کۆکوشیی گەڕەکەو غازی: مشۆم سەرۆکوەزیرانوو ئاوەختی و بکوشێ سزا بدریا
چالاکیی یادکەردەیۆی ساڵیادوو کۆکوشیی ساڵەو ١٩٩٥ گەڕەکەو غازی ئیستەنبوڵینە، داوا کریا وەرپەرسێ سزا بدریا.
کۆکوشیی ١٢ ئاداروو ١٩٩٥ گەڕەکەو غازیی مەنتێقەو سوڵتان غازیینە، ٢٢ کەسێ مەردێ و سەدان کەسێ بریندارێ بیێ.
سەروو بانگەوازوو پلاتفۆڕموو ١٢ ئادار وەردەموو وەقفوو پەروەردە و چاندوو گازی (جەمخانە)ینە بە بۆنەو ٢٩ەمین ساڵیادوو کۆکوشییەکەینە چالاکی یادکەردەیۆ کریا.
بێجگە کەسوکاروو قوربانییا، پەرلەمانتاروو دەم پارتیی ئیستەنبوڵی، جەلال فورات و کاندیداو هامسەرۆکوو شارەوانیی ئیستەنبوڵی، مەراڵ دەنیش بەشتاش و موراد چەپنی، چندین کەسێتیێ و نوێنەرێ پارت و ڕێکوزیایەکا ئامادێ بێنێ.
جەماوەر بە ورگێرتەی پانکارتوو "غازیوە تا عومرانیە دادپەروەری موازمێ" تا پارکوو حوسەین ئاڵتینی، کە ٢٩ ساڵێ وەڵێ ئیساتێنە چندین کەسێش دلێنە کوشیێ، ڕاشا پیما.
ڕاپیمایەکەنە درووشموو "گەشمەرداو غازیی مەمرا" و "گەشمەرداو غازیی شکۆو ئێمەنێ" و "گەلوو غازی ئینێ چێ، بکوشەکە چکۆن" و "دادپەروەریی پەی غازی و پەی گرد لایێوە" بەرزێ کریێوە. پەی یادکەردەیۆ قوربانییەکا پارکوو حوسەین ئاڵتینینە ولی نریێرە. دمایی براو یۆ جە قوربانییاو کۆکوشییەکەی، ئەرکان شیشمەک واتش هەڵای تووڕەیی و ئێشەکەشا تازەن.
شیشمەک واتش ئی کۆکوشییە هەوڵێوە بێ پەی چەمتەرسنای ئۆپۆزیسیۆنی شۆڕشگێڵنی و گردوو گەلە شۆڕشگێڵنا و دیموکراتا، هجوومێوە بێ پەی سەروو گردوو گەل و پێکئاماێوە، یاگێوە پێسەو غازیینە بەردەوام پۆلیس گێڵۆ، چی بکوشێ گومێ بیێ؟ ئینەیچ تووڕەیی و ئێشوو گەلیش زیاتەر کەرد و بەرەو بنکەو غازیی کەوتێ ڕا.
شیمشەک واتش دماو هجووموو کەسە نەشناسیایەکا، پۆلیس هجوومشا کەرد سەروو گەلی و ١٨ کەسێشا کوشتێ، بەڵام هەڵای بکوشێ سزا نەدریێنێ.
شیشمەک داواش کەردە وەرپرساو ئا کۆکوشییە سزا بدریا، بەتایبەت سەرۆکوەزیرانوو ئاوەختی تانسو چیلەر، وەزیروو دلێ، نیهاد مەنتەش، ڕاوەبەری گردینوو ئاسایشی، سەرۆکوو فەرمانگەو هەواڵگێریی حەنیفە ئاڤجی، ڕاوەبەری گردینوو پۆلیسی محەمەد ئاگار، پارێزگاروو ئیستەنبوڵی خەیری کۆزاکچی ئۆغلو، ڕاوەبەروو ئاسایشوو ئیستەنبوڵی نەجدەت مەنزیر.
دمایی بەرەو ئا قاوەخانە کە گولەواران کریابێ ڕاشا پیما و یاگێ کۆکوشییەکەینە ولیشا نیێرە.
دمایی تا قەبرسانوو غازیی ڕاشا پیما و سەروو قەبرەکاوە یادوو قوربانییەکاشا کەردۆ.
