ڕۆزەرین کەمانگەرە، ۋەرپەرسەو پەیوەندییە دیبلۆماسییەکا کەژاری، جەبارەو هۊرچنیەکا ئێرانیۆ واتش: "گەلاو ئێرانی، مەلا مۆرە پۍ هەمان ئا دەسەڵاتەیە کەرا، کە دەسش بە ۋنەو ژەنا و جوانا گەلی سورا."
ڕۆزەرین کەمانگەرە، ۋەرپەرسەو پەیوەندییە دیبلۆماسییەکا جەمەو ژەنا ئازاڎیی ۋەرکەوتی (کەژار) جە بارەو هۊرچنیەکا ئی دماییەو ئێرانی پۍ ئاژانسوو هەواڵوو فوراتی (ANF) قسێش کەردۍ و واتش: " جە هۊرچنیەکا ئی دماییەو ئێرانینە، مەردمی بە ئاگا و هوشیاروو گەلاو ئێرانی جوابێوە تەمامشا بە حاکمیەتوو ئێرانی دا، کە مەلا و مۆرە پۍ بەردەوامی ئا دەسەڵاتەیە مەکەرا کە دەسێش بە ۋنەو جوانا و ژەنا ئێرانی سورێنۍ، خەڵک بۍ کە دەسەڵاتشا وست ۋەروودەم و ئا پرسیارۍ کە دەسکۊتوو تۆ پۍ خزمەتوو گەلی چێش بیەن؟ بێجگە جە قەنارەدای و سەرکوتکەردەی و زینڎانی کەردەی و ئاورا کەردەی، گلێرگەو ئێرانی گلێرگێوە هوشیارا، ئاڎۍ پا ئەزمونەی جە ئاخێزوو ''ژەنی ژیۋای ئازاڎیی''نە بێشا، جارێوەتەر نەلۍ و دەنگشا بە هەمان دەسەڵاتی نەڎاوە."
هەر دەر باروو ئا بایکۆتەیە و ئا ڕێچە کە جمهوری ئیسلامی ئێرانی گێرتشەنە ۋەر پۍ ئانەی کە خەڵک بەشدارۍ با جە هۊرچنیەکانە، ڕۆزەرین کەمانگەرو واتش: "حاکمییەتوو ئێرانی فرەو ڕێباز و ڕاوجێش بەکارئاردۍ پۍ بەشداربیەو گەلی، سیاسەتی بەزۆر، میدیا و ڕیکلامی ساختە پۍ ڕێژەو بەشداربیەی، سیاسەتی نەرم ئەرمانای چنی مەردمی، بەڵام مەردموو ئێرانی هەمیشە جە وەختە گرنگەکانە هەڵوێسی ڕۊشن و کاریگەرش بیەن، ئیجارەیچە جە ۋەرا ۋەروو ئا حاکمییەتەینە بەهەمان جۆر هەڵوێسێوە تەمام ڕۆشن و بەرزشا ئەرمانا، ڕەنگە ڕێژێوە کەم جە خەڵکی لووۍ با، بەڵام فرە نیا و یاگۍ باسی نییا".
هاموەخت بانگەوازوو حزب و لایەنەکایچش چانیشا پەژاک پۍ بایکۆتوو پرۆسەکەی ویرئاوردۆ، کە دەورش چانەینە بۍ کە کەمتەرین رێژەو دەنگدەرا بەشداری چا هۊرچنیەینە کەرا.
حەرپاسە ڕۆزەرین کەمانگەرە ئانەیچش وست ڕووە کە ئانەی ئیسە متاوۆ ئاژەو ئێرانی نیشانەو جەهانی بڎۆ گەلاو ئێرانینۍ نەک حاکمییەتوو ئێرانی، هەر چی بارۆ واتش: "گەلاو ئێرانی پا کۆدەنگی و جە پەشت مردایۆ یۊترینی، متاوا ۋێشا دەسەڵات مجاراوە و سیاسەت کەرا و ئاینڎەو ۋێشا بنیاڎ بنیا، مشۊم سەروو ئی ڕۍ ۋێشا بەردەوامۍ با و هەمان هەڵوێسشا بۆ، پی جۆرە متاوا سەرکۊتۍ با."
