەورەتەرین تەرسەی ئەمنییەنە. ئانە کە گرد وەخت باس جە عوسمانیی تازەی و میساقی میللی کەرۆ، ئانە کە ماچۆ موسڵ و کەرکوک بەشێوەنێ جە ئێمە و ماچۆ کە بەشێوە جە خاکوو عێراقی ئەرەگیر کەرۆ، سەردەسەو فاشیستەکا ئەردۆغانا. ئانە گەلاو عێراقیش دژوارتەرین وەختەکانە پارێزنا، دژوو هجوومە قڕکارییەکاو داعشی پارێزگاریوەنەکەردەی، جمیەروو ئازادیی کوردی و پەکەکەینێ. پەوکای ئەگەر کۆبییەیۆ باڵای ئەمنیی هەقەتین ساز کریۆ، ئانە مشۆم نەک دژوو پەکەکەی، بەڵکوم دژوو دەوڵەتوو تورکی ئەرەگیری بۆ. وەروو ئانەیە دەوڵەت خاکوو عێراقیش ئەرەگیر کەردەن، سەروو خاکوو عێراقیوە بە سەدان بارەگێ وەختیێ و هەمیشەییش وەش کەردێنێ، بە دەیان هەزار سەروازێ وێش سەروو خاکوو عێراقیوە بنێشا وستێنە؛ شەنگالۆ تا کەلار، دهۆک و زاخۆ گرد ڕوێ هجووم کەرۆ سەروو بەشێوە جیاو خاکوو عێراقی، کریا ئامانجوو هجووموو فڕۆکا و درۆنەکاو دەوڵەتوو تورکی. جە ئەنجاموو ئا هجوومانە تا ئیساتێ ١٦٥ هاوەڵاتێ عێراقی گەشمەردێ بیێنێ،بە سەدان کەسێچ بریندارێ بیێنێ و گرد ڕوێ ژمارەشا فرەتەر بۆ. گەلاو وەرکەوتوو دلێڕاسەی و عێراقی بە هەزاران ساڵێ دەوروو بەحرەکاو فوراتی و دیجلەیرە ژیوای ئابوورییشا بونیاد نیان. ئانە ئاوەو دیجلەی و فوراتی بڕۆ و دژوو عێراقی و وەڵاتاو وەرکەوتوو دلێڕاسەی پێسەو ئامرازێوە قڕکەردەی ئابووری و ئیکۆلۆژیکی بەکارش مارۆ تورکیان. دۆخێکوە چانەنە دیداروو کاربەدەساو عێراقی و وەرپەرسە باڵایاو سەروازییا و هەواڵگێرییاو تورکیای، کە تیرۆریست هاکان فیدانیچشا چنەن، بە پاو بەرژەوەندییەکاو دەوڵەتی و گەلاو عێراقی نییا. کاربەدەساو دەوڵەتێوە چەنی متاوا ڕا و ڕابازوو ئەرەگیرکەردەی خاکوو وەڵاتەکەیشا و گەلەکەیشا دەوڵەتێوە ئەرەگیرکەر و بێگانەنە تاوتۆ کەرا؟ ئینە وەردەموو گەلی و تاریخینە هیچ بەهانێوە ورمەگێرۆ. دەسێوە هاکان فیدانی بە ونەو هاموەڵاتاو عێراقی سوورا، نمەبۆ دەسەکەی تەرش دلێ دەسوو شمەنە بۆ. مشۆم ئانە بزانیۆ گەلاو عێراقی و وەرکەوتوو دلێڕاسەی سەدام و ڕژێموو بەعسی بە چە مانێوە بێنێ، فاشیزموو ئاکەپە-مەهەپەی و ئەردۆغانیچ هەمان ماناشا هەنە. ڕژێموو ئەردۆغانی ڕژێمی نۆژەنکریاوەن و بە شێوەی جیاواز ڕەنگکریاو ڕژێموو سەدامین، یەک جەوهەر و دلێنەشا هەن.
جە ڕووەو ئەمنی و ئاسایشیوە هیچ چێوێوە نییا تا تورکیا بە عێراقیش بدۆ. ئەگەر چێوێچش بۆ ئانە ئەرەگیرکەری، تیرۆر، تاڵان، کۆمەڵکوشی و متەی هەڵسەو چەمان. ئەگەر دەوڵەتوو تورکی ویرێش جە ئاسایشوو عێراقی کەردێنێوە، بە هەزاران چەتێ داعشی سنوورەکاوە پەروەردێ کەرێ و نەکیانێشا سەروو موسڵ، کەرکوک و ئەنباری. ئەگەر تورکیا پەرۆشوو ئاسایش و دۆخی ئەمنیی عێراقی بیێ، دژوو داعشی کۆشیێ، جیای ئانەیە دەیان هەزار هجوومێ بە درۆن و فڕۆکە ئیساتێ سەروو کورداوە کەرێ، ئانەیە دژوو داعشی کەرێ. بەڵام دەوڵەتوو تورکی تاکە دەوڵەتا کە هەوڵێش دێ دەوڵەتوو چەتەکاو داعشینە کونسوڵخانە کەرۆوە. ئیساتێچ دەوڵەتێوە ئەرەگیرکەر کە داعش پێسە هەڕەشێ دژوو عێراقی بەکار مارۆ، تا دژوو گەلاو عێراقی چالاکیی تیرۆریسی کەرا، بە تواناکاو دەوڵەتوو وێشا چەتەکاو داعشی پەروەردێ و پەڕچەک کەرا. ئانێ بە هەزاران گەشمەردێشا بەخشێ و گەلاو عێراقی و وەرکەوتوو دلێڕاسەیشا دژوو چەتەکاو داعشی پاریزنێ پەکەکە و جمیەروو ئازادیی کوردی بێنێ.
بانگەواز: مەبیدێ بە هامبەشێ هجوومە قڕکارییەکاو دەوڵەتوو تورکی ئەرەگیرکەری
سەروو ئا بنەمێ بانگەوازوو ئێمە پەی کاربەدەساو دەوڵەتوو عێراقی ئانەنە، کە نەبا هامبەشێ هجوومە قڕکارییەکاو دەوڵەتوو تورکی ئەرەگیری، کە بە سەرکێشیی سەردەسەی فاشیست ئەردۆغانی دژوو کوردا کەرۆشا. عەلەمەو دەوڵەتوو عێراقی کە بییەی و مافەکاو کورداش بە دەسووری بنچینەیی وێش پارێزنێنێ، نمازدێ کە دەوڵەتوو تورکی ئەرەگیری پەی بۆ پەردەپۆشکەردەی و شارتەیۆ تاوانەکاو جەنگوو دلێ بەکار بارۆ.
بانگەوازما پەی گردوو لایەنە سیاسییەکا، وەڵاتپارێزنا، ڕۆشنویرا، نویسەرا، کەسایەتی و ڕێکوزیایەکاو گلێرگەی مەدەنی عێراقنە و پانیشتوو کوردستانینە ئانەن: دژوو ئا هەڕەشاو دەسملەرەگێرتەی خاکی و ئەرەگیرکەری دەوڵەتوو تورکی، دژوو جەنگی و تیرۆروو سەروو شار و عاسمانوو عێراقی، شمەیچ دەنگ بەرز کەردێوە، ڕا مەدەیدێ، کە ئایندەتا بۆ بە قوربانیی بەرژەوەندیی تەسکوو گروپێوە گولانەی".
